តាមប្រភពព័ត៌មាន Soccer Laduma បានឱ្យដឹងថា ខណៈដែលមានកីឡាករល្បីឈ្មោះមួយចំនួនបានផ្លាស់ទៅលេងនៅលីគអាមេរិក Major League Soccer ក្នុងរយៈពេលប៉ុន្មានឆ្នាំចុងក្រោយនេះ Luis…
តាមប្រភពព័ត៌មាន Soccer Laduma បានឱ្យដឹងថា ខណៈដែលមានកីឡាករល្បីឈ្មោះមួយចំនួនបានផ្លាស់ទៅលេងនៅលីគអាមេរិក Major League Soccer ក្នុងរយៈពេលប៉ុន្មានឆ្នាំចុងក្រោយនេះ Luis Suarez ត្រូវបានគេអះអាងថា ចង់មកលេងនៅលីគអាមេរិកនេះដែរ។
កុងត្រារបស់ Suarez ជាមួយ Barcelona នឹងផុតកំណត់នៅឆ្នាំ២០២១ ខណៈដែលក្លិបនេះកំពុងតែសម្លឹងមើលអ្នកមកជំនួស។ Nico Lodeiro ខ្សែប្រយុទ្ធរបស់ក្លិបអាមេរិក Seattle Sounders គឺជាមិត្តល្អរបស់ Suarez បន្ទាប់ពីបានលេងជាមួយគ្នានៅ Barcelona មុនពេលមកកាន់ក្លិបបច្ចុប្បន្ន។
Lodeiro បានបង្ហើបថា Suarez តែងតែសួរគាត់ពីលីគអាមេរិករហូត។ គាត់បានប្រាប់វេបសាយ MLSsoccer.com ថា៖ «ខ្ញុំគិតថា អ្នកត្រូវតែបញ្ចុះបញ្ចូល Suarez។ គេចង់មកលេងនៅលីគ MLS។ គេតែងតែសួរខ្ញុំពីលីគនេះ»។
អតីតមិត្តរួមក្រុមរបស់ Suarez រូបនេះបានបន្តថា ៖ «ក្តីសុបិនរបស់គាត់ គឺចង់លេងឱ្យ Barcelona។ គាត់លេងនៅកម្រិតអស្ចារ្យ ហើយគាត់មានអារម្មណ៍ល្អនៅទីនោះ។ មិនយូរមិនឆាប់គាត់នឹងមក MLS ។ យើងសង្ឃឹមថា គាត់ចូលចិត្តលីករបស់យើង។ គាត់តែងតែសួរខ្ញុំអំពីរឿងនេះ។ សង្ឃឹមថា គាត់ក៏អាចលេងឱ្យ Seattle Sounders ផងដែរ»។
Lodeiro លើកឡើងថា វាអាស្រ័យទៅលើពេលវេលាតែប៉ុណ្ណោះ សម្រាប់ការមកលេងនៅ MLS របស់ Suarez នៅថ្ងៃអនាគត ដែលយើងគ្រប់គ្នាមានតែចាំមើលទាំងអស់គ្នាថា តើគេនឹងចាកចេញពីអេស្ប៉ាញមកកាន់អាមេរិកដែរឬអត់? (កែសម្រួលដោយ ៖ បុប្ផា)
ចែករំលែកព័តមាននេះ