ខេត្តកំពត ៖ ជនសង្ស័យម្នាក់ត្រូវសមត្ថកិច្ចក្រុងកំពតចាប់ឃាត់ខ្លួន បន្ទាប់ពីធ្វើសកម្មភាពប៉ុនប៉ងចាប់រំលោភក្មេងស្រីអាយុ១៣ឆ្នាំម្នាក់មិនបានសំរេច ហើយត្រូវនាងស្រែកឱ្យគេជួយបង្កការភ្ញាក់ផ្អើលកាលពីយប់ថ្ងៃទី៥ ខែវិច្ឆិកា ឆ្នាំ២០១៩ នៅចំណុចបន្ទប់ជួលរបស់ក្មេងស្រីរងគ្រោះ ស្ថិតក្នុងសង្កាត់អណ្តូងខ្មែរ ក្រុងកំពត ។
ជនសង្ស័យឈ្មោះចេងសាវុធ ភេទប្រុស អាយុ២០ឆ្នាំ ជាជាងបៀកថ្នាំលាបផ្ទះ ស្នាក់នៅបន្ទប់ជួលជិតបន្ទប់ក្មេងស្រីរងគ្រោះដែរ គឺស្ថិតក្នុងសង្កាត់អណ្តូងខ្មែរ ក្រុងកំពត និងមានស្រុកកំណើតនៅភូមិតាភេន ឃុំត្រាំកក់ ស្រុកត្រាំកក់ ខេត្តតាកែវ ។ ចំណែកក្មេងស្រីរងគ្រោះមានអាយុ១៣ឆ្នាំ ស្នាក់នៅបន្ទប់ជួល ស្ថិតក្នុងសង្កាត់អណ្តូងខ្មែរ ក្រុងកំពត ។
តាមប្រភពពីក្មេងស្រីរងគ្រោះបាននិយាយប្រាប់នគរបាលឱ្យដឹងថា នាងបានស្នាក់នៅបន្ទប់ជួលជាមួយម្ដាយ និងប្អូនតូចៗចំនួន២នាក់ទៀត ។ មុនពេលកើតហេតុ នៅវេលាម៉ោង៩និង៣០នាទីយប់ថ្ងៃទី៥ ខែវិច្ឆិកា ម្ដាយរបស់នាងមិននៅនោះទេ ព្រោះគាត់ទៅលេងផ្ទះជីដូននៅឯភ្នំវល្លិ៍ ដោយទុកប្អូនតូចៗ២នាក់ឱ្យនៅដេកជាមួយនាង។
តាមប្រភពដដែលបានបន្តថា នៅពេលដេកជាមួយប្អូនតូចៗនោះ នាងភ្លេចចាក់សោទ្វារបន្ទប់ ស្រាប់តែជនសង្ស័យដែលស្នាក់នៅបន្ទប់ជិតនោះបានចូលទៅក្នុងបន្ទប់របស់នាង ហើយក៏មានការប្រវាយប្រតប់គ្នា ដោយជនសង្ស័យប៉ុនប៉ងចាប់រំលោភនាងដែរ តែនាងបានរើបំរះ និងស្រែកអោយគេជួយ ទើបមានការភ្ញាក់ផ្អើលរហូតឈានទៅដល់ការឃាត់ខ្លួនជនសង្ស័យបាន និងបញ្ជូនមកកាន់អធិការនគរបាលក្រុងទាំងយប់តែម្តង ។
នៅព្រឹកថ្ងៃទី៦ ខែវិច្ឆិកា នេះ ជនសង្ស័យត្រូវបាននគរបាលក្រុងកំពតបញ្ជូនមកកាន់ស្នងការដ្ឋាននគរបាលខេត្តដើម្បីសួរនាំបន្ថែមនិងនាំខ្លួនទៅកាន់តុលាការដើម្បីចាត់ការតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ