រាជធានីភ្នំពេញ ៖ កូនប្រសារស្រីវ័យក្មេងដែលមានសម្រស់ផូរផង់ម្នាក់ ទើបរៀបការថ្មីថ្មោងស្រាប់តែបាត់ខ្លួនដោយមិនដឹងមូលហេតុ ហើយត្រូវបានបុរសជាឪពុកក្មេកម្នាក់ ព្រមទាំងក្រុមគ្រួសារកាន់រូបថតតាមរកគ្រប់ច្រកល្ហក ព្រមទាំងទៅប្តឹងនគរបាលប៉ុស្តិ៍ទួលសង្កែទី១កាលពីព្រឹកថ្ងៃទី២ ខែវិច្ឆិកា ឆ្នាំ២០១៩ ដើម្បីអោយជួយរកផងដែរ…
រាជធានីភ្នំពេញ ៖ កូនប្រសារស្រីវ័យក្មេងដែលមានសម្រស់ផូរផង់ម្នាក់ ទើបរៀបការថ្មីថ្មោងស្រាប់តែបាត់ខ្លួនដោយមិនដឹងមូលហេតុ ហើយត្រូវបានបុរសជាឪពុកក្មេកម្នាក់ ព្រមទាំងក្រុមគ្រួសារកាន់រូបថតតាមរកគ្រប់ច្រកល្ហក ព្រមទាំងទៅប្តឹងនគរបាលប៉ុស្តិ៍ទួលសង្កែទី១កាលពីព្រឹកថ្ងៃទី២ ខែវិច្ឆិកា ឆ្នាំ២០១៩ ដើម្បីអោយជួយរកផងដែរ បន្ទាប់ពីបាត់ខ្លួនមួយយប់មិនដឹងទៅទីណា។
ការស្វែងរកកូនប្រសាស្រីម្នាក់ខាងលើរហូតដល់ទួលសង្កែនេះ គឺបន្ទាប់ពីឪពុកក្មេកបានរកគ្រូទាយថា កូនប្រសាស្រីនៅម្តុំខាងជើងរង្វង់មូលគួចកាណុង ។ ទន្ទឹមនឹងការស្វែងរកនេះដែរ បុរសជាប្តីដែលធ្វើការនៅខេត្តព្រះសីហនុ ក៏បានធ្វើដំណើរមកទាំងអន្ទះសារ ដើម្បីតាមរកប្រពន្ធជាទីស្រលាញ់មិនដឹងបាត់ទៅទីណា ។
កូនប្រសាស្រីដែលបាត់ខ្លួនខាងលើឈ្មោះថន ដាវី អាយុ២០ឆ្នាំ ជាកម្មការីនីកាត់ដេរ ស្នាក់នៅបន្ទប់ជួលក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។ ចំណែកបុរសជាប្តីឈ្មោះឈាត ឆើត អាយុ២០ឆ្នាំ ជាជាងអគ្គីសនីបម្រើការនៅខេត្តព្រះសីហនុ។ ប្តីប្រពន្ធទាំងពីរនាក់មានស្រុកកំណើតនៅភូមិធ្លក ឃុំស្ពឺ ស្រុកបាភ្នំ ខេត្តព្រៃវែង។
តាមប្រភពពីបុរសជាឪពុកក្មេកឈ្មោះឈួន ឈាត អាយុ៤០ឆ្នាំ មុខរបរកសិករ បានអោយដឹងថា កូនប្រសាស្រីរបស់គាត់បានបាត់ខ្លួនកាលពីវេលាម៉ោងប្រមាណ៩ព្រឹកថ្ងៃទី១ ខែ វិច្ឆិកា ឆ្នាំ២០១៩ មិនដឹងទៅទីណា។
តាមប្រភពដដែលបានអោយដឹងបន្តថា កូនប្រសាស្រីរបស់គាត់បានស្នាក់នៅផ្ទះជួលជាមួយបងស្រីជីដូនមួយ ហើយបម្រើការងារជាកម្មការីនីរោងចក្រ ។ នៅព្រឹកថ្ងៃទី១ វិច្ឆិកា បងស្រីរបស់នាងក៏បានទៅធ្វើការបាត់ ហើយកូនប្រសាស្រីរបស់គាត់មិនដឹងទៅណានោះទេ ។ ដោយសារបាត់មិនឃើញទៅធ្វើការ ទើបមិត្តភក្តិកូនប្រុសរបស់គាត់ក៏បានទូរស័ព្ទទៅប្រាប់កូនប្រុសរបស់គាត់ដែលកំពុងតែធ្វើការនៅខេត្តព្រះស៊ីហនុក៏បង្កអោយមានការភ្ញាក់ផ្អើលថាបាត់នាង លុះពេលទូរស័ព្ទរកក៏តេមិនចូល ។
តាមប្រភពដដែលបានបន្តថា លុះនៅព្រឹកថ្ងៃទី២ ខែវិច្ឆិកា គាត់និងបងប្រុសរបស់កូនប្រសាស្រី ក៏បាននាំគ្នាទៅរកគ្រូទាយ ព្រោះគាត់មានការព្រួយបារម្ភថា ខ្លាចត្រូវគេដាក់ថ្នាំយករបស់របរ ហើយត្រូវគ្រូទាយថា កូនប្រសាស្រីនៅម្តុំរង្វង់មូលខាងជើងស្ពានជ្រោយចង្វារ ក៏បាននាំគ្នាកាន់រូបថតតាមរក និងទៅប្តឹងនគរបាលអោយជួយរកផងដែរ ។
តាមប្រភពដដែលបានអោយដឹងទៀតថា កន្លងមក កូនប្រសាស្រីនិងកូនប្រុសរបស់គាត់មិនដែលមានទំនាស់គ្នានោះទេ ស្រាប់តែនៅសុខៗ កូនប្រសាស្រីបាត់ខ្លួនបែបនេះតែម្តង។
តាមប្រភពពីបុរសជាប្តីបានអោយដឹងតាមទូរស័ព្ទថា រយៈពេលប្រមាណ១ខែមកហើយ ដែលគាត់បានបែកពីប្រពន្ធទៅធ្វើការនៅខេត្តព្រះសីហនុ ហើយក្នុងរយៈពេល១ខែកន្លងមកនេះ ប្រពន្ធបានទូរស័ព្ទទំនាក់ទំនងគ្នារហូត មិនដែលមានទំនាស់អ្វីនឹងគ្នានោះទេ ។
តាមប្រភពដដែលបានអោយដឹងបន្តថា នាឱកាសបុណ្យអុំទូក អកសំបុក សំពះព្រះខែ និងបណ្តែតប្រទីបខាងមុខនេះ គាត់នឹងវិលមកភ្នំពេញនាំប្រពន្ធជាទីស្រលាញ់ដើរលេង តែពេលនេះមិនដឹងថាប្រពន្ធរបស់គាត់បាត់ទៅទីណាឡើយ។
តាមប្រភពដដែលអោយដឹងបន្តទៀតថា គាត់និងប្រពន្ធបានរៀបការកាលពីថ្ងៃទី៨ ខែមិថុនា ឆ្នាំ២០១៩ ដោយមករស់នៅបន្ទប់ជួលឯរាជធានីភ្នំពេញ ហើយគាត់ក៏បានឃ្លាតឆ្ងាយ ព្រោះត្រូវទៅធ្វើការនៅខេត្តព្រះសីហនុបានប្រមាណ១ខែ ស្រាប់តែប្រពន្ធបាត់ខ្លួនតែម្តង ។
ទោះបីជាយ៉ាងណា ការបាត់ខ្លួនរបស់កូនប្រសាស្រីខាងលើគេមិនដឹងថា នាងមានគ្រោះថ្នាក់ដោយប្រការណាមួយ ឬក៍នាងចុះចោលផ្ទះដោយសារមូលហេតុអ្វីនោះទេ។ នៅព្រឹកថ្ងៃទី៣ ខែវិច្ឆិកានេះ ឪពុកក្មេកក៍ដូចក្រុមគ្រូសារបាននាំគ្នាធ្វើដំណើរទៅស្រុកកំណើតហើយទន្ទឹងចាំផ្លូវកូនស្រីជាស្រលាញ់៕ (កែសម្រួលដោយ ៖ ធីតា)
ចែករំលែកព័តមាននេះ