ស្ថាប័ន​ពីរ​រួម​គ្នា​ស្រាវជ្រាវ​លើ​វិស័យ​ក​សិ​ម្ម​ដើម្បី​ធានា​បាន​នូវ​និរន្តរភាព​នៃ​ការ​ផ្គត់ផ្គង់​ស្បៀង


​រាជធានី​ភ្នំពេញ ៖ ក្នុង​ន័យ​ធានា​ឲ្យ​បាន​នូវ​និរន្តរភាព​នៃ​ការ​ផ្គត់ផ្គង់​ស្បៀង ផលិតភាព​ផលិតកម្ម ប្រសិទ្ធភាព គុណភាព សុវត្ថិភាព ទីផ្សារ និង​ការ​ប្រកួតប្រជែង ស្រប​តាម​បរិបទ​នៃ​កំណើន​សេដ្ឋកិច្ចជាតិ​ក្រសួងកសិកម្ម រុក្ខា​ប្រមាញ់ និង​នេសាទ បាន​រៀបចំ​ពិធី​ចុះហត្ថលេខា​លើ​លិខិតបញ្ជាក់​បំណង​ស្តី​ពី «​អាទិភាព​ជា​យុទ្ធសាស្ត្រ​ស្រាប់​កិច្ច​សហប្រតិបត្តិការ​ស្រាវជ្រាវ​កសិកម្ម​» ជាមួយ​មជ្ឈមណ្ឌល​អូស្ត្រាលី​សម្រាប់​ការ​ស្រាវជ្រាវ​កសិកម្ម​អន្តរជាតិ (ACIAR) ឆ្នាំ​២០១៩​ដល់​២០២៩ ផ្តោត​ជា​សំខាន់​នៅ​តាម​បណ្តា​ខេត្ត​ភាគ​ខាងត្បូងប្រទេស​។

​ថ្លែង​ក្នុង​ពិធី​ចុះហត្ថលេខា​ខាងលើ​កាលពី​ថ្ងៃ​ទី​៥ ខែវិច្ឆិកា​ម្សិលមិញ​ថា​លោក វេ​ង​សា​ខុន រដ្ឋមន្ត្រី​ក្រសួងកសិកម្ម​រុក្ខា​ប្រមាញ់​និង​នេសាទ​មាន​ប្រសាសន៍​ថា លទ្ធផល​ជា​ផ្លែផ្កា​នា​ថ្ងៃនេះ គឺ​បាន​មក​ពី​ភាពរឹងមាំ​នៃ​ចំណងមិត្តភាព និង​កិច្ច​សហប្រតិបត្តិការ​យូ​អង្វែង​នៃ​ប្រទេស​ទាំង​ពីរ​។ ​លោក​រដ្ឋមន្ត្រី​មាន​ប្រសាសន៍​បញ្ជាក់​ថា «​ថ្ងៃនេះ​ក្រសួងកសិកម្ម រុក្ខា​ប្រមាញ់ និង​នេសាទ និង ACIAR នឹង​ចុះហត្ថលេខា​លើ​លិខិតបញ្ជាក់​បំណង​ស្តី​ពី «​អាទិភាព​ជា​យុទ្ធសាស្ត្រ​សម្រាប់​កិច្ច​សហប្រតិបត្តិការ​ស្រាវជ្រាវ​កសិកម្ម ២០១៩-២០២៩» ដែល​ឯកសារ​នេះ វា​នឹង​ដើរតួ​នាទី​យ៉ាង​សំខាន់​ក្នុង​ការ​ស្រាវជ្រាវ​ក្នុង​វិស័យ​កសិកម្ម រួមចំណែក​អភិវឌ្ឍវិស័យ​នេះ​ឱ្យ​មានការ​រីក​ចម្រើន ធានា​បាន​នូវ​និរន្តរភាព​នៃ​ការ​ផ្គត់ផ្គង់​ស្បៀង ផលិតភាព​ផលិតកម្ម ប្រសិទ្ធភាព គុណភាព សុវត្ថិភាព ទីផ្សារ និង​ការ​ប្រកួតប្រជែង ស្រប​តាម​បរិបទ​នៃ​កំណើន​សេដ្ឋកិច្ចជាតិ កំណើនប្រជាជន ការ​ប្រែប្រួល​អាកាសធាតុ បរិ​យា​ប័ន និង​ជា ពិសេស​ស្រប​តាម​គោលនយោបាយ និង​កំណែទម្រង់​ផែនការ​យុទ្ធសាស្ត្រ​របស់​ក្រសួង ក៏​ដូច​ជា​រាជរដ្ឋាភិបាល​តាម​អភិក្រម រដ្ឋ – ឯកជន – ដៃគូ​អភិវឌ្ឍន៍ – និង​សហគមន៍​កសិកម្ម​»​។

លោក​ជំទាវ Angela Corcoran ឯកអគ្គរដ្ឋទូត​អូស្ត្រាលី​ប្រចាំ​ព្រះរាជាណាចក្រ​កម្ពុជា​បាន​បញ្ជាក់​ថា រដ្ឋាភិបាល​អូស្ត្រាលី​នៅ​តែ​ជា​ដៃគូ​សហប្រតិបត្តិការ​ក្នុង​ការ​អភិវឌ្ឍ​វិស័យ​កសិកម្ម​យូរអង្វែង រឹង​មាំ ជាមួយ​រាជ រដ្ឋាភិបាល​កម្ពុជា និង​ជា​ពិសេស​ជាមួយ​ក្រសួងកសិកម្ម រុក្ខា​ប្រមាញ់ និង​នេសាទ​ជាង ២៥​ឆ្នាំ​មកនេះ ក្នុង​គោលបំណង​ចែករំលែក​បទ​ពិសោធន៍ ស្រាវជ្រាវ បណ្តុះបណ្តាល​ធនធានមនុស្ស ធ្វើការ​កែ​ទម្រ​ង របៀប និង​ទម្លាប់ ដើម្បី​ធ្វើ​យ៉ាងណា​លើកកម្ពស់​បរិមាណ និង​គុណភាព​កសិផល បង្កើត​ឱកាស​ឱ្យ​មានការ​ចូលរួម​ក្នុង​ការងារ​ក​សិ​ធុរកិច្ច​ប្រកបដោយ​ផែនការ និង​ទិស​ដៅ​ច្បាស់លាស់​។

លោក​ជំទាវ​បាន​បញ្ជាក់​ថា​លោក​ជំទាវ​សង្ឃឹម និង​ជឿជាក់​ថា ACIAR នឹង​ចូលរួម​ចំណែក​យ៉ាង​ពេញលេញ​ក្នុង​ការ​ចូលរួម​អភិវឌ្ឍន៍​វិស័យ​កសិកម្ម​កម្ពុ​ជានា​ពេល​អនាគត​ដ៏​ខ្លី ហើយ​រដ្ឋាភិបាល​អូស្ត្រាលី​នឹង​នៅ​តែ​បន្ត​ធ្វើ​ជា​ដៃគូ​យ៉ាង​ជិត​ស្និទ្ធ​ជាមួយ​រាជរដ្ឋាភិបាល​កម្ពុជា​ក្នុង​ការ​អភិវឌ្ឍ​ប្រទេស ជា​ពិសេស​ក្នុង​វិស័យ​កសិកម្ម​ឱ្យ​មានការ​រីក​ចម្រើន​ថែម​ទៀត​។

ដើម្បី​ឱ្យ​គម្រោង​នេះ​ទទួល​បាន​ជោគជ័យ​តាម​ការ​គ្រោងទុក លោ​កម​រដ្ឋមន្ត្រី​កសិកម្ម​បាន ស្នើ​ដល់ រដ្ឋាភិបាល​អូស្ត្រាលី តាម​រយៈ ACIAR ពិចារណា​បង្កើន​ការ​គាំទ្រ​ថវិកា​ដល់​ការ​ស្រាវជ្រាវ​កសិកម្ម​កម្ពុជា​ទាក់ទង​នឹង​ការ​ធ្វើ​បច្ចុប្បន្នភាព​ផែនការមេ និង​ពង្រីក​វិស័យ​ស្រាវជ្រាវ​ផ្តោត​លើ​ការ​កសាង​ហេដ្ឋារចនាសម្ព័ន្ធ​គាំទ្រ​សំខាន់​ៗ រួម​ជាមួយ​ការ​បង្កើន​សមត្ថភាព​មន្ត្រី វិស័យ​ឯកជន និង​សហ គមន៍​កសិកម្ម​លើ​ការ​កែ​ច្នៃ វេច​ខ្ចប់ ស្តុក​ទុក និង​ទីផ្សារ​។ ដោយឡែក​ស្ថាប័ន ឬ​វិទ្យាស្ថាន​ដែល​ទទួល​បន្ទុក​អនុវត្ត​គម្រោង​ខាងលើ​ក៏​ត្រូវ​ចូលរួម​សហការ​ឲ្យ​បាន​ពេញលេញ និង​មាន​ប្រសិទ្ធភាព ដើម្បី​ទាញ​យក​ប្រយោជន៍​ជា​អតិប្បរមា​សម្រាប់​ជាតិ និង​ប្រជា​កសិករ​។

យោង​តាម​ក្រសួងកសិកម្ម រុក្ខា​ប្រមាញ់​និង​នេសាទ លិខិតបញ្ជាក់​អំពី​រវាង​ក្រសួងកសិកម្ម រុក្ខា​ប្រមាញ់ និង​នេសាទ និង​មជ្ឈមណ្ឌល​អូស្ដ្រាលី​សម្រាប់​ការ​ស្រាវជ្រាវ​កសិកម្ម​អន្តរជាតិ​« ស្តី​ពី​អាទិភាព​ជា​យុទ្ធសាស្ត្រ​សម្រាប់​កិច្ច​សហប្រតិបត្តិការ​ស្រាវជ្រាវ​កសិកម្ម នឹង​ចាប់ផ្តើម​អនុវត្ត​ពី​ឆ្នាំ​២០១៩ ដល់ ឆ្នាំ​២០២៩» ក្នុង​ខេត្ត​ភាគ​ខាងត្បូង​នៃ​ប្រទេស គឺ​ខេត្តកំពត​, តាកែវ​, កណ្តាល​, ព្រៃវែង និង​ខេត្តកំពង់ចាម ព្រមទាំង​ខេត្ត​ជាប់​បឹង​ទន្លេសាប​ចំនួន​ពីរ​ទៀត​ផង​ដែរ​គឺ​ខេត្តកំពង់ធំ និង​ខេត្តសៀមរាប​។

គោលបំណង​សំខាន់​ៗ​ដែល​ភាគី​ទាំង​ពីរ​បាន​ឯកភាព​ក្នុង​ភាព​ជា​ដៃគូរ​ក្នុង​ការ​ស្រាវជ្រាវ គឺ​នឹង​ផ្តោត​លើ​ផ្នែក​អាទិភាព​សម្រាប់​កសិកម្ម​ចំនួន​៣៖ ទី​១-) ប្រពលវប្បកម្ម​និង​ពិពិធ​កម្ម​កសិកម្ម​ប្រកបដោយ​ចីរភាព លើ​គ្រប់​ដំណាំ​ក្រៅពី​ស្រូវ​នៅ​ក្នុង​ប្រព័ន្ធ​ដំណាំ​-​ស្រូវ​តាម​បែប​ប្រពៃណី និង​ប្រព័ន្ធ​ដាំ​ដុះ​ផ្សេង​ទៀត​,​ទី​២-) ប្រពលវប្បកម្ម​ប្រកបដោយ​ចីរភាព​នៃ​ប្រព័ន្ធ​ផលិតកម្ម​សត្វ​ខ្នាត​តូច​ដែល​តម្រង់​ទៅ​ទីផ្សារ​និង​ទី​៣-) ប្រពលវប្បកម្ម​ប្រកបដោយ​ចីរភាព​នៃ​ប្រព័ន្ធ​ផលិតកម្ម​វារីវប្បកម្ម​ទឺ​ក​សាប សម្រាប់​ប្រភេទ​ដែល​សម្បូរ​ដោយ​អាហារូបត្ថម្ភ​៕ កែសម្រួលដោយ ៖ សុឃាក់

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ