កីឡាករម្នាក់កំពុងជិះម៉ូតូឌុបមិត្តស្រី ត្រូវគេកាប់ប្រហារយ៉ាងសាហាវ

ថ្ងៃទី ១១ ខែ វិច្ឆិកា ឆ្នាំ ២០១៩
ម៉ោង ១៤:០០
វ៉ាន់ ប៊ុនធឿន

ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា កីឡាករម្នាក់កំពុងជិះម៉ូតូឌុបមិត្តស្រីដើរលេងតាមដងផ្លូវនៃទន្លេវ៉ៃគោ ស្រាប់តែត្រូវជនសង្ស័យ២នាក់ជិះមកកាប់ពីក្រោយ១ដាវសាំម៉ូរ៉ៃចំ.ក បន្ទាប់មកជនរងគ្រោះក៏ជិះម៉ូតូដេញតាមជនសង្ស័យបានប្រមាណជា៧០០ម៉ែត្រ ក៏ហូរឈាមស្រោចពេញខ្លួន ជនរងគ្រោះក៏ឈប់ម៉ូតូ រួចក៏ចុះពីលើម៉ូតូស្រាប់តែដួលសន្លប់តែម្តង ។ ករណីដ៏រន្ធត់នេះបានកើតឡើងនៅម៉ោង៦និង៤០នាទីល្ងាច ថ្ងៃទី១០ វិច្ឆិកា ២០១៩ ត្រង់ចំណុចខាងលិចស្ពានគយត្របែក ស្ថិតក្នុងភូមិរោងបន្លែ សង្កាត់ស្វាយរៀង។

សមត្ថកិច្ចបានឲ្យដឹងថា ករណីហិង្សាដោយចេតនានេះបង្កឡើងដោយជនសង្ស័យឈ្មោះ ប្រាក់ សុភារាជ ហៅពៅ ភេទប្រុស អាយុ១៩ឆ្នាំ មុខរបរជាសិស្ស មានទីលំនៅភូមិមេភ្លើង សង្កាត់ស្វាយរៀង ក្រុងស្វាយរៀង បានរត់គេចខ្លួនបាត់ ក្រោយពីធ្វើសកម្មភាពកាប់ទៅលើជនរងគ្រោះ និងជនសង្ស័យម្នាក់ទៀតឈ្មោះ អេង វាចាអក្ខរ៉ា ភេទប្រុស អាយុ១៦ឆ្នាំ ជាសិស្ស មានទីលំនៅភូមិកៀនសាំង សង្កាត់ស្វាយរៀង ក្រុងស្វាយរៀង។ ចំណែកជនរងគ្រោះឈ្មោះ វ៉ា វិសាល ភេទប្រុស អាយុ១៩ឆ្នាំ មុខរបរជានិស្សិត និងជាកីឡាករខេត្តស្វាយរៀង មានទីលំនៅភូមិវាលយន្ត សង្កាត់ស្វាយរៀង ក្រុងស្វាយរៀង ។

សមត្ថកិច្ចបានឱ្យដឹងទៀតថា មុនពេលកើតហេតុ ជនសង្ស័យទាំង២នាក់ បានជិះម៉ូតូ១គ្រឿងម៉ាកឌូក ដោយមានដាវសាំម៉ូរ៉ៃ លុះជិះមកដល់ចំណុចកើតហេតុខាងលើ ជនសង្ស័យក៏បានយកដាវសាំម៉ូរ៉ៃមកកាប់ទៅលើជនរងគ្រោះចំ.កពីក្រោយ។ ដំបូងឡើយជនរងគ្រោះមិនបញ្ហាអ្វីឡើយ ហើយជនរងគ្រោះក៏ជិះតាមជនសង្ស័យបានប្រមាណជា៧០០ម៉ែត្រ ជនរងគ្រោះក៏ហូរឈាមស្រោចពេញខ្លួនប្រាណ ក្រោយមកជនរងគ្រោះក៏ឈប់ម៉ូតូ រួចក៏ចុះពីលើម៉ូតូស្រាប់តែដួលសន្លប់ឈឹងតែម្តង ។

ប្រភពដដែលបន្តថា ក្រោយពេលកើតហេតុ ជនរងគ្រោះក៏ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យខេត្ត ក៏ប៉ុន្តែគ្រូពេទ្យមិនអាចជួយសង្គ្រោះបានទេ ដោយសារជនរងគ្រោះបានហូរឈាមសោះអស់ពីខ្លួនទៅហើយ ហើយបានស្លាប់បាត់បង់ជីវិតយ៉ាងអាណោចអធ័ម។

ប្រភពដដែលបន្តទៀតថា បន្ទាប់ពីសមត្ថកិច្ចសាកសួរមិត្តស្រីជនរងគ្រោះ សមត្ថកិច្ចបានតាមចាប់ខ្លួនបក្សពួកជនសង្ស័យបានម្នាក់ឈ្មោះ អេង វាចាអក្ខរា បញ្ជូនទៅអធិការនគបាលក្រុងស្វាយរៀង ដើម្បីសាកសួរ និងតាមរកចាប់ខ្លួនជនបង្កម្នាក់ទៀតយកមកផ្តន្ទាទោសឲ្យខាងតែបាន ។ ក្រោយពីសាកសួរជនសង្ស័យបានឆ្លើយថា មូលហេតុបណ្តាលពីទំនាស់ពាក្យសំដីគ្នា។ រីឯសពជនរងគ្រោះត្រូវបានប្រគល់ឱ្យឪពុកម្តាយយកទៅធ្វើបុណ្យតាមប្រពៃណី។ (កែសម្រួលដោយ ៖ បុប្ផា)