ហ្វូងកុករាប់ម៉ឺនក្បាលហើរចូលទ្រនំនៅជើងភ្នំ ផ្អើលពលរដ្ឋឈរមើល

ថ្ងៃទី ១២ ខែ វិច្ឆិកា ឆ្នាំ ២០១៩

ម៉ោង ០៩:០៨

ខេត្តបន្ទាយមានជ័យ ៖ ប្រជាពលរដ្ឋរាប់រយនាក់បានផ្អើលនាំគ្នាទៅមើលឈរមើលផង ថតរូបផង ខណៈដែលហ្វូងកុករាប់ម៉ឺនក្បាល ហើរចូលទ្រនំពេលល្ងាចថ្ងៃរាបលិច នៅជើងភ្នំបន្ទាយនាង ជាក់ស្តែងនៅថ្ងៃទី១១ ខែវិច្ឆិកា ឆ្នាំ២០១៩នេះ ស្ថិតក្នុងភូមិភ្នំឃុំបន្ទាយនាង ស្រុកមង្គលបូរី។

បើតាមប្រជាពលរដ្ឋដែលទៅមើលហ្វូងកុកបានប្រាប់ថា ហ្វូងសត្វស្លាបដែលជាប្រភេទសត្វកុក សត្វក្អែកទឹក គឺមានរាប់ម៉ឺនក្បាល ដែលមកស្នាក់នៅលើដើមឈើក្នុងចំការមួយកន្លែងក្បែរជើងភ្នំបន្ទាយនាង។ ហើយរយៈពេល១សប្តាហ៍នេះ មានប្រជាពលរដ្ឋបាននាំគ្នាមកមើល១ថ្ងៃរាប់រយនាក់ ពេលដែលសត្វស្លាបទាំងនោះហើរចូលទ្រនំ។

ប្រជាពលរដ្ឋបានបញ្ជាក់ថា ហ្វូងសត្វស្លាបដែលស្នាក់ទៅដើមឈើនេះ មានរយៈពេលជិត៥ខែមកហើយ កាលពីមុនប្រជាពលរដ្ឋមិនបានដឹង និងមកមើលនោះទេ តែរយៈពេលជាង១សប្តាហ៍នេះ ប្រជាពលរដ្ឋបានមកមើលជាច្រើន រហូតរកកន្លែងឈរមើល និងចតរថយន្ត ម៉ូតូគ្មានផង ហើយដែលដើមឈើដែលសត្វស្លាបចូលទ្រនំនេះ គឺចាប់ពីម៉ោង៥និង៣០នាទីល្ងាចដល់៦និង៣០នាទីល្ងាចចូលទ្រនំអស់ តែលឺសំលេងយំខ្ញៀវខ្ញារ។

ប្រជាពលរដ្ឋបានសំណូមពរសុំឱ្យអាជ្ញាធរ និងមន្ត្រីជំនាញត្រូវការពាររក្សាហ្វូងសត្វស្លាបនេះឱ្យបាន ដើម្បីទុកជាកន្លែងទាក់ទាញភ្ញៀវជាតិ និងអន្តរជាតិមកកំសាន្តនៅល្ងាចថ្ងៃលិច មើលហ្វូងសត្វស្លាបហើរចូលទ្រនំ និងយំគួរឱ្យគយគន់ ហើយអាចក្លាយជាតំបន់ទេស។

ហើយប្រជាពលរដ្ឋនៅតំបន់នេះ អាចមានមុខរបរលក់ដូរជូនភ្ញៀវដែលមកមើលហ្វូងសត្វស្លាប ហើយអាចដោះស្រាយជីវិភាពសម្រាប់គ្រួសារ ហើយសុំឱ្យចូលរួមថែរក្សាសត្វស្លាបទាំងនេះ ដើម្បីរស់បានយូរទាក់ទាញភ្ញៀវបានមកកំសាន្ត៕ (កែសម្រួលដោយ ៖ បុប្ផា)