បរទេស ៖ ឆាកជីវិតរបស់មហាសេដ្ឋីឬអ្នកជោគជ័យមិនមែនសុទ្ធតែដូចគ្នានោះទេ អ្នកខ្លះគាត់កើតលើគំនរទ្រព្យហើយគួបផ្សំនឹងការមានគំនិតផងនោះ នាំឲ្យគាត់កាន់តែជោគជ័យមានប្រាក់ពាន់លានដុល្លារ។
ក៏ប៉ុន្តែមហាសេដ្ឋីខ្លះមុនមានលុយរាប់ពាន់លានដុល្លារក្នុងដៃ គឺមានជីវីតកម្សត់ហួសពីការស្មានដល់ ។ ជាក់ស្តែង មហាសេដ្ឋីលី កាស៊ីង (Li Ka-shing) របស់ហុងកុងលែងជាមហាសេដ្ឋីដែលមានទ្រព្យសម្បត្តិច្រើនជាងគេក្នុងអាស៊ីហើយ ប៉ុន្តែលោកនៅតែមានទ្រព្យសម្បត្តិរួមសរុបប្រមាណ២៧.៨ប៊ីលានដុល្លារដដែល។ ប៉ុន្តែលោកមិនមែនជាមនុស្សដែលមានសំណាងដែលចាប់កំណើតក្នុងគ្រួសារដែលស្តុកស្តម្ភស្រាប់ទេ។ ផ្ទុយមកវិញ លោកបានស្ពាយសម្ពាធគ្រួសារឲ្យរកលុយតាំងពីនៅវ័យក្មេង។ បន្ទាប់ពីគ្រួសាររបស់លោករត់ចេញពីប្រទេសចិនមកកាន់ហុងកុងក្នុងកំឡុងសង្គ្រាមលោកលើកទីពីរ ឪពុករបស់លោកបានទទួលមរណភាពព្រោះជម្ងឺរបេង។ លោកបានចាកចេញពីសាលារៀនតាំងពីមុនអាយុ ១៦ឆ្នាំ និងចាប់ផ្តើមចូលធ្វើការក្នុងរោងចក្រផលិតប្លាស្ទិច។
ក្នុងកំឡុងពេល៤ឆ្នាំ លោកផ្ញើ ៩០%នៃចំណូលរបស់លោកទៅម្តាយ។ លោកជាមនុស្សដែលខិតខំធ្វើការមួយរូបដែលឧស្សាហ៍ថែមម៉ោងដល់ ១៦ ម៉ោងក្នុងមួយថ្ងៃ និង ៧ថ្ងៃក្នុងមួយសប្តាហ៍។ មិនយូរប៉ុន្មាន លោកបានក្លាយជាអ្នកលក់ឆ្នើមប្រចាំរោងចក្រ និងក្លាយជាអ្នកគ្រប់គ្រងរោងចក្រទាំងមូលនៅអាយុ ១៨ឆ្នាំ។
ពេលដែលលោកបានបើកដំណើរការរោងចក្រដំបូងនៅឆ្នាំ ១៩៥០ ពេលលោកអាយុ ២២ឆ្នាំ លោកបានផលិតប្លាស្ទិចជាច្រើនប្រភេទព្រោះលោកគិតថាវិស័យនេះនឹងមានការរីកចម្រើនខ្លាំង ហើយលោកពិតជាគិតបានត្រឹមត្រូវមែន។ ដោយហេតុដូចនេះ ទើបលោកគិតថា ភាពជោគជ័យរបស់លោកកើតចេញពីការប្តេជ្ញាក្នុងការសិក្សាពីនិន្នាការថ្មីៗក្នុងវិស័យ ។ លោកមិនមានបរិញ្ញាប័ត្រសិក្សាថ្នាក់ខ្ពស់ទេ ប៉ុន្តែលោកជាមនុស្សចូលចិត្តអាន ។ ដោយហេតុដូចនេះ លោកគិតថា សមត្ថភាពក្នុងការរៀនដោយខ្លួនឯងក៏ជា កត្តាដែលជួយឲ្យលោកជោគជ័យដែរ ។
ទោះជាលោកមានក្រុមហ៊ុនជាច្រើនពិតមែន ទម្លាប់ក្នុងការរិះលុយតាំងពីនៅកុមារភាពរបស់លោកនៅតែបន្តក្នុងការគ្រប់គ្រងអាជីវកម្មដែរ។ លោកមានគោលការណ៍គ្មានបំណុលដែលមានន័យថាក្រុមហ៊ុនលោកដំណើរការដោយមានបំណុលទាបបំផុត ហើយអចលនទ្រព្យដែលលោកបានទិញគឺសុទ្ធតែត្រូវបានទិញដោយប្រើប្រាស់ទ្រព្យសម្បត្តិដែលលោកមានស្រាប់ដែរ។
ក្រៅពីចំណេះដឹងពីវិស័យហើយ លោកលីគិតថាភាពស្មោះត្រង់ និងកេរ្តិ៍ឈ្មោះជាកត្តាសំខាន់នៃភាពជោគជ័យ។ នៅឆ្នាំ ២០០៦ ក្នុងបទសម្ភាសន៍មួយជាមួយ Forbes លោកបាននិយាយថា រាល់ពេលដែលលោកយល់ស្របនឹងនរណាម្នាក់ វាប្រៀបបានជាកុងត្រាមួយ ៕ កែសម្រួលដោយ ៖ សុឃាក់
ចែករំលែកព័តមាននេះ