ខេត្តព្រះវិហារ ៖ ដោយមើលឃើញថា បច្ចុប្បន្ននេះប្រជាពលរដ្ឋមួយចំនួននៅខេត្តព្រះវិហារមានការភ្ញាក់រលឹកយកអាវុធកែច្នៃមកប្រគល់ជូនសមត្ថកិច្ចមូលដ្ឋាន ដើម្បីចូលរួមកាត់បន្ថយនូវការគ្រោះថ្នាក់ដោយអាវុធនេះ ម្យ៉ាងវិញទៀតចូលរួមធ្វើយ៉ាងណាមិនឲ្យកើតមានបទល្មើសដោយប្រើប្រាស់អាវុធកែច្នៃទាំងអស់នេះ ។ ទោះជាបែបនេះក្តីអធិការដ្ឋាននគរបាលស្រុកត្បែងមានជ័យ ខេត្តព្រះវិហារ បានព្រមានចាត់វិធានការយ៉ាងតឹងរឹងតាមផ្លូវច្បាប់ ចំពោះជនណាដែលនៅតែលាក់ទុកអាវុធនេះនៅក្នុងផ្ទះ។
![Picture]()
ថ្លែងប្រាប់អ្នកសារព័ត៌មាន លោកវរៈសេនីយ៍ត្រី រិទ្ធ សូណា អធិការដ្ឋាននគរបាលស្រុកត្បែងមានជ័យ ខេត្តព្រះវិហារ លោកពន្យល់ថា ការប្រើប្រាស់អាវុធកែច្នៃនេះបានធ្វើឲ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់នៅក្នុងមូលដ្ឋានយ៉ាងខ្លាំងព្រោះកន្លងទៅប្រជាពលរដ្ឋបានប្រើប្រាស់អាវុធនេះ ក្នុងការបរបាញ់សត្វ ព្រៃ និងបង្កជាបទល្មើសផ្សេងៗជាដើម ។ លោកបន្តថា នៅក្នុងមូលដ្ឋានស្រុកត្បែងមានជ័យនៃខេត្តព្រះវិហារបន្ទាប់ពីនគរបាលបានផ្សព្វផ្សាយ និងណែនាំដល់ប្រជាពលរដ្ឋឲ្យបឈ្ឈប់ការប្រើប្រាស់អាវុធកែច្នៃគ្រប់ប្រភេទឃើញថា ប្រជាពលរដ្ឋជាច្រើនបានភ្ញាក់រលឹកនាំគ្នាប្រមូលយកវត្ថុកែច្នៃទាំងអស់នោះមកប្រគល់ជូនសមត្ថកិច្ច ព្រោះពួកគាត់គិតថា ការធ្វើបែបនេះបានរួមចំណែកយ៉ាងសំខាន់ ក្នុងការជួយធ្វើឲ្យភូមិឃុំរបស់ពួកគាត់មានសុវត្ថិភាព គ្មានបទល្មើសជាដើម ។
![Picture]()
តែទោះជាបែបនេះក្តីលោកបានព្រមានចាត់វិធានការយ៉ាងតឹងរឹងបន្តទៀតចំពោះជនសង្ស័យណាដែលនៅតែលួចលាក់ទុកអាវុធកែច្នៃគ្រប់ប្រភេទក្នុងលំនៅឋានត្រូវប្រឈមមុខទៅតុលាការចាត់ការតាមផ្លូវច្បាប់ជាធរមានលែងមានការអប់រំដូចមុនទៀតឡើយ ។
![Picture]()
ជាមួយគ្នានេះ លោកឧត្តមសេនីយ៍ត្រី ឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្តព្រះវិហារបានបង្ហាញថា នៅក្នុងរយៈពេល៩ខែដើម ឆ្នាំ២០១៩នេះ សមត្ថកិច្ចបានដកហូត អាវុធកែច្នៃពីប្រជាពលរដ្ឋប្រើប្រាស់ខុសច្បាប់ និងពលរដ្ឋបានស្ម័គ្រចិត្តប្រគល់អាវុធគ្រប់ប្រភេទជូនសមត្ថកិច្ចបានចំនួន១១៧ដើម ក្នុងនោះមានអាវុធអាកា៤៧១ដើម អាវុធកែច្នៃប្រភេទកាប៊ិន ៩២ដើម អាវុធកែច្នៃស្នាតេះ ៧ដើម និងអាវុធកែច្នៃប្រភេទស្នប់ខ្យល់១៤ដើម គ្រោងនឹងធ្វើការដុតកម្ទេចចោលនៅពេលខាងមុខ ៕ កែសម្រួលដោយ ៖ សុឃាក់
![Picture]()
![Picture]()
ចែករំលែកព័តមាននេះ