ទីក្រុងប៉ារីស៖ មនុស្សរាប់ម៉ឺននាក់គ្រោងហែបាតុកម្មទូទាំងប្រទេសបារាំងនៅថ្ងៃសៅរ៍សប្ដាហ៍នេះ។ សិស្ស សមាជិកសហជីព និងក្រុមអាវកាក់ពណ៌លឿងកំពុងរួបរួមកម្លាំងគ្នាតវ៉ាករណីទំនិញឡើងថ្លៃ និងបញ្ហាអន់ថយនៃសង្គមកិច្ច។ មុនដំបូង ចលនាតវ៉ាកើតឡើងតែនៅក្នុងសាលារៀននៃទីក្រុងប៉ារីសប៉ុណ្ណោះកាលពីខែកញ្ញាដើម្បីតវ៉ាពាក់ព័ន្ធនឹងការខ្វះខាតគ្រូបង្រៀន និងគ្រឿងបរិក្ខារនៅក្នុងសាលារៀនមានលក្ខណៈរខេករខាកខ្វះមុខខ្វះក្រោយ។
ក្រោយមក ការតវ៉ានោះចេះតែរីកធំឡើងៗរហូតដល់ក្លាយជាការតវ៉ាពេញផ្ទៃប្រទេស។ លើកនេះ មិនត្រឹមតែពាក់ព័ន្ធនឹងសាលារៀនប៉ុណ្ណោះទេ ប៉ុន្តែទាមទារឱ្យមានការដោះស្រាយបញ្ហាវិសមភាពនៅក្នុងសង្គម ខ្ទង់ចំណាយលើវិស័យសង្គមកិច្ចតិចតួស្ដួចស្ដើង និងការធ្លាក់ចុះក្រោមកម្រិតស្តង់ដារ។ ចលនាតវ៉ានេះកើតឡើងនៅក្នុងគ្រាលំបាកសម្រាប់ប្រទេសបារាំង។ លោកម៉ាក្រុងកំពុងជិតឈានដល់ដំណាក់កាលដឹកនាំចុងក្រោយនៃអាណត្តិដឹកនាំរបស់លោក។
នាយករដ្ឋមន្ត្រីបារាំង លោកឡឺគ័រនូ ថ្លែងថាអាជ្ញាធរកំពុងបារម្ភថាការតវ៉ានេះអាចនឹងក្លាយជាបញ្ហាអស្ថិរភាព។ រដ្ឋាភិបាលដាក់ការស្ដីបន្ទោសថាក្រុមឆ្វេងនិយមជាអ្នកដុតបញ្ឆេះឱ្យមានចលនាតវ៉ា។ លោកថ្លែងបន្តទៀតថានេះជាពេលដែលប្រទេសជាតិកំពុងជួបនឹងបញ្ហាលំបាក។ កាលៈទេសៈនេះមានសង្គ្រាម អតិផរណា និងបញ្ហាពាក់ព័ន្ធនឹងថ្លៃចំណាយលើជីវភាពប្រចាំថ្ងៃ។ ប្រធានគណបក្សប្រឆាំង លោកហ្សកដង់ បាដេឡា (Jordan Bardella) យល់ថាអំពើហិង្សាអាចនឹងកើតមានឡើង។ លោកថាលោកបារម្ភយ៉ាងខ្លាំង។ វាអាចក្លាយជាទិវាចលាចលសម្រាប់ប្រទេសបារាំង។
លោកឡឺគ័រនូថ្លែងថាចលនាតវ៉ាលើកនេះក្លាយជាអំពើហិង្សាដ៏ខ្លាំងក្លាមិនធ្លាប់មាននៅក្នុងរយៈពេលជាច្រើនទសវត្សរ៍ចុងក្រោយ។ ក្នុងនោះ នគរបាលជាង៩០០នាក់រងរបួស។ នគរបាលក៏ត្រូវមហាជនរិះគន់យ៉ាងខ្លាំងផងដែរចំពោះការឆ្លើយតបរបស់ពួកគេទៅនឹងចលនាតវ៉ានេះដោយសារពួកគេក៏បង្កអំពើហិង្សាផងដែរដូចជាប្រើហិង្សាទៅលើយុវជនវ័យក្មេងជាដើម។ ក្រុមអ្នកតាមដានកំពុងស៊ើបអង្កេតសំណុំរឿងយ៉ាងតិចម្ភៃពាក់ព័ន្ធនឹងករណីដែលនគរបាលប្រើប្រាស់អំពើហិង្សា៕ ប្រភព៖ Reuters
ចែករំលែកព័តមាននេះ