ខេត្តព្រះសីហនុ ៖ បើតាមសមត្ថកិច្ចនគរបាលប៉ុស្តិ៍រដ្ឋបាលសង្កាត់លេខ៤ ក្រុងព្រះសីហនុ បានឲ្យដឹងថា មានការភ្ញាក់ផ្អើលមួយ បន្ទាប់ពីឃើញមានអណ្តាតភ្លើងបានឆាបឆេះរថយន្ត Lexus 470 មួយគ្រឿង បណ្តាលរងការខូចខាតទាំងស្រុង បង្កឱ្យមានភ្ញាក់ផ្អើលកាលពី ម៉ោង៩យប់ ថ្ងៃទី២៩ ខែវិច្ឆិកា ឆ្នាំ២០១៩ ស្ថិតនៅក្នុងបុរីលំហែកាយ (BS) ក្នុងភូមិ៥ សង្កាត់លេខ៤ ក្រុង-ខេត្តព្រះសីហនុ ។
ប្រភពខាងលើបានបញ្ជាក់ឲ្យដឹងថា រថយន្តដែលអគ្គិភ័យឆាបឆេះខូចខាតទាំងស្រុងជាកម្មសិទ្ធិរបស់ជនជាតិចិនដែលស្នាក់នៅបុរីខាងលើនេះ ។
ហើយបើតាមការបង្ហើបឲ្យដឹងពីម្ចាស់រថយន្តថា រថយន្តខាងលើនេះ រូបគាត់ចតទុកចោល ខានប្រើប្រាស់ជាច្រើនថ្ងៃមកហើយ ។ តាមការសន្និដ្ឋានរបស់ម្ចាស់រថយន្តថា មូលហេតុនៃការឆាបឆេះនេះ អាចបណ្តាលមកពីឆ្លងចរន្តភ្លើងចេញពីក្បាលអាគុយ។
នៅពេលកើតហេតុនោះ បានប្រជាពលរដ្ឋដែលមានលំនៅឋានក្បែរគ្នា និងកម្លាំងប្រជាការពារនគរបាលប៉ុស្តិ៍រដ្ឋបាលមូលដ្ឋានខាងលើ ជួយអន្តរាគមន៍យកទុយោទឹកបាញ់ទឹកពន្លត់ តែមិនអាចជួយទប់ស្កាត់បាននោះទេ ដោយសារតែការឆាបឆេះសាំងនៅក្នុងរថយន្តលឿនពេក ធ្វើឲ្យរថយន្តរងការខូចខាតទាំងស្រុង ប៉ុន្តែមិនឆេះឆ្លងរាលដាលដល់លំនៅឋានប្រជាពលរដ្ឋជិតខាង ឬរងគ្រោះថ្នាក់ដល់អាយុជីវិតមនុស្សទេ។ (កែសម្រួលដោយ ៖ បុប្ផា)
ចែករំលែកព័តមាននេះ