ទូក.ងល្បីរន្ទឺឈ្មោះ«ព្រះទីនាំងសារាយអណ្ដែតចង្ហាន់ហុយ»ចុះលេងទឹកហើយ

ថ្ងៃទី ៣០ ខែ តុលា ឆ្នាំ ២០១៩
ម៉ោង ១៧:១៤
ពៅ សុខហ៊ាន

ខេត្តកំពង់ឆ្នាំង ៖ «ទូក.ង ព្រះទីនាំងសារាយអណ្ដែតចង្ហាន់ហុយ» ត្រូវបានធ្វើពិធីសូត្រមន្ត ក្រុងពាលី មុនឈានដល់ការបញ្ចុះទៅក្នុងទឹក ដើម្បីឲ្យកីឡាករហ្វឹកហាត់ នាព្រឹកថ្ងៃទី៣០ ខែតុលា ឆ្នាំ២០១៩ នេះ។ជាមួយគ្នានេះដែរ អាជ្ញាធរឃុំផ្សារ ស្រុកបរិបូណ៌បានអំពាវនាវដល់សប្បុរសជនជិតឆ្ងាយ សូមមេត្តាជួយឧបត្ថម្ភគាំទ្រដល់ក្រុមកីឡាករទូកង ដែលមានឈ្មោះល្បីរន្ទឺមួយនេះផងដែរ ។

លោក អ៊ុំ ចាន់ថន ក្រុមប្រឹក្សា ឃុំផ្សារ ស្រុកបរិបូណ៌ បានឲ្យដឹងថា ទូកងដែលមានឈ្មោះល្បីរន្ទឺដោយ សារតែការប្រណាំងមិនដែលចាញ់ បានធ្វើពិធីសូត្រមន្ត ក្រុងពាលី ចុះទឹកហើយនៅព្រឹកនេះ ដោយបានដង្ហែចេញពីវត្តវិហារហ្លួង ហៅវត្តផ្សារ ស្ថិតក្នុងភូមិផ្សារ ឃុំផ្សារ ស្រុកបរិបូណ៌ ហើយបានធ្វើដំណើរតាមផ្លូវជាតិលេខ៥ សំដៅទៅផ្សារពន្លៃ មុខសាលាស្រុកបរិបូរណ៌ រួចបន្ទាប់មកបន្តដំណើរ ដង្ហែចុះទៅក្នុងមាត់កំពង់ទឹកឆ្នុកទ្រូ ដើម្បីដាក់ចូលទៅក្នុងទឹក ដើម្បីឲ្យក្រុមកីឡាករបានហ្វឹកហាត់ មុននឹងឈានចូលទៅដល់ការចូលរួមប្រកួតថ្នាក់ជាតិ ក្នុងពិធីអំទូក អកអំបុក និងសំពះព្រះខែ ក្នុងពេលខាងមុខនេះ ។

លោកបានបញ្ជាក់ថា អ្វីដែលចោទជាសំខាន់នោះ បច្ចុប្បន្នក្រុមកីឡាទូកមួយនេះមិនទាន់មានថវិកាគ្រប់គ្រាន់សម្រាប់ធ្វើការហ្វឹកហាត់ និងថវិកាសម្រាប់ចេញដំណើរទៅចូលរួមប្រកួតនោះទេ។ ហេតុនេះហើយក្នុងនាមលោកជាក្រុមប្រឹក្សា ឃុំផ្សារ ជំនួសមុខឲ្យក្រុមកីឡាករ សូមអំពាវនាវដល់សប្បុរសជនជិតឆ្ងាយសូមមេត្តាជួយឧបត្ថម្ភដល់ទូកងឈ្មោះព្រះទីនាំងសារាយអណ្ដែតចង្ហាន់ហុយនេះផង ។

គួររំលឹកដែរថា ទូក.ងឈ្មោះ «ព្រះទីនាំងសារាយអណ្តែត ចង្ហាន់ហុយ» គឺជាទូកងមួយក្នុងចំណោមទូកជាច្រើនក្នុងខេត្តកំពង់ឆ្នាំងដែលធ្លាប់ទទួលជ័យជំនះលេខ១ ទាំងល្បឿន និងសោភ័ណ្ឌភាព មិនដែលចាញ់ម្ដងណាឡើយ ។ ទូកនេះស្ថិតនៅក្នុងវត្តវិហារហ្លួង ឃុំផ្សារ ស្រុកបរិបូណ៌ មានប្រវែង ២៩,៣០ម៉ែត្រ មានចំណុះជើងចែវ៤៨នាក់ បូករួមអ្នករាំក្បាលទូក និងអ្នកបាចទឹកផង មានសរុបចំនួន៥០នាក់ ។

សូមបញ្ជាក់ដែរថា តាមរយៈលោកយុទ្ឋ វុទ្ធី ពលករធ្វើការនៅប្រទេសកូរ៉េ ដែលមានស្រុកកំណើតនៅភូមិផ្សារ ឃុំផ្សារ ស្រុកបរិបូណ៌ក៏បានអំពាវនាវដល់ពលករដែលធ្វើការជាមួយគ្នាបានប្រាក់ចំនួន៥២ម៉ឺនវ៉ុន ស្មើនឹងជាង៤០០ដុល្លារ ក៏បានប្រគល់ជូនគណៈកម្មការទូកងឈ្មោះព្រះទីនាំងសារាយអណ្ដែតចង្ហាន់ហុយផងដែរនៅព្រឹកថ្ងៃក្រុងពាលីបញ្ចុះទូកនោះចូលក្នុងទន្លេ ៕ (កែសម្រួលដោយ ៖ ធីតា)