ប្រទេសកូរ៉េខាងជើង ៖ កូរ៉េខាងជើង កាលពីថ្ងៃទី១២ សីហា បានបាញ់សាកល្បងមីស៊ីលបាលីស្ទិកទី២ អំឡុងពេលមិនដល់១សប្ដាហ៍ផង ។ នេះជាសកម្មភាពមួយដែល ហាក់ដូចជាការបង្ហាញពីការតវ៉ាប្រឆាំងការធ្វើសមយុទ្ធយោធារួម នាពេលខាងមុខនេះ រវាងកូរ៉េខាងត្បូង និងសហរដ្ឋអាមេរិក ដែលក្រុងព្យុងយ៉ាងចាត់ទុកថា ជាការរៀបចំសម្រាប់ការលុកលុយមួយ ។
យោងតាមកងទ័ពកូរ៉េខាងត្បូងថា មីស៊ីលបាលីស្ទិក១គ្រាប់ ត្រូវបានបាញ់ចេញពីតំបន់ឆ្នេរសមុទ្រវ៉ុនសាន ភាគខាងកើតប្រទេស កាលពីព្រឹកថ្ងៃទី១១ សីហា ហើយហោះហើរក្នុងចម្ងាយជាង៧០០គីឡូម៉ែត្រ ។ ក្រសួងការពារប្រទេសជប៉ុនក៏អះអាងពីការចាប់ឃើញដែរការបាញ់មីស៊ីលនោះ ដោយបញ្ជាក់ថា មីស៊ីលនេះ ក្រោយការបាញ់ចេញបានទៅធ្លាក់ក្នុងដែនទឹកខាងក្រៅតំបន់សេដ្ឋកិច្ចដាច់មុខរបស់ខ្លួននៅចន្លោះឧបទ្វីបកូរ៉េ និងជប៉ុន ។
ការបាញ់មីស៊ីលបាលីស្ទិកទាំង២លើកនោះ របស់កូរ៉េខាងជើងធ្វើឡើងចន្លោះពេលគ្នាតែប៉ុន្មានថ្ងៃ ខណៈប្រទេសនេះ បដិសេធចាប់តាំងពីច្រើនឆ្នាំមកហើយ ការចរចាឡើងវិញ ជាមួយសហរដ្ឋអាមេរិក និងកូរ៉េខាងត្បូង។ យោងតាមបណ្ដាអ្នកជំនាញការថា កូរ៉េខាងជើងតែងប្រើសមយុទ្ធយោធារបស់អាមេរិក និងកូរ៉េខាងត្បូង ជាលេសសម្រាប់បង្កើនសកម្មភាពសាកល្បងអាវុធរបស់ខ្លួន ៕
ចែករំលែកព័តមាននេះ