កម្លាំងប្រតិបត្តិការសឹករងកំពង់ឆ្នាំង ឃាត់ខ្លួនអ្នកសារព័ត៌មាន២នាក់ និងអ្នកបើកកាណូតម្នាក់ ពាក់ព័ន្ធជម្រិតប្រាក់ពីប្រជានេសាទ
- កំពង់ឆ្នាំង
ខេត្តកំពង់ឆ្នាំង ៖ អ្នកសារព័ត៌មានចំនួន២នាក់ និងអ្នកបើកកាណូត១នាក់ ត្រូវបានកងកម្លាំងប្រតិបត្តិការសឹករងកំពង់ឆ្នាំងផ្នែកបង្ក្រាបបទល្មើសនេសាទចាប់ឃាត់ខ្លួន បន្ទាប់ពីពួកគេធ្វើសកម្មភាពជម្រិតទារប្រាក់ពីប្រជានេសាទ ។
ការចាប់ខ្លួននេះ ធ្វើឡើងនៅថ្ងៃទី១៧ តុលា ឆ្នាំ២០២៦ បន្ទាប់ពីពួកគេធ្វើសកម្មភាពជម្រិតទារប្រាក់ពីប្រជានេសាទនៅចំណុចព្រែកជីក ភូមិអន្លង់មេត្រី ឃុំពាមឆ្កោក ស្រុកជលគិរី ខេត្តកំពង់ឆ្នាំង ។
លោក ប៊ី ចាន់រស្មីនី មេបញ្ជាការរងតំបន់ប្រតិបត្តិការសឹករងកំពង់ឆ្នាំងបានបញ្ជាក់ថាដោយទទួលបានបទបញ្ជាពីលោកឧត្តមសេនីយ៍ទោ សេង ធារិន មេបញ្ជាការរង និងជានាយសេនាធិការយោធភូមិភាគទី៥ និងជាប្រធានបង្ក្រាបបទល្មើសបឹងទន្លេសាប នៅព្រឹកនេះ អង្គភាពរបស់លោកបានឃាត់ខ្លួនអ្នកសារព័ត៌មាន២រូប និងអ្នកបើកកាណូត១នាក់ ពីបទជម្រិតទារប្រាក់ពីប្រជានេសាទចំនួន១លាន៦០ម៉ឺនរៀល ឬស្មើនឹង៤០០ដុល្លារ ជាការដោះដូរឲ្យនេសាទដាក់ដាយនៅចំណុចព្រែកជីក ភូមិអន្លង់មេត្រី ។
អ្នកសារព័ត៌មានទាំង២រូបមាន ១-ឈ្មោះ អ៊ុ ថា ជាអ្នកយកព័ត៌មានឲ្យគេហទំព័រ WWW.RSM DAILY NEWS ។ ឈ្មោះនេះ បានប្រើប្រាស់ប័ណ្ណសម្គាល់អង្គភាពហួសសុពលភាព ថ្ងៃទី៣១ ខែធ្នូ ឆ្នាំ២០២៣ ។ ឈ្មោះដដែល នៅបានប្រើប្រាស់សម្គាល់ខ្លួនរបស់អង្គភាពដដែលនេះមួយទៀត ដែលចេញដោយក្រសួង និងហួសសុពលភាពថ្ងៃទី៣១ ខែធ្នូ ឆ្នាំ២០២៥ ។ ២-ឈ្មោះ សឹម សុខា អ្នកយកព័ត៌មានឲ្យអង្គភាព WWW.RSM DAILY NEWS ។ ឈ្មោះនេះ បានប្រើប្រាស់ប័ណ្ណសម្គាល់ខ្លួននៅមានសុពលភាព ត្រឹមថ្ងៃទី៣១ ខែធ្នូ ឆ្នាំ២០២៦ និង៣-ជាអ្នកបើកបរកាណូតឈ្មោះ ឃុត ផល្លី រស់នៅឃុំកំពង់ ហៅស្រុកកំពង់លែង។
ជនសង្ស័យទាំង៣នាក់ ត្រូវបានកម្លាំងប្រតិបត្តិការសឹករងកំពង់ឆ្នាំង រៀបចំសំណុំរឿងបញ្ជូនទៅអង្គភាពនគរបាលខេត្តកំពង់ឆ្នាំង ដើម្បីបន្តនីតិវិធី ។
លោក ប៉ុល វុទ្ធី ស្នងការរងនគរបាលខេត្តកំពង់ឆ្នាំង បានបញ្ជាក់តាមទូរសព្ទថា លោកបានទទួលព័ត៌មាននេះហើយ ប៉ុន្តែស្នងការដ្ឋាននៅមិនទាន់ទទួលបានសំណុំរឿងពីមន្ត្រីយោធាដែលបង្ក្រាបបទល្មើសនេសាទនៅឡើយទេ នៅរសៀលថ្ងៃទី១៧ តុលា នេះ ៕
ចែករំលែកព័តមាននេះ