រាជធានីភ្នំពេញ ៖ ពិធីបុណ្យអុំទូក បណ្តែតប្រទីប សំពះព្រះខែ និងអកអំបុកដែលមានរយៈពេល៣ថ្ងៃនេះ បានចាប់ផ្តើមថ្ងៃដំបូង គឺថ្ងៃទី២០ វិច្ឆិកា ក្រោមព្រះរាជវត្តមានដ៏ខ្ពង់ខ្ពស់ព្រះករុណាព្រះមហាក្សត្រនៃព្រះរាជាណាចក្រកម្ពុជា និងវត្តមានសម្តេចទាំង៣ គឺសម្តេចអគ្គមហាធម្មពោធិសាលជា ស៊ីម សម្តេចអគ្គមហា ពញាចក្រីហេង សំរិន និងសម្តេចអគ្គមហា សេនាបតីតេជោហ៊ុន សែន និងលោកជំទាវ ។ តាមសេចក្តីរាយការណ៍ពីមន្ត្រីរៀបចំការប្រកួតបានឱ្យដឹងថា ឆ្នាំនេះមានទូកចូលរួមប្រណាំងចំនួន៤២៤ទូក តែត្រូវអវត្តមានចំនួន៣ទូក ក្នុងនោះមានទូកពិសេសចំនួន១០៨ទូក ។ ការប្រណាំងថ្ងៃដំបូងចាប់ផ្តើមពីម៉ោង១០ព្រឹក ដោយចេញដំណើរពីចំណុចស្ថានីយរដ្ឋាករទឹកឆ្លងកាត់កងព័ន្ធទី១ ទី២ មកដល់កងព័ន្ធផ្តាច់ព្រ័ត្រមុខព្រះបរមរាជវាំងចំងាយប្រមាណ១៧០០ម៉ែត្រ ។ ប្រភពដដែលបញ្ជាក់ថា ការប្រណាំងនៅថ្ងៃទី១ និងទី២ ទូកធម្មតា និងទូកពិសេសត្រូវប្រណាំងចំនួន២ជើង ។ ប៉ុន្តែនៅថ្ងៃទី៣ ទូកធម្មតាប្រណាំងតែ១ជើងប៉ុណ្ណោះដោយមានការចាប់ឆ្នោតរើសខ្សែទឹក ។ ចំណែកទូកពិសេសត្រូវប្រណាំង២ជើងដដែល ។
គួរកត់សំគាល់ថា ការប្រណាំងនៅថ្ងៃដំបូងនោះទូកដែលជាប់លេខ១ កាលពីឆ្នាំ២០០៩ ឈ្មោះជ្រៃមាស សាគរសែនជ័យរបស់ខេត្តកណ្តាលពាក់ស្លាកលេខ៣៣៣ ប្រណាំង២ជើងឈ្នះទាំង២ជើង ។ ទូកជាប់លេខ២ កាលពីឆ្នាំ២០០៩ ឈ្មោះកំពូលអធិរាជផន សែនជ័យ របស់ក្រសួងការពារជាតិពាក់ស្លាកលេខ១៦៧ ក៏បានឈ្នះទាំង២ជើងដែរ ។ ចំណែកទូកឈ្មោះកំពូលតេជោសែនជ័យរបស់ខេត្តកណ្តាលពាក់ស្លាកលេខ១៧៩ ដែលជាប់លេខ៣ កាលពីឆ្នាំមុននោះប្រណាំង២ជើងឈ្នះ១ ចាញ់១ ។ ក្នុងឱកាសប្រណាំងថ្ងៃទី១នោះមានទូកចំនួន៤បានលិច និងមានកីឡាករទូកចំនួន២១នាក់បានធ្លាក់ទឹកនៅពេលប្រណាំងទូក ។ ប៉ុន្តែមិនមានរបាយការណ៍ណាមួយបញ្ជាក់ពីការបាត់ខ្លួនក្នុងហេតុការណ៍លិចទូក និងធ្លាក់ទឹកនោះទេ ។ នៅលើទីលានប្រណាំងគេឃើញកងកំលាំងរបស់បញ្ជាការដ្ឋានកងទ័ពជើងទឹកបានជួយសង្គ្រោះហេតុការណ៍នោះទាន់ពេលវេលា ។
នៅថ្ងៃនោះដែរ មានទូកចំនួន៣គ្រឿងតែមិនបានបញ្ជាក់ឈ្មោះ បានប្រព្រឹត្តខុសច្បាប់ដោយបានអុំកាត់ទទឹងទន្លេពេលកំពុងប្រណាំង ហើយទូកទាំង៣នោះត្រូវបានហៅមកព្រមានរួចហើយ ។ ជាមួយគ្នានោះដែរ មានទូក១គូបានបុកគ្នា គឺទូកឈ្មោះរតនៈសជ័យ បារមីកំពង់ទ្រា ពាក់ស្លាកលេខ៥៧របស់ខេត្តព្រៃវែងបានបុកគ្នាជាមួយគូប្រកួតរបស់ខ្លួនគឺទូកឈ្មោះសុវណ្ណ កុមារ មហារិទ្ធី ពាក់ស្លាកលេខ៣៥៨របស់ខេត្ត កំពង់ចាម ។ ទោះបីយ៉ាងណា មិនមានគ្រោះថ្នាក់ដល់មនុស្សទេ ។
ទិដ្ឋភាពនៅថ្ងៃទី១នោះ ទោះបីមានការព្យាករណ៍ពីសាលារាជធានីភ្នំពេញថា យ៉ាងហោចណាស់មានមនុស្សជាង៣លាននាក់ចូលរួម ប៉ុន្តែនៅម្តុំព្រះបរមរាជវាំងមិនសូវមានមនុស្សណែនណាន់តាន់តាប់ដូចបណ្តាឆ្នាំមុនៗទេ។ នៅគ្រប់ទីកន្លែងនៃតំបន់ប្រារព្ធពិធីក្នុងរាជធានីភ្នំពេញ ត្រូវបានដាក់ពង្រាយនូវកំលាំងរក្សាសន្តិសុខ មានសមត្ថកិច្ចប៉ូលិស ប៉េអឹមសរុបប្រមាណជាង១ម៉ឺននាក់ ដើម្បីបំរើសន្តិសុខ សុវត្ថិភាពជូនប្រជាពលរដ្ឋ ។ ឆ្នាំនេះមានប្រទីបចំនួន៩បានបណ្តែតលើផ្ទៃទឹកទន្លេនាពេលយប់ ក្នុងនោះប្រទីបព្រះបរមរាជវាំង ព្រឹទ្ធសភា រដ្ឋសភា ទីស្តីការគណៈរដ្ឋមន្ត្រី ក្រសួងមហាផ្ទៃ ក្រសួងទេសចរណ៍ ក្រសួងយុត្តិធម៌ ក្រសួងការពារជាតិ និងប្រទីបរាជធានីភ្នំពេញ ។ ប្រទីបទាំងអស់ចាប់ផ្តើមបណ្តែតនៅវេលាម៉ោង៦យប់ ក្រោយពេលព្រះមហាក្សត្រប្រទានភ្លើង ហើយការបាញ់កាំជ្រួចក៏បានចាប់ផ្តើមព្រមៗគ្នា ញ៉ាំងឱ្យពិធីថ្ងៃដំបូងនោះ ប្រកបដោយក្តីសប្បាយរីករាយ ក្រោមអាកាសធាតុអំណោយផលល្អតាំងពីព្រឹករហូតដល់យប់ ។
នៅថ្ងៃទី១ នៃថ្ងៃប្រណាំងទូក.ង កាលពីថ្ងៃទី២០ វិច្ឆិកា កន្លងមក មានទូកចូលរួមប្រកួតក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក សរុបចំនួន២១២គូ ស្មើនឹង៤២៤ទូក ។ ដោយឡែកស្ថានភាព និងអាកាសធាតុនៅថ្ងៃដំបូងនេះ គឺមានសភាពល្អប្រសើរខ្លាំងណាស់ ជាពិសេសនៅផ្នែកនៃការចេញដំណើរ ដែលស្ថិតនៅត្រង់ចំណុចកំពង់ផែថ្ម ដោយមិនមានបញ្ហាអ្វីកើតឡើងដូចជាបណ្តាឆ្នាំមុនៗឡើយ ។ លោកស៊ួន ប៊ុនអ៊ន ប្រធានក្រុមគ្រប់គ្រងទូកបានមានប្រសាសន៍ថា ពីមួយឆ្នាំទៅមួយឆ្នាំគណៈកម្មការរៀបចំបុណ្យអុំទូក មានបទពិសោធន៍ក្នុងការរៀបចំ និងកែសំរួលលក្ខណៈបច្ចេកទេសជាបន្តបន្ទាប់ ទើបធ្វើឱ្យការប្រកួតមានសណ្តាប់ធ្នាប់យា៉ងល្អប្រសើរឡើងជាលំដាប់ ។ លោកបានបន្ថែមឱ្យដឹងថា ឆ្នាំនេះដោយមានការប្រជុំដាក់បទបញ្ជាយ៉ាងតឹងរឹង និងមានការគួបផ្សំទៅនឹងការយល់ដឹងរបស់កីឡាករអុំទូកទាំងអស់ទៀតផងនោះ លោកសង្កេតឃើញថា គឺមានសណ្តាប់ធ្នាប់ល្អខ្លាំងណាស់ ជាពិសេសតាំងពីរពេលចាប់ផ្តើមចេញដំណើរនៅវេលាម៉ោង១០ព្រឹករហូតដល់ម៉ោង៥និង៣០នាទីល្ងាច មិនសូវធ្វើឱ្យគណៈកម្មការផ្នែកខាងចេញដំណើរមានការលំបាកប៉ុន្មានទេ ។
ឆ្នាំនេះទឹកមិនសូវហូរខ្លាំង អាកាសធាតុក៏ល្អ មិនបណ្តាលឱ្យមានគ្រោះថ្នាក់ដល់ការលិចលង់ដូចជាឆ្នាំមុនៗឡើយ ។ បើគិតត្រឹមតែថ្ងៃដំបូង គេសង្កេតឃើញមិនទាន់មានបញ្ហាអ្វីកើតឡើងគួរឱ្យមានការបារម្ភនោះឡើយ ប៉ុន្តែក៏មានការត្អួញត្អែរពីកីឡាករអុំទូកផងដែរថា មានការយា៉ប់កំលាងនៅពេលប្រឹងអុំប្រកួត ។ លោករិន ថាន អ្នកបញ្ជាក្បាលទូកឈ្មោះជំទាវស្រីម៉ៅហោសុទ្ធសែនជ័យ បានមានប្រសាសន៍ថា ឆ្នាំនេះទឹកមិនសូវហូរខ្លាំង មិនបង្កគ្រោះថ្នាក់ជាយថាហេតុក៏ពិតមែន តែការអុំប្រណាំងមានការលំបាកបន្តិច ព្រោះត្រូវប្រើកំលាំងច្រើន ដើម្បីបញ្ជាទូកឱ្យមានល្បឿនលឿន និងយកឈ្នះលើគូប្រកួត ។ ប៉ុន្តែលោកក៏បានប្រាប់ថា ទោះបីជាយ៉ាងណា ក៏មានភាពល្អប្រសើរជាងឆ្នាំមុនៗដែរ ដូចជាការស្នាក់នៅ ហូបចុកមានសប្បុរសជនជួយឧបត្ថម្ភច្រើន សំខាន់ជាងនេះទៅទៀត គឺពុំមានភ្លៀងធ្លាក់ មិនបង្កការលំបាកដល់ការសំរាកនាពេលយប់ទេ ។
- សន្តិសុខសុវត្ថិភាពមានភាពល្អប្រសើរ
ជាការកត់សំគាល់ក្នុងព្រះរាជពិធីបុណ្យអុំទូកគិតត្រឹម២ថ្ងៃ បញ្ហាសន្តិសុខ ជាពិសេសអំពើលួច ឆក់ ឬប្លន់ ហាក់មិនមានអ្វីគួរឱ្យកត់សំគាល់ធំនោះទេ គឺមានអំពើលួច ឬចោរលូកហោប៉ៅតិចតួចបណ្ណោះ ដែលឆ្នាំនេះហាក់មានភាពល្អប្រសើរជាងបណ្តាឆ្នាំកន្លងទៅ ។ ប៉ុន្តែបញ្ហាចរាចរណ៍វិញមានការកកស្ទះខ្លាំង ជាពិសេសនៅតំបន់ដែលសមត្ថកិច្ចដាក់បារ៉ាស់ហាមឃាត់នៅច្រកចេញចូលក្នុងក្រុង ។ ចំណែកឯនៅក្នុងតំបន់ប្រារព្ធពិធីបុណ្យអុំទូកវិញ នៅថ្ងៃទី១ សមត្ថកិច្ចមានភាពធូររលុង ឱ្យមធ្យោបាយយានជំនិះចេញចូល ហើយយកលុយ ជាពិសេសនៅច្រកខាងត្បូងម្តុំស្ថានទូតសូវៀត ។ តែសំរាប់ថ្ងៃអុំទូកទី២វិញ មានការរឹតបន្តឹងយ៉ាងខ្លាំង ដែលនៅតំបន់ខ្លះមិនឱ្យរថយន្ត ឬម៉ូតូចូលតែម្តង ទោះជាមានស្លាកអនុញ្ញាតក៏ដោយ ដូចជាតំបន់សួនច្បារសម្តេចហ៊ុន សែន ជាដើម ។
ដោយឡែកសួនច្បារនានាក្នុងតំបន់ប្រារព្ធពិធីដូចជាសួនវិមានឯករាជ្យ នៅថ្ងៃទី១ មិនមានការបោះបង្គោលចងខ្សែហាមឃាត់នោះទេ ដោយឱ្យប្រជាពលរដ្ឋកំសាន្ត ឬអង្គុយ ក៏ដូចជាលក់ដូរលើសួនស្មៅបាន ។ ប៉ុន្តែថ្ងៃទី២ អភិបាលរាជធានីភ្នំពេញតំរូវឱ្យមានការបោះបង្គោលចងខ្សែហ៊ុមព័ទ្ធជុំវិញ មិនឱ្យប្រជាពលរដ្ឋដើរជាន់ស្មៅ ឬអង្គុយលើស្មៅនោះទេ ព្រោះខ្លាចខូចសួនស្មៅ ឬផ្កា ។ នៅព្រឹកថ្ងៃទី២១ វិច្ឆិកា ត្រូវនឹងថ្ងៃទី២ ដោយមានការណែនាំពីលោកកែប ជុតិមា អភិបាលរាជធានីភ្នំពេញ អង្គភាពសួនច្បារដឹកនាំដោយលោកសំ សាមុត ជាប្រធានបានធ្វើការបោះបង្គោលចងព័ទ្ធជុំវិញការពារសួនស្មៅ និងផ្កានៅសួនវិមានឯករាជ្យ ហាមឃាត់មិនឱ្យប្រជាពលរដ្ឋដើរជាន់ អង្គុយ ឬលក់ដូរលើស្មៅទៀតទេ ។ ចំណែកឯសួនច្បារមុខវត្តបទុមវតី សួរមាត់ទន្លេមុខវាំង ឬសួនមុខសណ្ឋាគារកាំបូឌីយ៉ាណាជាដើម ត្រូវបានអង្គភាពនេះធ្វើការបោះបង្គោលចងព័ទ្ធជុំវិញសួនស្មៅរួចមកហើយ តាំងតែពីមុនព្រះរាជពិធីបុណ្យអុំទូកម៉្លេះ ។ បើធ្វើបានបែបនេះ ក្រោយពិធីបុណ្យអុំទូកចប់ សួនច្បារទាំងឡាយនៅស្រស់បំព្រងដដែល មិនបាច់ចំណាយប្រាក់ដើម្បីដាំឡើងវិញឡើយ ។
- ប្រណាំងគូពិសេសថ្ងៃចប់បុណ្យ
យោងតាមសេចក្តីជូនដំណឹងរបស់គណៈកម្មការរៀបចំព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប ឆ្នាំ២០១០ បានឱ្យដឹងថា នៅថ្ងៃទី២៣ វិច្ឆិកា ឆ្នាំ២០១០ បន្ទាប់ពីបញ្ចប់ព្រះរាជពិធីបុណ្យប្រពៃណីជាតិខាងលើ គណៈកម្មការនឹងរៀបចំឱ្យមានការប្រកួតអុំទូកមួយថ្ងៃបន្ថែមទៀតជាលក្ខណៈមិត្តភាព និងគ្រួសាររវាងគូពិសេសទាំងអស់ ។ កម្មវិធីប្រកួតនេះនឹងត្រូវបានរៀបចំនៅទីក្រុងតាខ្មៅ ខេត្តកណ្តាល វេលាម៉ោង៩ព្រឹក និងមានការផ្សាយបន្តផ្ទាល់តាមវិទ្យុ និងទូរទស្សន៍ផងដែរ ។ ចំពោះការប្រកួតជាលក្ខណៈបន្ថែមនេះ មានតែគូពិសេសទាំងអស់ប៉ុណ្ណោះ ដែលត្រូវបានអនុញ្ញាតឱ្យចូលរួមប្រកួត ។ គូពិសេសទាំងអស់ត្រូវបានអនុញ្ញាតផងដែរ ឱ្យជ្រើសរើសគូប្រកួតដោយខ្លួនឯង ដោយត្រូវផ្តល់ព័ត៌មានអំពីការចាប់គូនេះមកគណៈកម្មការរៀបចំពិធីបុណ្យឱ្យបានមុនថ្ងៃទី២៣ វិច្ឆិកា ឆ្នាំ២០១០ ។ ដោយឡែកគណៈកម្មការនឹងរៀបចំចាប់គូប្រកួតជូនទូកពិសេសទាំងឡាយណា ដែលមិនបានចាប់គូដោយខ្លួនឯង ។ ដើម្បីធានាបាននូវភាពរលូន និងសណ្តាប់ធ្នាប់សំរាប់ការប្រកួតបន្ថែមនេះ គណៈកម្មការសំណូមពរចំពោះគូពិសេសទាំងអស់ត្រូវស្នាក់នៅទៅតាមទីតាំងដែលបានស្នាក់នៅក្នុងអំឡុងពេលបុណ្យជាតិ រហូតដល់ថ្ងៃប្រកួតនាទីក្រុងតាខ្មៅ ៕
អ្នករាយការណ៍កោះសន្តិភាព
ចែករំលែកព័តមាននេះ