រដ្ឋធានីអាស្តាណា ៖ នាព្រឹកថ្ងៃសៅរ៍ ទី១៧ ខែតុលា ឆ្នាំ២០២៦នេះ នៅរដ្ឋធានីអាស្តាណា នៃសាធារណរដ្ឋកាហ្សាក់ស្ថាន ក្នុងឱកាស អមដំណើរដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងដំណើរបំពេញទស្សនកិច្ចផ្លូវការ និងទស្សនកិច្ចការងារនៅសាធារណរដ្ឋកាហ្សាក់ស្ថាន លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោក ហ្សេនីស កាស៊ីមប៊េក (ZHENIS KASSYMBEK) អភិបាលនៃរដ្ឋធានីអាស្តាណា បានអញ្ជើញចូលរួមក្នុងពិធីផ្លាស់ប្តូរឯកសារអនុស្សារណៈយោគយល់គ្នា ស្តីពីការបង្កើតចំណងសម្ព័ន្ធមេត្រីភាពរវាងរាជធានីភ្នំពេញ នៃព្រះរាជាណាចក្រកម្ពុជា និងរដ្ឋធានីអាស្តាណា នៃសាធារណរដ្ឋកាហ្សាក់ស្ថាន ដែលពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម Kassym-Jomart Tokayev ប្រធានាធិបតី នៃសាធារណរដ្ឋកាហ្សាក់ស្ថាន ។
យោងតាមសេចក្ដីរាយការពីរដ្ឋធានីអាស្តាណា លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្សរដ្ឋបាលរាជធានីភ្នំពេញ បានបញ្ជាក់ថា រាជធានីភ្នំពេញ និងរដ្ឋធានីអាស្តាណា បានព្រមព្រៀមចុះអនុស្សរណៈយោគយល់គ្នា ដើម្បីបង្កើតចំណងសម្ព័ន្ធមេត្រីភាពជាមួយគ្នា ក្នុងគោលបំណងជំរុញការអភិវឌ្ឍចំណងមិត្តភាព និងកិច្ចសហប្រតិបត្តិការលើកិច្ចការសំខាន់ៗរួមមាន ៖
១. ការសម្របសម្រួលការផ្លាស់ប្តូរគណៈប្រតិភូទៅវិញទៅមកនិងប្រតិភូធុរកិច្ចនានា ដើម្បីធ្វើឱ្យរីកចម្រើននូវកិច្ចសហប្រតិបតិ្តការក្នុងវិស័យពាណិជ្ជកម្ម សេដ្ឋកិច្ច វិទ្យាសាស្ត្រ និងនវានុវត្តន៍ បញ្ញាសិប្បនិម្មិត បច្ចេកវិទ្យាឌីជីថល វប្បធម៌ កីឡា ការដឹកជញ្ជូន ទេសចរណ៍ និងវិស័យផ្សេងៗទៀត ដែលមានប្រយោជន៍រួម។
២. ជំរុញការផ្លាស់ប្តូរព័ត៌មាន និងបទពិសោធន៍នៅក្នុងវិស័យគ្រប់គ្រងទីក្រុងជួយសម្រួលក្នុងការរៀបចំទស្សនកិច្ចរបស់ក្រុមអ្នកច្នៃប្រឌិត និងឥស្សរជនវប្បធម៌ក៏ដូចជាការរៀបចំពិព័រណ៍សិល្បៈ ។
៣. ជំរុញការអភិវឌ្ឍវិស័យសក្តានុពលថ្មីៗ និងទម្រង់នៃកិច្ចសហប្រតិបត្តិការ ប្រកបដោយនវានុវត្តន៍ ដើម្បីលើកកម្ពស់សក្តានុពលរបស់រដ្ឋបាលទីក្រុងនិងធ្វើឱ្យប្រសើរឡើងនូវប្រសិទ្ធភាពនៃការគ្រប់គ្រងធនធាន ។
៤. សិក្សាស្វែងយល់ពីលទ្ធភាពនៃការអភិវឌ្ឍ និងការអនុវត្តគម្រោងរួមគ្នាដោយផ្អែកលើលក្ខខណ្ឌដែលផ្តល់ផលប្រយោជន៍ទៅវិញទៅមក។
លោកស្រីអ្នកនាំពាក្យ ក៏បានបញ្ជាក់បន្ថែមទៀតថា នៅបន្ទាប់ពីពិធីប្តូរឯកសារអនុស្សរណៈយោគយល់គ្នានេះរួចមក លោក ឃួង ស្រេង អភិបាលនៃគណៈអភិបាលរាជធានីភ្នំពេញ ក៏បានប្រគល់ជូននូវលិខិតអញ្ជើញ លោក ហ្សេនីស កាស៊ីមប៊េក (ZHENIS KASSYMBEK) អភិបាលនៃរដ្ឋធានីអាស្តាណា ដើម្បីដឹកនាំគណៈប្រតិភូទៅបំពេញទស្សនកិច្ចនៅរាជធានីភ្នំពេញ នាពេលវេលាសមស្របណាមួយផងដែរ ៕
ចែករំលែកព័តមាននេះ