សូមប្រយ័ត្នបន្ត ! ព្យុះទី១៧ ចាប់ពីថ្ងៃទី១២ ដល់១៦ សីហា នឹងមានខ្យល់បោកបក់ខ្លាំង
- ភ្នំពេញ
រាជធានីភ្នំពេញ ៖ ក្រសួងធនធានទឹក និងឧតុនិយមបានឱ្យដឹងថា ព្យុះទី១៧ ចាប់ពីថ្ងៃទី១២ ដល់១៦ ខែសីហា ឆ្នាំ២០២៦នឹងធ្វើឱ្យមានខ្យល់បោកបក់ខ្លាំង ។
យោងតាមសេចក្តីជូនដំណឹងស្តីពីឥទ្ធិពលខ្យល់ព្យុះបោកបក់ខ្លាំងរបស់ក្រសួងធនធានទឹកបានឱ្យដឹងថា សម្ពាធទាបដែលកំពុងកើតនៅលើមហាសមុទ្រប៉ាស៊ីហ្វិកខាងលិចនឹងវិវត្តទៅជាព្យុះទី១៧ នៅថ្ងៃទី១២ ខែសីហា ឆ្នាំ២០២៦ រួមជាមួយនឹងព្យុះ
ទី១៦ ឈ្មោះ ភីលូ (Peilou) T2616 ព្យុះទី១៥ ឈ្មោះចាន់ហម (Chan-hom) T2615 និងព្យុះសង្ឃរាទី១៣ ឈ្មោះដូលហ្វីន (Dolphin) T2613 មានឥទ្ធិពលខ្លាំងលើរបបខ្យល់មូសុងនិរតី ប៉ុន្តែព្រះរាជាណាចក្រកម្ពុជាពុំស្ថិតនៅក្នុងគន្លងផ្លូវដើរនៃព្យុះទាំងនេះទេ ។
ក្រសួងបានលើកឡើងថា ស្ថានភាពបែបនេះនឹងធ្វើឱ្យធាតុអាកាស ចាប់ពីថ្ងៃទី១២ ដល់ថ្ងៃទី១៦ ខែសីហា ឆ្នាំ២០២៦ នឹងអាចមានខ្យល់កន្ត្រាក់បោកបក់ខ្លាំងដែល ក្នុងនោះនៅ តំបន់វាលទំនាបមានខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងរាជធានីភ្នំពេញ អាចនឹងមានខ្យល់កន្ត្រាក់បោកបក់ខ្លាំងក្នុងល្បឿន១៥ម៉ែត្រ/វិនាទី។
ចំណែកនៅតំបន់ខ្ពង់រាបមានខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ អាចនឹងមានខ្យល់កន្ត្រាក់បោកបក់ខ្លាំងក្នុងល្បឿន២០ម៉ែត្រ/វិនាទី។ ដោយឡែក នៅតំបន់មាត់សមុទ្រមាន ខេត្តកោះកុង ព្រះសីហនុ កំពត កែប និងជួរភ្នំបូកគោ អាចនឹងមានខ្យល់កន្ត្រាក់បោកបក់ ខ្លាំងក្នុងល្បឿន១៨ម៉ែត្រ/វិនាទី។ រលកសមុទ្របោកបក់ខ្លាំងដែលមានកម្ពស់មធ្យមអប្បបរមា០,៥០ម៉ែត្រ និងកម្ពស់មធ្យមអតិបរមា ២,០០ម៉ែត្រ ។
ក្រសួងបានលើកឡើងថា យោងលើការព្យាករដូចបានជម្រាបជូនខាងលើ សូមសាធារណជនមេត្តាប្រុងប្រយ័ត្នខ្ពស់ចំពោះបាតុភូតខ្យល់ កន្ត្រាក់បោកបក់ខ្លាំងនេះ ជាពិសេស បងប្អូនដែលធ្វើដំណើរតាមផ្លូវគោកនិងផ្លូវទឹក ។ ក្រសួងធនធានទឹក និងឧតុនិយម នឹងបន្តធ្វើការតាមដាន និងវិភាគអំពីស្ថានភាពធាតុអាកាស ដើម្បីជម្រាបជូនជាបន្តបន្ទាប់ក្នុងករណីមានការប្រែប្រួល ៕
ចែករំលែកព័តមាននេះ