អាសូរ​! លោកយាយ​ពិការ​ជើង​ដើរ​មិន​រួច ថែម​ទាំង​ធ្លាក់​ពីលើ​ផ្ទះ រង់​ចាំតែ​ក្តី​ស្លាប់


ខេត្តកំពង់ចាម ៖ លោកយាយ​ពិការ​ជើង​សង្ខាង​ជា​ទុរគត​ជន​ម្នាក់ បាន​ឈឺ​កាន់តែ​ដុនដាប​ទៅ​ៗ ដោយសារ​តែ​ធ្លាក់​ពីលើ​ផ្ទះ​កម្ពស់​ប្រហែល​3​ម៉ែត្រ ហើយ​ដេក​តែ​នៅ​លើ​រនាប​ផ្ទះ រង់​ចាំតែ​សេចក្តីស្លាប់​ប៉ុណ្ណោះ​។

លោកយាយ​ពិការ​កំសត់​ខាងលើ​នេះ ឈ្មោះ សួន សុខ​ខេន អាយុ​73 ឆ្នាំ រស់នៅ​ភូមិ​ស្វាយ​ជ្រុំ ឃុំ​កោះមិត្ត ស្រុក​កំពង់សៀម ខេត្តកំពង់ចាម​។

បើ​តាម​អ៊ំ​ស្រី​ឈ្មោះ សួន ឡុ​ង អាយុ​64​ឆ្នាំ ត្រូវជា​ប្អូនបង្កើត​បាន​ប្រាប់​ឲ្យ​ដឹង​នៅ​ព្រឹក​ថ្ងៃ​ទី​12 វិច្ឆិកា ឆ្នាំ​2019​នេះ​ថា កាលពី​យប់​ថ្ងៃ​ទី​10 វិច្ឆិកា​កន្លង​ទៅ ពេល​ដែល​បងស្រី​របស់​គាត់​សម្រាក​នៅ​លើ​ផ្ទះ​ឈើ ដែល​មាន​សភាព​ចាស់​តែ​ម្នាក់ឯង លុះ​នៅ​យប់​ក៏​ស្រាប់តែ​ឮ​សំឡេង​មនុស្ស​ធ្លាក់​ហើយ​រូប​គាត់ និង​កូនចៅ​បាន​នាំ​គ្នា​ទៅ​មើល ក៏​ឃើញ​បងស្រី​ដេក​នៅ​លើ​ដី​ស្រែកថ្ងូរ​ឱ្យ​គេ​ជួយ​។

អ៊ុំ​ស្រី​សួន ឡុ​ង ប្រាប់​បន្ត​ថា ក្នុង​ពេល​នោះ​ក៏​មាន​អ្នក​ជិតខាង​បាន​នាំ​គ្នា​មុខ​ជួយ​សែង​បងស្រី​គាត់​ដាក់​នៅ​លើ​ផ្ទះ​ឈើ​វិញ ដោយ​មាន​អាកា​រៈ​ឈឺ​ចុកចាប់​លើ​រាង​កាយ ហើយនឹង​ជើង​ទាំង​សងខាង​ដែល​ពិការ​ស្រាប់​។ លុះ​ពេល​ព្រឹក​ឡើង​បាន​ហៅ​គ្រូខ្មែរ​មក​ជួយ​ស្តោះផ្លុំ​ជើង​ដែល​ហើម​នោះ មក​ដល់​ថ្ងៃ​ទី​12 វិច្ឆិកា បងស្រី​របស់​គាត់​បាន​តែ​ដេក​នៅ​លើ​រនាប​ផ្ទះ ដោយ​មិន​អាច​ប្រែខ្លួន​បាន សូ​ម្បី​តែ​រំកិល​ទៅ​ណា​មក​ណា​ក៏​មិនកើត​ដែរ​។ ដំបូង​គាត់​គិត​ថា នឹង​នាំ​បងស្រី​ទៅ​រក​គ្រូខ្មែរ​ឬ​ក៏​គ្រូពេទ្យ ដើម្បី​ព្យាបាល​ជំងឺ ប៉ុន្តែ​គាត់​មាន​ជីវភាព​ក្រីក្ររ​ស់ពឹង​ទៅ​លើ​កូន​ជា​អ្នក​ទំនុកបម្រុង ហើយ​ប្រសិនបើ​យក​បងស្រី​ទៅ​ព្យាបាល មិនដឹង​ជា​ទៅ​រក​លុយ​ឯណា​ឲ្យ​គេ​នោះ​ទេ​។

អ៊ុំ​ស្រី​ខាងលើ​បន្ត​ថា មាន​តែ​ផ្លូវ​មួយ គឺ​សុខចិត្ត​បណ្ដោយ​ឱ្យ​បងរ​ស់ទាំង​ការ​លំបាក និង​រង់​ចាំតែ​ក្តី​ស្លាប់​ប៉ុណ្ណោះ​។ ហើយ​ពេល​ដែល​បងស្រី​ត្រូវការ​ពិសា​បាយ​ទាល់ គឺ​គាត់​ត្រូវ​ដួស​បាយ​បញ្ចុក​ទើប​ពិសារ​កើត ។

អ៊ុំ​ស្រី​ខាងលើ​បន្ត​ទៀត​ថា រំលឹក​ដល់​អតីតកាល​ក្នុង​ពេល​ដែល​បងស្រី​រៀប​ការ​ដំបូង​ក្នុង​វ័យ​25 ឆ្នាំ កាលពី​ជំនាន់​សម័យ​សង្គមរាស្ត្រនិយម បន្ទាប់​ពី​រៀប​ការ​បាន​មួយ​ខែ​បងស្រី​ក៏​ធ្លាក់ខ្លួន​ឈឺ​ដោយ​មើល​មិនជា ហើយ​ប្ដី​ក៏​លែងលះ​គ្នា​ទៀត និង​ក្លាយទៅជា​ស្ត្រី​មេម៉ាយ​មក​ដល់​សព្វថ្ងៃ​។​មាន​ពេល​មួយ​នោះ​ក្មេង​ៗ​បាន​នាំ​គ្នា​កាយ​ដី ក៏​ប្រទះ​ឃើញ​ដុំ​ក្រមួន​ពីរ​ដុំ​ដែល​គេ​សរសេរ​ឈ្មោះ​បងស្រី​គាត់ និង​បងថ្លៃ ដោយ​ចង​បែរខ្នង​ដាក់​គ្នា ហើយ​ពេល​យក​ដុំ​ក្រមួន​នោះ​ទៅ​សួរនាំ​ចាស់​ៗ​ត្រូវ​បាន​គេ​ប្រាប់​ថា មាន​គេ​ធ្វើអំពើ​។ ម្ដាយ​ឪពុក​បាន​ទៅ​រក​គ្រូខ្មែរ​ដើម្បី​ព្យាបាល​ដោះ​មន្តអាគម​ឱ្យ​បងស្រី​ជា ប៉ុន្តែ​ជំងឺ​មិន​បានជា 100% មក​ទេ​។

ប្រភព​ដដែល​ប្ត​ថា ចាប់តាំងពី​ក្រោយ​ឆ្នាំ​1979 បងស្រី​គាត់​បាន​ព្យាយាម​ទិញ​ប៉េងប៉ោះ និង​ត្រប់ ដើរ​លក់​នៅ​ក្នុងភូមិ និង​ក្រៅ​ភូមិ​ដោយ​មិន​ចេះ​ជិះ​កង់​នោះ​ទេ ដើម្បី​យក​លុយ​ដោះស្រាយ​ជីវភាព​តែ​ម្នាក់ឯង លុះ​មក​ដល់​បច្ចុប្បន្ន​បងស្រី​ចូល​ដល់​វ័យ​71​ឆ្នាំ​ក​ធ្លាក់ខ្លួន​ពិការ ដោយ​ជើង​ទាំង​សងខាង​ដើរ​មិន​រួច ហើយ​ក៏​បានឱ្យ​រស់នៅ​ក្នុង​រោង​តូច​មួយ​ប្រក់​ស័ង្កសី​នៅ​ផ្ទាល់​ដី​។ ក្នុង​រដូវវស្សា​ទឹក​ឡើង​មក​លិច​រោង ទើប​គាត់​យក​មក​ដាក់​ឱ្យ​នៅ​លើ​ផ្ទះ​របស់​បងស្រី ស្ថិត​នៅ​ក្បែរ​នោះ​ជួន​មាន​ពេល​ខ្លះ​ត្រូវ​បាន​ព្រះសង្ឃ​នៅ​តាម​វត្ត​អារាម​មួយ​ចំនួន និមន្ត​តាម​ទូក ដោយ​យក​អង្ករ មី ប្រេងឆា មក​ជូន​ដោយ​ក្តី​អាណិតអាសូរ។

អ៊ំ​ស្រី​សួន ឡុ​ង បាន​បញ្ជាក់​ថា គាត់​ពិតជា​ខ្លោចចិត្ត​អាណិត​ដល់​បងស្រី​របស់​គាត់​ជា​ខ្លាំង​ដោយ​ចង់​យក​ទៅ​ព្យាបាល​នៅ​មន្ទីរពេទ្យ ឬ​ក៏​គ្រូខ្មែរ តែ​ដោយសារ​តែ​មាន​ជីវភាព​ខ្វះខាត​គាត់​បាន​ត្រឹមតែ​មានគំនិត​ប៉ុណ្ណោះ ដោយ​មិន​មាន​លទ្ធភាព​នោះ​ទេ​។ ហើយ​ប្រសិនបើ​មាន​សប្បុរសជន​ដែល​មាន​ក្តី​មេត្តាករុណា​ប្រណី​សណ្តោស​ជួយ​ដល់​បង​របស់​គាត់​នោះ គាត់​ពិតជា​មាន​ក្តី​សប្បាយ​រីករាយ​។ ហើយ​ស្ថានភាព​អ​កា​រៈបង​ស្រី​គាត់​បាន​តែ​ដេក គឺ​មិន​អាច​ក្រោក​អង្គុយ​បាន សូ​ម្បី​តែ​ចាប់​ផ្អៀង​រាង​កាយ​បែរ​ពី​ម្ខាង​ទៅ​ម្ខាង​ក៏​មិនកើត​ទៀត ពេល​ដែល​ចាប់​ផ្អៀង​ម្ដង​ៗ​បងស្រី​របស់​គាត់​បាន​ដកដង្ហើម​មាន​សភាព​យ៉ាប់​យឺន​ស្ទើរតែ​ដាច់ខ្យល់​ស្លាប់​ក៏​មាន គឺ​បាន​ត្រឹម​សម្រក់​ទឹកភ្នែក​អាណិត​បង​តែ​ប៉ុណ្ណោះ​។

សូម​បញ្ជាក់​ថា កាលពី​ពេល​ដែល​បងស្រី​មិន​ទាន់​ធ្លាក់​ពីលើ​ផ្ទះ មាន​ពេល​មួយ​នោះ​គាត់​បាន​រំកិល​ខ្លួន​ចុះ​តាម​ជណ្ដើរ​ផ្ទះ​ខាង​មុខ ដោយ​ប្រឹង​រំកិល​គូទ​បន្តិច​ម្ដង​បន្តិច​ម្ដង​រហូត​ដល់​ទៅ​ចម្ងាយ​ប្រមាណ​ជា 50 ម៉ែត្រ ពេល​ដែល​មាន​អារម្មណ៍​រវើរវាយ​ពេល​សួរនាំ​គាត់​ឆ្លើយ​ថា ទៅ​ទារ​លុយ​គេ​ជំពាក់​។

បើ​តាម​លោក​វ៉ែន នាង មេឃុំ​កោះមិត្ត មាន​ប្រសាសន៍​ឲ្យ​ដឹង​នៅ​រសៀល​ថ្ងៃ​ទី 12 វិច្ឆិកា 2019 ថា តាម​ការ​ពិនិត្យ​ដោយ​មាន​អាជ្ញាធរ​មូលដ្ឋាន​ឃើញ​ថា ស្ថានភាព​របស់​លោកយាយ​សួន ខេន គឺជា​ស្ត្រី​មេម៉ាយ​ដែល​មាន​ជីវភាព​ក្រីក្រ​រស់នៅ​តែ​ម្នាក់ឯង​ក្នុងភូមិ​ស្វាយ​ជ្រុំ ពិតប្រាកដ​មែន​។ ជាមួយ​គ្នា​នោះ​លោក នឹង​ស្នើ​ឲ្យ​សាច់ញាតិ​របស់​លោកយាយ​ជួយ​រាយការណ៍​បន្ត​មក​រូប​លោក ដើម្បី​ស្នើ​សុំ​ជំនួយ​ពី​កាកបាទក្រហម​ខេត្ត សម្រាប់​យក​មក​ដោះស្រាយ​ជីវភាព​គ្រួសារ​ត្បិត​អំណោយ​មិន​បាន​ច្រើន​ក៏​ពិតមែន ក៏​ប៉ុន្តែ​វា​បាន​ជួយ​រំលែក និង​ការ​ដោះស្រាយ​នូវ​ការ​លំបាក​បាន​មួយ​កម្រិត​ផង​ដែរ​៕ (​កែសម្រួល​ដោយ ៖ បុប្ផ​)

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ