តុលាការសម្រេចឃុំខ្លួនប្រពន្ធចុងជះទឹកអាស៊ីតដាក់ប្តី ពីបទហិ.ង្សាដោយចេតនាមានស្ថានទម្ងន់ទោស ប្រឈមជាប់ពន្ធនាគារពី២ ទៅ៥ឆ្នាំ
- ភ្នំពេញ
រាជធានីភ្នំពេញ ៖ សំណុំរឿងស្ត្រីម្នាក់ជាប្រពន្ធចុង បានប្រើអំពើហិង្សាដោយចេតនា ដោយប្រើទឹកអាស៊ីតជះដាក់ប្តី បណ្តាលឲ្យរងរបួសជាទម្ងន់ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្ន ក្រោមការ ចោទប្រកាន់ពីបទ.ហិង្សាដោយចេតនាមានស្ថានទម្ងន់ទោស តាមមាត្រា២១៨ ប្រឈមជាប់ពន្ធនាគារពី២ ឆ្នាំទៅ៥ឆ្នាំ និងពិន័យជាប្រាក់ពី៤លាន ទៅ១០លានរៀល។
ជនសង្ស័យមានឈ្មោះ សុវណ្ណ កែវភាជ ហៅជូឡាយ ភេទស្រី អាយុ៦៤ឆ្នាំ មុខរបរ កោសខ្យល់ចល័ត ស្នាក់នៅបន្ទប់ជួលគ្មានលេខ នៃផ្ទះលេខ៤B ផ្លូវលេខ២៧១ស្ទួន សង្កាត់បឹងសាឡាង ខណ្ឌទួលគោក រាជធានីភ្នំពេញ ។
សូមបញ្ជាក់ថា ស្ត្រីជាប់សង្ស័យខាងលើនេះ ត្រូវបានកម្លាំងសមត្តកិច្ចជំនាញនៃអធិការដ្ឋាននគរបាលខណ្ឌទួលគោក សហការជាមួយនគរបាលព្រហ្មទណ្ឌកម្រិតធ្ងន់រាជធានីភ្នំពេញស្រាវជ្រាវ និងឃាត់ខ្លួនកាលពីថ្ងៃទី២ ខែតុលា ឆ្នាំ២០២៦ វេលាម៉ោងប្រហែល២ និង៣០នាទីរសៀល បន្ទាប់ពីជនសង្ស័យធ្វើសកម្មភាព ដោយប្រើទឹកអាស៊ីតជះលើប្តី បណ្ដាលឲ្យជនរងគ្រោះរងរបួសផ្ទៃមុខ និងដងខ្លួនយ៉ាងធ្ងន់ធ្ងរ ប្រព្រឹត្តនៅចំណុចបន្ទប់ជួលគ្មានលេខនៃផ្ទះលេខ៤B ផ្លូវលេខ២៧១ស្ទួន ក្រុមទី១ ភូមិ១ សង្កាត់បឹងសាឡាង ខណ្ឌទួលគោក កាលពីថ្ងៃទី២ ខែតុលា ឆ្នាំ ២០២៦ ខណៈព្យាយាមរត់គេចខ្លួនបានតែមួយថ្ងៃ ។
ជនរងគ្រោះឈ្មោះ ឡុង ណារ៉េត ភេទប្រុស អាយុ៦៦ឆ្នាំ មុខរបររត់ម៉ូតូឌុប ស្នាក់នៅបន្ទប់ជួលគ្មានលេខនៃផ្ទះលេខ៤B ផ្លូវលេខ២៧១ស្ទួន ក្រុមទី១ ភូមិ១ សង្កាត់បឹងសាឡាង ខណ្ឌទួលគោក ។ ក្រោយឃាត់ខ្លួន ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញតាមនីតិវិធីរហូតដល់រសៀលថ្ងៃទី៧ តុលា ឆ្នាំ២០២៦ ចៅក្រមស៊ើបសួរសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ