រកឃើញជនរងគ្រោះហើយ! ករណីស្រុតខ្សាច់ បា.ក់របង សង្ក.ត់កម្មករម្នាក់ បា.ត់ខ្លួនជាច្រើនម៉ោង នៅបន្ទាយដើមអម្ពិល ខណ្ឌព្រែកព្នៅ
- ភ្នំពេញ
រាជធានីភ្នំពេញ ៖ កម្មករសិប្បកម្ម ផលិតធុងទឹកកកម្នាក់បានលិចបាត់ក្នុងទឹកបឹងតាមោកខណៈពេលដែលថៅកែ ហៅទៅបាញ់ទឹកបង្ហាប់ដីខ្សាច់ហើយស្រុតខ្សាច់បាក់របងសង្កត់ធ្លាក់ចូលទៅក្នុងទឹកអស់ជាច្រើនម៉ោង ត្រូវបានរកសពឃើញហើយ នាវេលាម៉ោង៤និង១៣នាទីរសៀលថ្ងៃទី៨ តុលា ឆ្នាំ២០២៦ នៅតាមផ្លូវលេខ១៥១(ផ្លូវទៅភ្នំបាសិទ្ធ) ក្បែរបន្ទាយដើមអម្ពិល ក្នុងភូមិធំខាងត្បូង សង្កាត់ពញាពន់ ខណ្ឌព្រែកព្នៅ រាជធានីភ្នំពេញ។ គួររំលឹកថា ស្រុតខ្សាច់ បា.ក់របង សង្ក.ត់កម្មករម្នាក់ បា.ត់ខ្លួនជាច្រើនម៉ោង នៅបន្ទាយដើមអម្ពិល ខណ្ឌព្រែកព្នៅ
ជនរងគ្រោះដែលបាត់ខ្លួនឈ្មោះគុំ សុខហេង ភេទប្រុស អាយុ១៨ ឆ្នាំមុខរបរជាកម្មករសិប្បកម្មធ្វើធុងទឹកកនិងជាព្រូរថយន្ត រស់នៅភូមិសំរោងកណ្ដាល សង្កាត់សំរោង ខណ្ឌព្រែកព្នៅ រាជធានីភ្នំពេញ។
តាមព័ត៌មានបានឲ្យដឹងថា នៅមុនពេលកើតហេតុ នៅវេលាម៉ោង១០និង៣០នាទីព្រឹកថ្ងៃទី៨ តុលា ឆ្នាំ២០២៦ ជនរងគ្រោះរួមនឹងកម្មករផ្សេងទៀតចំនួន៦ នាក់ត្រូវបានថៅកែសិប្បកម្មផលិតធុងទឹកកកហៅអោយទៅបាញ់ទឹក បង្ហាប់ទីតាំងឃ្លាំងថ្មី ដែលទើបចាក់ដី ដែលស្ថិតនៅកន្លែងកើតហេតុខាងលើ។
តាមព័ត៌មានឲ្យដឹងទៀតថា នៅព្រឹកនោះកម្មករ៣នាក់បានទៅហូបបាយ នៅសល់តែកម្មករ៣នាក់បានបាញ់ទឹកបង្ហាប់ដីខ្សាច់បង្ហើយ ខណៈនោះស្រាប់តែស្រុតដីបាក់របង១ផ្ទាំង ២ប្រឡោះសសរ បាក់ធ្លាក់ចូលទៅក្នុងបឹងតាមោក បណ្តាលអោយកម្មករ៣នាក់ធ្លាក់ចូលក្នុងទឹក ហើយពីរនាក់បានស្រវាឡើងគោកផុតពីគ្រោះថ្នាក់ នៅសល់តែជនរងគ្រោះម្នាក់បានលិចបាត់ទៅក្នុងបឹង។
បន្ទាប់ពីកើតហេតុបង្កឲ្យមានការភ្ញាក់ផ្អើលដល់ប្រជាពលរដ្ឋនៅក្បែរខាង និងម្ចាស់ឃ្លាំងក៏បាននាំគ្នាជួយរកនិងយករថយន្តស្ទូចមកកាយរកដែរ តែរកពុំឃើញ ព្រមទាំងជួលក្រុមភ្លេងពិណពាទ្យលេងថ្វាយ និងបន់ស្រន់ដល់ម្ចាស់ទឹកម្ចាស់ដី ដើម្បីសុំអោយរកឃើញជនរងគ្រោះ រហូតដល់វេលាម៉ោង៣និង៤០នាទីរសៀលទៅហើយរកពុំទាន់ឃើញនៅឡើយ ។
បើតាមព័ត៌មានចុងក្រោយបានឱ្យដឹងថា នៅវេលាម៉ោង៤និង១៣នាទីរសៀលថ្ងៃដដែលនេះ បានរកឃើញសពជនរងគ្រោះហើយ ៕
ចែករំលែកព័តមាននេះ