ខេត្តកំពង់ឆ្នាំង ៖ កសិករមួយគ្រួសាររស់នៅភូមិចំការ ឃុំស្វាយជ្រុំ ស្រុករលាកស្អៀ បានចាប់មុខរបរចិញ្ចឹមបង្កងដង្កៀបក្រហម ឬអូស្ត្រាលីទទួលបានជោគជ័យដោយបាននិយាយថា ៖ សូមប្រជាពលរដ្ឋមានកុំទុកដីនៅទំនេរឆ្លៀតពេលចិញ្ចឹមបង្កងអូស្ត្រាលីដូចគាត់ ងាយស្រួលក្នុងការចិញ្ចឹមតែលទ្ធផលល្អប្រសើរ…
ខេត្តកំពង់ឆ្នាំង ៖ កសិករមួយគ្រួសាររស់នៅភូមិចំការ ឃុំស្វាយជ្រុំ ស្រុករលាកស្អៀ បានចាប់មុខរបរចិញ្ចឹមបង្កងដង្កៀបក្រហម ឬអូស្ត្រាលីទទួលបានជោគជ័យដោយបាននិយាយថា ៖ សូមប្រជាពលរដ្ឋមានកុំទុកដីនៅទំនេរឆ្លៀតពេលចិញ្ចឹមបង្កងអូស្ត្រាលីដូចគាត់ ងាយស្រួលក្នុងការចិញ្ចឹមតែលទ្ធផលល្អប្រសើរ ។
ជួបជាមួយភ្នាក់ងារកោះសន្តិភាពយើងនៅព្រឹកថ្ងៃទី០២ ខែធ្នូនេះ លោក នង ណារឹទ្ធ ហៅចិត្ត ជាកសិកររស់នៅជិតផ្សារពង្រ ក្នុងភូមិចំការ ឃុំស្វាយជ្រុំ បានឲ្យដឹងថា រយៈពេលត្រឹមតែកន្លះឆ្នាំ គាត់ទទួលបានផលល្អពីការចិញ្ចឹមបង្កងអូស្ត្រាលី គួរជាទីមោទនៈ ។
កសិកររូបនោះបានបញ្ជាក់ ពីបច្ចេកទេសនៃការចិញ្ចឹមដោយត្រួសៗថា ៖ បើបងប្អូនមានដីទំនេរ ហើយមិនចង់ចំណាយដើមទន់ច្រើនបងប្អូនអាចចិញ្ចឹមក្នុងស្រះក៏បាន ។ តែបើចង់ងាយស្រួលជាងនេះអាចចិញ្ចឹមក្នុងអាងក៏បាន ឬចិញ្ចឹមក្នុងលូក៏បានដែរដូចរូបគាត់បច្ចុប្បន្នមានទាំងក្នុងស្រះផង ក្នុងអាងផង និងក្នុងលូក៏មានដែរ ។ ពិធីចិញ្ចឹម គឺងាយបំផុតលក្ខខណ្ឌសំខាន់ជាងគេ គឺកម្រិតប៉េហាស់ទឹក និងអុកស៊ីស្ហែនជាជំនួយ ។ បើសិនអាចដាំស្រូវក្នុងអាងក៏ជាការល្អដែរ ព្រោះស្រូវបានបញ្ចេញអុកស៊ីសែនឲ្យទៅសត្វបង្កង ។
លោកបានបញ្ជាក់ថា ពូជបង្កងអូស្ត្រាលី ឬបង្កងដង្កៀបក្រហមមិនធំប៉ុន្មានទេ សម្រាប់ពូជយកទៅចិញ្ជឹមដែលមានអាយុជាង៣ខែក្នុងចំនួនជាង២០ក្បាលទើបបាន១គីឡូក្រាមមានតម្លៃ៣០ដុល្លា ។ ចំណែកបង្កងសម្រាប់យកទៅបរិភោគមានអាយុជាង៥ខែចំនួនជាង១០ក្បាលទម្ងន់១គីឡូក្រាម ក្នុង១គីឡូថ្លៃ៣៥ដុល្លារ ។
កសិកររូបនោះបានបញ្ជាក់ថា ៖ បង្កងប្រភេទនេះមិនពិបាកចិញ្ចឹមទេ ព្រោះវាដើរនៅបាតដីហើយចំណីរបស់វាងាយបំផុត គឺផ្លែឈើទុំដូចជា ផ្លែចេកទុំជាដើម ។ ប៉ុន្តែអ្វីដែលត្រូវការពារ គឺ ត្រូវធ្វើរបងឲ្យជិតការពារសត្វក្តាម សត្វកង្កែប អន្ទុង ពិសេសសត្វគីង្គក់ ។
ចុងក្រោយគាត់អំពាវនាវដល់ប្រជាពលរដ្ឋ បើមានពេលទំនេរមានដីទំនេរឆ្លៀតឱកាសដាក់ចិញ្ចឹមបង្កងក្នុងគ្រួសារក៏ជាការល្អដែរ ព្រោះការចិញ្ចឹម គឺងាយស្រួលបំផុត ម្យ៉ាងវិញទៀតមិនសូវរវល់នឹងវាប៉ុន្មានទេ យើងអាចធ្វើការងារផ្សេងនៅខាងក្រៅបានគ្រប់ពេលវេលាដោយគ្រាន់តែឆ្លៀតឱកាសមើលថែវាពេលវាពងត្រូវចាប់ផ្ដើមបំបែកដាក់ទៅក្នុងកន្ត្រកមួយកន្លែង ដើម្បីឲ្យវាកើតកូនរួចយកមេមកបង្កាត់ពូជសាជាថ្មីតែប៉ុណ្ណោះ ។
សូមបញ្ជាក់ថា កសិកររូបនោះបានទៅរៀនពីអ្នកចិញ្ចឹមបង្កងនៅខេត្តបាត់ដំបងតាមរយៈបានមើលតាមបណ្ដាញសង្គម ។ លុះពេលចេះក៏មកដកបទពិសោធន៍ចិញ្ចឹមនៅផ្ទះទទួលជោគជ័យក៏ចង់ឲ្យប្រជាពលរដ្ឋឆ្លៀតពេលទំនេរចិញ្ចឹមតាមគាត់ គាត់សន្យានឹងបង្ហាត់បង្រៀនដោយឥតគិតថ្លៃ ៕ កែសម្រួលដោយ ៖ សុឃាក់
ចែករំលែកព័តមាននេះ