ខេត្តបន្ទាយមានជ័យ ៖ ក្មេងប្រុសម្នាក់អាយុទើប៣ឆ្នាំជិះគោយន្តកន្ត្រៃដឹកស្រូវយកទៅលក់ជាមួយឪពុកម្តាយក៏បានធ្លាក់ពីលើគោយន្តត្រូវកង់គោយន្តជាន់ចំក្បាលបណ្តាលឱ្យស្លាប់ភ្លាមៗនៅនឹងកន្លែង ។ ហេតុការណ៍នេះបង្កឲ្យមានការភ្ញាក់ផ្អើលឡើងនៅវេលាម៉ោង៥និង២៩នាទីល្ងាច ថ្ងៃទី០២ ខែធ្នូ ឆ្នាំ២០១៩ ស្ថិតនៅគល់ស្អានភូមិអូរ ឃុំផ្គាំ ស្រុកស្វាយចេក ខេត្តបន្ទាយមានជ័យ ។
លោកវរសេនីយ៍ឯក ជា ស្លូញ បានឱ្យដឹងថា ក្មេងប្រុសដែលរងគ្រោះឈ្មោះ ជាម ផានិត អាយុ៣ឆ្នាំ មានឪពុកឈ្មោះ លិយ ឡា អាយុ៣០ឆ្នាំ និងម្តាយឈ្មោះ ភួយ សុភាន អាយុ៣០ឆ្នាំ គ្រួសារនេះមានទីលំនៅ ភូមិថ្មគោល ឃុំផ្គាំ ស្រុកស្វាយចេក ខេត្តបន្ទាយមានជ័យ ក្មេងរងគ្រោះគឺជាកូនទី២ ។
លោកអធិការបានបន្តថា នៅមុនពេលកើតហេតុឪពុកម្តាយក្មេងប្រុសដែលរងគ្រោះបាននាំគ្នាដឹកស្រូវតាមគោយន្តយកទៅលក់ដោយក្មេងរងគ្រោះបានជិះនៅលើការុងស្រូវក្នុងទ្រុងរ៉ឺម៉កគោយន្តនៅខាងក្រោយ ពេលនោះគោយន្តបានបើកធ្លាក់ជង្ហុកក្មេងប្រុសនោះរបូតដៃធ្លាក់ពីលើគោយន្តក៏ត្រូវកង់គោយន្តជាន់ចំក្បាលស្លាប់ភ្លាមៗនៅកន្លែងកើតហេតុ ។ បច្ចុប្បន្នក្មេងរងគ្រោះត្រូវបានឪពុកម្តាយចាត់ចែងធ្វើបុណ្យតាមប្រពៃណីទាំងក្តីអាឡោះអាល័យបំផុត ៕
កែសម្រួលដោយ ៖ សំណាង
ចែករំលែកព័តមាននេះ