ខ្លាំងបាត់! ស្ត្រីម្នាក់ចេញពីភ្នំពេញទៅសៀមរាប ដើរលេងផង ឆ្លៀតឱកាសផង

ថ្ងៃទី ១២ ខែ វិច្ឆិកា ឆ្នាំ ២០១៩
ម៉ោង ១៤:៤៣
ច័ន្ទ រស្មី

ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា ស្ត្រីជាជនសង្ស័យម្នាក់ បានជិះរថយន្តក្រុងចេញក្រុងភ្នំពេញ មកលេងខេត្តសៀមរាប ហើយឆ្លៀតឱកាសធ្វើសកម្មភាពរ៉ូតកាបូបស្ពាយរបស់ស្ដ្រីរងគ្រោះម្នាក់ តែមិនបានសម្រេច ក៏ត្រូវសមត្ថកិច្ចឃើញទាន់ ក៏ចាប់ខ្លួនបានតែម្តង បង្កឱ្យមានការភ្ញាក់ផ្អើលកាលពី៧និង៤០នាទីយប់ ថ្ងៃទី១០ ខែវិច្ឆិកា ឆ្នាំ២០១៩ ក្នុងពិធីបុណ្យអុំទូក បណ្តែតប្រទីព និងសំពះព្រះខែ អកអំបុក ស្ថិតនៅខេត្តសៀមរាប ។

សេចក្តីរាយការណ៍បន្តថា ជនសង្ស័យខាងលើនេះឈ្មោះ គង់ ស្រីយ៉ា ភេទស្រី អាយុ៣០ឆ្នាំ រស់នៅទីលំនៅភូមិបឹងកក់ សង្កាត់ស្រះចក ខណ្ឌដូនពេញ ក្រុងភ្នំពេញ ។

តាមការបញ្ជាក់ពីលោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្ត បានឲ្យដឹងនៅម៉ោង១០និង៣៥នាទីព្រឹក ថ្ងៃទី១៣ វិច្ឆិកានេះថា ស្ត្រីម្នាក់ដែលលូកហោប៉ៅភ្ញៀវនៅទីប្រជុំនៃពិធីបុណ្យអុំទូក សំពះព្រះខែ អកអំបុកនោះ ត្រូវបានកម្លាំងជំនាញយើងកំពុងដើរល្បាតតាមដងស្ទឹង ខណៈដែលជនសង្ស័យនេះជិះឡានក្រុងចេញមកពីភ្នំពេញ មកដល់ខេត្តសៀមរាប ក្នុងគោលបំណងមកលេងបុណ្យអុំទូក និងធ្វើសកម្មភាពលូកហោរប៉ៅនៅកន្លែងអុំទូកតាមដងស្ទឹងសៀមរាប ហើយត្រូវកម្លាំងសមត្ថកិច្ចឃាត់ខ្លួនបានតែម្តង ខណៈកំពុងធ្វើសកម្មភាព ។

លោកបានបញ្ជាក់ថា មុនពេលកើតហេតុ ជនសង្ស័យរូបនេះបានជិះរថយន្ដក្រុងចេញពីក្រុងភ្នំពេញកាលពីម៉ោង៤ទៀបភ្លឺថ្ងៃទី១០ វិច្ឆិកា លុះមកកាន់ខេត្តសៀមរាប នៅម៉ោង៦ល្ងាចថ្ងៃដដែល ហើយស្ត្រីរូបនេះដើរចូលទៅក្នុងកន្លែងតាំងពិព័ររណ៍នៅសួនច្បារមុខព្រះអង្គចេកព្រះអង្គចម ។ លុះដល់ម៉ោង៧និង៤០នាទីយប់ ស្ត្រីជាជនសង្ស័យរូបនេះបានធ្វើសកម្មភាពរ៉ូតកាបូបស្ពាយរបស់ស្ដ្រីរងគ្រោះម្នាក់តែមិនបានសម្រេច ក៏ត្រូវកម្លាំងនគរបាលជំនាញឃើញទាន់ធ្វើការឃាត់ខ្លួន ហើយក៏នាំខ្លួនយកមកសាកសួរនៅការិយាល័យជំនាញ។

ក្រោយពីធ្វើការសាកសួរ ស្ត្រីជាជនសង្ស័យរូបនេះបានឆ្លើយសារភាពថា ខ្លួនពិតជាធ្វើសកម្មភាពដូចដែលបានរៀបរាប់ខាងលើពិតប្រាកដមែន ។ បច្ចុប្បន្ននេះ កម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្តសៀមរាប កំពុងរៀបចំសំណុំរឿង បញ្ជូនខ្លួនជនសង្ស័យខាងលើទៅតុលាការ ដើម្បីចាត់ការបន្តតាមផ្លូវច្បាប់៕ (កែសម្រួលដោយ ៖ បុប្ផា)