ប្រទេសវៀតណាម៖ ខេត្តដាឡាក់ តំបន់ខ្ពង់រាបភាគកណ្តាលវៀតណាម បានកត់ត្រា អ្នកស្លាប់ដោយជំងឺគ្រុនឈាមដំបូងក្នុងឆ្នាំ២០២៦ ខណៈចំនួនអ្នកឆ្លងនៅទូទាំងខេត្តបានកើនដល់ជាង ៣,១០០នាក់ គិតត្រឹមថ្ងៃទី១០ ខែសីហា។ នេះបើយោងតាមការចុះផ្សាយរបស់សារព័ត៌មាន Tuoi Tre។
អ្នកស្លាប់ជាបុរសអាយុ ៧៧ឆ្នាំ រស់នៅសង្កាត់តាន់អាន និងមានប្រវត្តិកើតជំងឺទឹកនោមផ្អែមប្រភេទទី២។ លោកត្រូវបានបញ្ជូនទៅមន្ទីរពេទ្យកាលពីថ្ងៃទី៣០ ខែកក្កដា បន្ទាប់ពីមានរោគសញ្ញាខ្សោយកម្លាំង និងនិយាយមិនច្បាស់។ ក្រោយមក ស្ថានភាពបានធ្ងន់ធ្ងរ និងបានស្លាប់នៅព្រឹកថ្ងៃទី៣ ខែសីហា។
ការធ្វើតេស្តដោយវិទ្យាស្ថានអនាម័យ និងរោគរាតត្បាតតំបន់ខ្ពង់រាបកណ្តាល បានបញ្ជាក់ថា អ្នកជំងឺមានផ្ទុក មេរោគគ្រុនឈាមប្រភេទទី២។
ការស៊ើបអង្កេតរបស់មជ្ឈមណ្ឌលគ្រប់គ្រងជំងឺខេត្តដាឡាក់ បានរកឃើញថា គិតត្រឹមថ្ងៃទី៦ ខែសីហា សង្កាត់តាន់អានមានករណីគ្រុនឈាម ៤៩ករណី និងមានទីតាំងផ្ទុះជំងឺ ៦កន្លែង។ អ្នកជិតខាងម្នាក់ក៏ត្រូវបានសង្ស័យថាឆ្លងជំងឺ បន្ទាប់ពីមានអាការៈក្តៅខ្លួន។
អាជ្ញាធរសុខាភិបាលបានចាត់វិធានការទប់ស្កាត់ ដោយបាញ់ថ្នាំកម្ចាត់មូសនៅផ្ទះអ្នកស្លាប់ និងតំបន់ជុំវិញ ព្រមទាំងពិនិត្យ និងគ្រប់គ្រងទីតាំងផ្ទុះជំងឺថ្មី៕
ចែករំលែកព័តមាននេះ