មិនធ្លាប់មាន! ត្រីរាជយក្សជាង១០០គីឡូក្រាម២ក្បាល ត្រូវប្រជានេសាទនៅបន្ទាយមានជ័យប្រទះឃើញ និងជួយអភិរក្ស
- បន្ទាយមានជ័យ
ខេត្តបន្ទាយមានជ័យ ៖ លោក ឡុញ វុទ្ធី នាយខណ្ឌរដ្ឋបាលជលផលខេត្តបន្ទាយមានជ័យបានឲ្យដឹងថា នៅខេត្តបន្ទាយមានជ័យ ប្រជានេសាទបានប្រទះឃើញ និងបង់សំណាញ់បានត្រីរាជ (ឬស្តេចត្រី) ចំនួន២ក្បាល ហើយក្នុងនោះ ១ក្បាលៗមានទម្ងន់ជាង១០០គីឡូក្រាម ។ ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នឹងមានការលើកទឹកចិត្ត និងត្រៀមបំពាក់ប័ណ្ណសរសើរជូនដល់ប្រជានេសាទទាំងនោះផងដែរ ។
លោក ឡុញ វុទ្ធី បានបញ្ជាក់ឲ្យដឹងតាមដំណាក់កាលនីមួយៗដូចខាងក្រោម៖
លើកទី១៖ កាលពីថ្ងៃទី០៦ ខែតុលា ឆ្នាំ២០២៦ ស្ថិតនៅចំណុចប្រឡាយដែលមានជម្រៅជាង៣ម៉ែត្រ ស្ថិតក្នុងភូមិបឹងជម្រុក ឃុំទួលពង្រ ស្រុកម៉ាឡៃ ប្រជានេសាទបានព្រួតគ្នាបង់សំណាញ់ជាង១០ និងអូសអួន រហូតចាប់បានត្រីរាជ១ក្បាល ដែលត្រូវប្រើមនុស្សជិត១០នាក់ សែងឡើងគោក។ ត្រីនេះ មានទម្ងន់ជាង១០០គីឡូក្រាម ហើយត្រូវបានអាជ្ញាធរយកទៅអភិរក្សទុកក្នុងស្រុកម៉ាឡៃ ។
លើកទី២៖ នៅថ្ងៃទី០៧ ខែតុលា ឆ្នាំ២០២៦ នៅចំណុចប្រឡាយខាងកើតអាងអូរខៃដន ស្ថិតក្នុងភូមិអូរខៃដន សង្កាត់ផ្សារកណ្តាល ក្រុងប៉ោយប៉ែត ប្រជានេសាទចំនួន៤ ទៅ៥នាក់ បានបង់សំណាញ់ចាប់បានត្រីរាជ១ក្បាលទៀតពីក្នុងប្រឡាយដែលមានជម្រៅជាង២ម៉ែត្រ ។ បន្ទាប់មក ពួកគាត់បានយកត្រីនោះទៅដាក់ចិញ្ចឹមទុកក្នុងស្រះនៅភូមិសូរិយ៉ា សង្កាត់និមិត្ត ក្រុងប៉ោយប៉ែត ។
លោកនាយខណ្ឌបានបញ្ជាក់បន្ថែមថា ត្រីរាជទាំងពីរនាក់/ក្រុមនេះ ត្រូវបានចាប់បាននៅកន្លែងផ្សេងគ្នា ស្ថិតនៅចម្ងាយជាង២៣គីឡូម៉ែត្រពីព្រំដែន (១ក្បាលនៅស្រុកម៉ាឡៃ និង១ក្បាលទៀតនៅក្រុងប៉ោយប៉ែត)។
ចំពោះព្រឹត្តិការណ៍នេះ ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងការកោតសរសើរ និងត្រៀមជូនប័ណ្ណសរសើរដល់អ្នកដែលបានជួយអភិរក្ស ។ ដោយឡែក សម្រាប់ត្រីរាជដែលចាប់បានទីពីរ គឺរៀបចំផែនការធ្វើពិធីលែងចូលក្នុងធម្មជាតិវិញ ក្រោយពេលចប់ពិធីបុណ្យភ្ជុំបិណ្ឌ ៕
ចែករំលែកព័តមាននេះ