ខេត្តកំពង់ស្ពឺ ៖ ក្រុមរាត្រីចរបីនាក់ដែលទើបចេញពីស៊ីផឹកនៅហាងខារា៉អូខេមួយកន្លែង បានយកផ្លែដូងគប់កញ្ចក់រថយន្តរបស់អ្នកដំណើរតាមផ្លូវបណ្តាលឱ្យបែក ហើយបានជិះម៉ូតូគេចខ្លួនទៅពួននៅផ្ទះសំណាក់មួយកន្លែង តែត្រូវម្ចាស់រថយន្តដែលបើកដេញតាមពីក្រោយជាប់រហូត ក៏បានរាយការណ៍ប្តឹងសមត្ថកិច្ចឱ្យឃាត់ខ្លួនចាត់ការតាមនីតិវិធី ។ករណីដែលស្មានមិនដល់ដែលក្រុមយុវវ័យរាត្រីចរ បង្កើតល្បែងគួរឱ្យស្អប់ខ្ពើមនេះ បានកើតឡើងកាលពីវេលាម៉ោង៣និង២០នាទីទៀបភ្លឺថៃ្ងទី៣០ តុលា នៅតាមបណ្ដោយផ្លូវជាតិលេខ ៣ ឃុំព្រៃវិហារ ស្រុកគងពិសី ។
ប្រភពពីសមត្ថកិច្ចបានឱ្យដឹងថា ជនបង្កហេតុទាំង៣នាក់ ១-ឈ្មោះ ជួន វិន ភេទប្រុស អាយុ២៣ឆ្នាំ ជាអ្នកបើកម៉ូតូ រស់នៅភូមិឯកភាព ឃុំព្រៃវិហារ ស្រុកគងពិសី ខេត្តកំពង់ស្ពឺ ។ ២-ឈ្មោះ ឡេង ស្រីកា ភេទស្រី អាយុ១៩ឆ្នាំ អ្នករួមដំណើរ រស់នៅភូមិព្រៃស្តី ឃុំម្លប់ស ស្រុកសំពៅមាស ខេត្តពោធិ៍សាត់ បច្ចុប្បន្នបម្រើការងារនៅហាងខារ៉ាអូខេ យីហោរាត្រីពណ៌ស្វាយ ស្ថិតក្នុងភូមិព្រៃកេស ឃុំព្រៃវិហារ ស្រុកគងពិសី ខេត្តកំពង់ស្ពឺ ។ ៣-ឈ្មោះ ចាន់ លក្ខិណា ភេទស្រី អាយុ២៣ឆ្នាំ អ្នករួមដំណើរ រស់នៅភូមិព្រៃត្រាង ឃុំមានជ័យ ស្រុកឈូក ខេត្តកំពត បច្ចុប្បន្នបម្រើការងារនៅហាងខារ៉ាអូខេយីហោ រាត្រីពណ៌ស្វាយ ស្ថិតក្នុងភូមិព្រៃកេស ឃុំព្រៃវិហារ ស្រុកគងពិសី ខេត្តកំពង់ស្ពឺ ។
ប្រភពបន្តថាជនសង្ស័យទាំង៣នាក់នេះជិះម៉ូតូមួយគ្រឿង ម៉ាកហុងដាធុនសេ១២៥ ពណ៌ខ្មៅ ស៊េរីឆ្នាំ២០១៩ ពាក់ស្លាកលេខកំពង់ស្ពឺ 1K-0404 ។ បើតាមការឆ្លើយសារភាពបានឱ្យដឹងថា មុនពេលបង្កហេតុពួកគេទាំងបីនាក់ ធ្វេីដំណើរពីហាងខារា៉អូខេមកដល់ចំណុចកើតហេតុ ស្ថិតតាមបណ្តោយផ្លូវជាតិលេខ៣ ជិតប៉ុស្តិ៍នគរបាលរដ្ឋបាលក្រាំងលាវ ក៏បានយកផ្លែដូងដែលផឹកទឹកអស់ គប់ទៅលើរថយន្តសណ្តោងរ៉ឺម៉ក មួយគ្រឿង ពាក់ស្លាកលេខព្រះសីហនុ 4A-8899 ដែលកំពុងបើកបរលើដងផ្លូវបណ្តាលឱ្យបែក ។
សមត្ថកិច្ចបានបញ្ជាក់ថា អ្នកបើកបរឈ្មោះ វ៉ែន វី ភេទប្រុស អាយុ៣៧ឆ្នាំ មានទីលំនៅភូមិសេកយៀ ឃុំអង្គត្នោត ស្រុកត្រាំកក់ ខេត្តតាកែវ ។
ក្រោយបង្កហេតុក្រុមជនស្រីប្រុសនេះបានជិះម៉ូតូគេចខ្លួន ចូលមកភូមិសាស្ដ្រស្រុកបសេដ្ឋ ត្រូវអ្នកបើកបររថយន្ត ដេញតាមរហូតមកទាន់នៅចំណុចផ្ទះសំណាក់យីហោហេងលី ស្ថិតនៅភូមិត្រពាំងខ្យង ឃុំទួលអំពិល ស្រុកបសេដ្ឋ ក៏រាយការណ៍ជូនសមត្ថកិច្ចឱ្យឃាត់ខ្លួនតែម្តង ។ នៅព្រឹកថ្ងៃដដែល មុខសញ្ញាជនសង្ស័យទំនើងប្រុសស្រី៣នាក់ ត្រូវបានសមត្ថកិច្ចស្រុកបសេដ្ឋធ្វេីការសាកសួរ និងកសាងសំណុំរឿងបញ្ជូន ទៅកាន់ស្នងការដ្ឋាននគរបាលខេត្តចាត់ការបន្តតាមផ្លូវច្បាប់ ។ នេះជាប្រការគួរឱ្យហួសចិត្តដែលពួកនាងៗខារ៉ាអូខេដៃឆៅ បង្កបាតុភាពតាមដងផ្លូវនៅពេលយប់ ដែលកន្លងមកមានតែក្រុមយុវជនឈាមរាវញៀនថ្នាំប៉ុណ្ណោះ ដែលរពឹសដៃធ្វើសកម្មភាពបែបនេះនៅតាមដងផ្លូវជាតិ ៕
ចែករំលែកព័តមាននេះ