ខេត្តកំពង់ឆ្នាំង ៖ កំណាត់ផ្លូវជាតិលេខ៥ ក្នុងចន្លោះគីឡូម៉ែត្រលេខ៩០និង៩១ ក្នុងសង្កាត់កំពង់ឆ្នាំង ក្រុងកំពង់ឆ្នាំង ដែលរងការខូចខាតដោយសារជំនន់ទឹកភ្លៀងប្រវែងជាង៤០០ម៉ែត្រ ពេលនេះត្រូវបានជួសជុលឡើងវិញ ដោយមន្ទីរសារធារណៈការ និងដឹកជញ្ជូនខេត្តកំពង់ឆ្នាំង ដោយធ្វើជាផ្លូវក្រាលកៅស៊ូ ប្រភេទ AC ដែលមកដល់ពេលនេះជិតរួចរាល់ហើយ ប្រធានមន្ទីរសាធារណៈការ សូមមេត្តាយោគយល់អាធ្យាស្រ័យពីអ្នកធ្វើដំណើរដែលត្រូវស្ទះចរាចរណ៌ក្នុងពេលកំពុងជួសជុលនេះ។
លោក កែវ ពៅ ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំង ក្នុងពេលចុះពិនិត្យមើលក្រុមការងារបច្ចេកទេស ចាក់អ៊ុតកៅស៊ូនៅចំណុចផ្លូវខាងលើ នៅព្រឹកថ្ងៃទី១ ខែវិច្ឆិកា ឆ្នាំ២០១៩ នេះ បានអោយដឹងថា អនុវត្តន៍តាមគម្រោងឆ្នាំ២០១៩នេះ មន្ទីរសាធារណៈការ ត្រូវជួសជុលផ្លូវជាតិលេខ៥ ចន្លោះគីឡូម៉ែត្រលេខ ៩០និង៩១ ដោយចាក់កៅស៊ូប្រភេទAC មានប្រវែង៤៤៥ម៉ែត្រ និងក៏ត្រូវជួសជុលលូប្រវែង២៣០ម៉ែត្រ នៅជាប់ផ្លូវជាតិ ចំណុចដែលកំពុងជួសជុលខាងលើនេះផងដែរ ។
លោកបន្តថា គម្រោងខាងលើនេះជាថវិការបស់ថ្នាក់ជាតិ តាមរយៈក្រសួងសាធារណការ និងដឹកជញ្ជូន និងអនុវត្តគម្រោង ដោយមន្ទីរសាធារណការ និងដឹកជញ្ជូនខេត្តកំពង់ឆ្នាំង ដែលគម្រោងនេះតាមផែនការ នឹងត្រូវធ្វើអោយហើយនៅពាក់កណ្តាលខែវិច្ឆិកា ឆ្នាំ២០១៩ ខាងមុខនេះ ។ ប៉ុន្តែតាមការពិនិត្យជាក់ស្តែង គម្រោងខាងលើនេះ អាចនឹងហើយមុនផែនការកំណត់ ។
លោកប្រធានមន្ទីរសាធារណការក៏សូមអំពាវនាវផងដែរដល់ប្រជាពលរដ្ឋដែលរស់នៅតាមដងផ្លូវនៅចំណុចកំពុងជួលជុលទាំងអស់ សូមមេត្តាសហការចូលរួម ដើម្បីអោយផ្លូវជាតិរបស់លើមានគុណភាពល្អ ។
ដោយឡែកក៏សូមសំណូមពរ និងអធ្យាស្រ័យផងដែរ ដល់បងបងប្អូនដែលកំពុងប្រើប្រាស់ផ្លូវទាំងអស់ ដែលពេលបើកបរមកដល់ចំណុចកំពុងជួសជុលខាងលើនេះ ពិតជាមានការកកស្ទះចរាចរណ៍ខ្លះៗជាមិនខាន ដោយសារការធ្វើចរាចរណ៍បានតែលើផ្លូវម្ខាង ទុកលទ្ឋភាពអោយក្រុមជាងកំពុងជួសជុលផ្លូវម្ខាង ដូច្នេះសូមសហការជាមួយក្រុមការងារយើងដែលបានសម្រួលចរាចរណ៍រអោយទៅ និងមកម្តងម្ខាងៗ ដើម្បីចៀសវាងគ្រោះថ្នាក់ចរាចរណ៍ ហើយយើងទ្រាំតែប្រមាណតែ១០ថ្ងៃទៀត កំណាត់ផ្លូវនេះនិងត្រូវជួសជុលរួចរាល់ជាស្ថាពរហើយ៕ (កែសម្រួលដោយ ៖ ធីតា)
ចែករំលែកព័តមាននេះ