រាជធានីភ្នំពេញ ៖ ការធ្វើដំណើរកម្សាន្តជាសកម្មភាពសប្បាយ និងអាចផ្លាស់ប្តូរជីវិតរបស់មនុស្សបាន ប៉ុន្តែវាក៏មានគ្រោះថ្នាក់ផងដែរ។ មិនថាអ្នកត្រូវបានប្លន់ ឬភ្លេចកាបូបលុយក្នុងតាក់ស៊ីទេ អ្នកត្រូវតែមានលុយលាក់ទុកជាប់ខ្លួន។ ខាងក្រោមនេះ គឺជាវិធីលាក់លុយដែលអាចជួយសង្គ្រោះអ្នកពេលជួបនឹងបញ្ហាពេលធ្វើដំណើរកម្សាន្ត៖
១. បែងចែកលុយ ៖ ដើម្បីចៀសវាងបាត់បង់លុយម្តងទាំងអស់នោះអ្នកគួរតែទុកវាជាបំណែកយ៉ាងតិចណាស់ក៏៣កន្លែងដែរ ។ មានកន្លែងច្រើនដែលអ្នកអាចប្រើ ដើម្បីលាក់លុយបានពេលធ្វើដំណើរ ហើយអ្នកមិនគួរលាក់វានៅកន្លែងតែមួយទេ ។ បើសិនជាអាច អ្នកគួរមានវិធីលាក់លុយជាប់នឹងខ្លួនឯងដែរ ព្រោះពេលខ្លះការដាក់លុយក្នុងកាបូប គឺមិនទាន់មានសុវត្ថិភាពគ្រប់គ្រាន់ឡើយ ។ អ្នកអាចធ្វើដូច្នេះបានដោយដេរហោប៉ៅបន្ថែមនៅសម្លៀកបំពាក់ដែលអ្នកតែងតែប្រើពេលធ្វើដំណើរ ឬហោប៉ៅសម្ងាត់ក្នុងកាបូបអ្នកជាដើម។
២. កុំកាន់ក្រដាសប្រាក់ធំពេក ៖ អ្នកមិនគួរបង្ហាញក្រដាសប្រាក់ធំៗឲ្យអ្នកដទៃឃើញទេ។ ផ្ទុយមកវិញ អ្នកគួរតែយកក្រដាសប្រាក់តូចៗជាប់ខ្លួនវិញសម្រាប់ការចាយវាយ ។ ព្រោះតែការរីកចម្រើននៃបច្ចេកវិទ្យា អ្នកគួរសាកល្បងធ្វើការស្រាវជ្រាវទាក់ទិននឹងការចាយវាយតាមប្រព័ន្ធទូរស័ព្ទបានដែរ ដើម្បីជៀសវាងការដាក់ក្រដាសប្រាក់ជាប់ខ្លួនច្រើនពេក។
៣. ដាក់កាបូនទទេជាប់ខ្លួន ៖ ប្រសិនបើអ្នកធ្វើដំណើរទៅកាន់តំបន់ ឬប្រទេសដែលមិនមានសុវត្ថិភាពខ្ពស់ និងមានឱកាសត្រូវចោរប្លន់ច្រើន អ្នកគួរតែកាន់កាបូបទទេជាប់ខ្លួន។ ដូច្នេះពេលដែលចោរគម្រាមអ្នកពិតមែននោះ អ្នកមានកាបូបលុយដើម្បីហុចឲ្យពួកគេដោយមិនបង្កគ្រោះថ្នាក់ដល់ខ្លួន។ ប្រាកដណាស់ចោរអាចនឹងបើកកាបូបអ្នកមើលដូច្នេះអ្នកគួរដាក់លុយបន្តិចបន្តួច ជាមួយនឹងវិក័យប័ត្រ ព្រមទាំងកាតមិនមានបានការមួយចំនួនក្នុងនោះដែរ ៕ កែសម្រួលដោយ ៖ សុឃាក់
ចែករំលែកព័តមាននេះ