បានកើតមកជាមនុស្សមិនគួរប្រព្រឹត្តអំពើទុច្ចរិត ដូចជាសត្វដែលខ្វះបញ្ញានោះទេ គួរប្រព្រឹត្តតែសេចក្តីល្អ អំពើសុចរិតយ៉ាងតិចបំផុតឲ្យបាន៥ប្រការគឺ កុំសម្លាប់ ឬវាយប្រហារគេ, កុំលួចឬឆក់ប្លន់ទ្រព្យគេ, កុំប្រព្រឹត្តខុសក្នុងកូន ប្រពន្ធ ឬប្តីគេ, កុំកុហកបោកប្រាស់គេ និងកុំសេពសុរា គ្រឿងញៀន នាំឱ្យជីវិតស្ថិតក្នុងសភាពអន្ធការ ។
សេចក្តីល្អទាំង៥ប្រការនេះ គឺជាគុណធម៌ដ៏ឧត្តម ឬជាគុណធម៌ដ៏វិសេសរបស់មនុស្ស ឬហៅថា មនុស្សធម៌ក៏បាន តែតាមផ្លូវព្រះធម៌ ហៅថា សីល៥ បាលីថា បញ្ចសីល ។ ដោយអំណាចនៃសីលទាំង៥នេះ ជាធម៌ដែលមនុស្សគ្រប់រូបត្រូវប្រព្រឹត្តជានិច្ច ទើបលោកហៅឈ្មោះមួយទៀតថា និច្ចសីល ។
គុណធម៌ទាំង៥ប្រការនេះស្ថិតក្នុងសន្តានបុគ្គលណាដោយបរិបូណ៌ហើយ បុគ្គលនោះរមែងដល់នូវសេចក្តីស្ងប់ សេចក្តីសុខ និងនាំជីវិតឱ្យអស់ទៅនូវរឿងក្តៅក្រហាយ បន្សាត់បង់ទុក្ខកង្វល់ទាំងពួងទាំងឡាយចេញអំពីជីវិតទៅហោង ។ ដោយសាន សារិន
ចែករំលែកព័តមាននេះ