បរទេស ៖ គ្រប់ការិយាល័យតែងតែមានបុគ្គលិកម្នាក់ ឬពីរនាក់ដែលតែងតែអង្គុយទទួលទានអាហារថ្ងៃត្រង់ម្នាក់ឯងស្ទើរតែរាល់ថ្ងៃ ។ អ្នកប្រហែលជា គិតថាវាជារឿងកម្សត់ និងមើលទៅពួកគេដូចជាឯកោខ្លាំងណាស់ ប៉ុន្តែការពិតបានលាតត្រដាងតាមរយៈការស្រាវជ្រាវមួយបញ្ជាក់ថា ការធ្វើបែបនេះជាទម្លាប់ល្អទៅវិញទេ ។
អ្នកជំនាញផ្នែកដឹកនាំ គឺអ្នកស្រី ម៉ារីសា ឃីង (Marissa King) បានលើកឡើងពីការស្រាវជ្រាវមួយដែលបង្ហាញឲ្យដឹងថា បុគ្គលិកទទួលបានអត្ថប្រយោជន៍ជាច្រើនពីការទទួលទានអាហារម្នាក់ឯងជាងការទទួលទានអាហារជាមួយក្រុមការងារ ។ ការស្រាវជ្រាវនេះ ត្រូវបានចាប់ផ្តើមដោយ Rottman School of Management ដែលវិភាគបុគ្គលិកចំនួន ១០៣នាក់ ក្នុងការចំណាយពេលវេលាទទួលទានអាហារថ្ងៃត្រង់របស់ពួកគេជារៀងរាល់ថ្ងៃក្នុងកំឡុងពេល២សប្តាហ៍ពេញ និងបានសួរពួកគេពីកម្រិតនៃកម្លាំងដែលនៅសល់នៅពេលជិតចូលថ្ងៃថ្មី ។
អ្នកដែលទទួលទានអាហារថ្ងៃត្រង់ម្នាក់ឯង និងទុកការងារមួយឡែកសិនបាននិយាយថាពួកគេមានអារម្មណ៍ធូរស្រាលជាងគេ ខណៈដែលអ្នកធ្វើការបណ្តើរទទួលទានអាហារបណ្តើរ និងអ្នកដែលចេញទៅទទួលទានអាហារជាមួយក្រុមការងារមានអារម្មណ៍ហត់នឿយជាងអ្នកដទៃ ។ ប៉ុន្តែស្ថានការណ៍ដែលធ្វើឲ្យពួកគេហត់នឿយជាងគេ គឺពេលដែលបុគ្គលិកត្រូវបានបង្ខំឲ្យចូលរួមការទទួលទានអាហារជាក្រុម ។ ផ្ទុយមកវិញបុគ្គលិកនឹងទទួលបានអត្ថប្រយោជន៍ច្រើនជាងគេ នៅពេលដែលពួកគេអាចគ្រប់គ្រងពេលទំនេរ និងចូលរួម ឬបដិសេធតាមចិត្ត ។
យោងទៅតាមការស្ទង់មតិរបស់បុគ្គលិក១,៦០០នាក់ នៅអាមេរិកខាងជើងបានឲ្យដឹងដែរថា ការសម្រាកពីការឆ្លើយតបនឹងអ៊ីមែល និងផ្តោតស្មារតីលើការទទួលទានអាហារអាចជួយបង្កើនការចូលរួម និងប្រសិទ្ធិភាពការងាររបស់បុគ្គលិក ។ លើសពីនេះទៅទៀតការសម្រាកប្រមាណពី២០ទៅ៣០នាទីបន្ទាប់ពីធ្វើការពី៩០ ទៅ១២០នាទី ជាជម្រើសល្អបំផុតដែលជួយបង្កើនការផ្តោតស្មារតីរបស់បុគ្គលិក និងជួយឲ្យបុគ្គលិកសម្រេចការងារបានច្រើន និងមានប្រសិទ្ធិភាព ៕ កែសម្រួលដោយ ៖ សុឃាក់
ចែករំលែកព័តមាននេះ