ប្រជាកសិករដាំរុក្ខជាតិចង្ក្រងស្វា ដើម្បីធ្វើឱ្យដីមានជីវជាតិឡើងវិញ ងាយស្រួលបង្កបង្កើនផលដំណាំផ្សេងៗ
- ប៉ៃលិន
ខេត្តប៉ៃលិន ៖ រហូតមកដល់ថ្ងៃទី១៧ ខែតុលា ឆ្នាំ២០២៦ នេះ មានកសិករមួយចំនួនរស់នៅក្នុងក្រុងប៉ៃលិនបានលើកឡើងថា រុក្ខជាតិចង្ក្រងស្វាជារុក្ខជាតិគម្របដី ផ្តល់ជីវជាតិដល់ដី ធ្វើឱ្យដីធូរល្អ ជាហេតុនាំឱ្យកសិករដាំដំណាំផ្សេងៗ ទទួលបានទិន្នផលខ្ពស់ ។
រីឯអ្នកជំនាញនៃមន្ទីរកសិកម្ម រិក្ខាប្រមាញ់ និងនេសាទខេត្តប៉ៃលិន ក៏បានណែនាំឱ្យកសិ ករយករុក្ខជាតិនេះ ទៅដាំនៅតាមចម្ការរបស់ខ្លួន ដើម្បីកែប្រែដីឱ្យមានគុណភាពល្អឡើងវិញ បន្ទាប់ពីធ្វើកសិកម្មជាច្រើនឆ្នាំ ធ្វើឱ្យដីហូរតាមទឹកច្រោះសឹករិចរិល ខ្សោះជីវជាតិ ដែលជាហេតុធ្វើឱ្យទិន្នផលដំណាំធ្លាក់ចុះបន្តិចម្តងៗ ពីមួយឆ្នាំទៅមួយឆ្នាំ ដែលជាហេតុធ្វើឱ្យកសិករកាន់តែចំណាយច្រើនទៅលើការទិញជី ធ្វើកសិកម្ម បង្កឱ្យមានផលប៉ះពាល់ដល់គ្រួសារប្រជាកសិករផងដែរ ។
បើតាមប្រភពព័ត៌មានពីលោក ហួរ ដា ប្រជាកសិកររស់នៅក្នុងភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បានឱ្យដឹងថា គាត់បានចាប់ផ្តើមដាំរុក្ខជាតិចង្ក្រងស្វា ដែលជារុក្ខជាតិម្យ៉ាងសម្រាប់បង្កើតនូវគម្របដី នៅលើផ្ទៃដីចំនួន១ហិកតារបស់ខ្លួន មុនពេលដែលគាត់ដាំដំណាំពោតក្រហម នារដូវចុងដៃនៃឆ្នាំ២០២៦ នេះ ។
បើតាមប្រភពព័ត៌មានពីលោក ស វ៉េង អ្នកជំនាញផ្នែកកសិកម្មនៃមន្ទីរកសិកម្មរុក្ខប្រមាញ់ និងនេសាទ ខេត្តប៉ៃលិន បានលើកឡើងដែរថា រុក្ខជាតិចង្ក្រងស្វា ជារុក្ខជាតិគម្របដីផ្តល់ជីវជាតិដល់ដី និងកែប្រែគុណភាពដី ឱ្យមានជីវជាតិល្អសារថ្មីឡើងវិញ ។
លោកបន្តទៀតថា ដំណាំនេះ មានដុំពកនៅជាប់នឹងឫសរបស់វា ដែលមានលទ្ធភាពស្រូបយកជាតិអាសូតពីបរិយាកាសមកចិញ្ចឹមដើមរបស់វា ហើយនឹងក្លាយទៅជាដីដែលមានជីវជាតិដ៏ល្អ នៅពេលដែលកសិករភ្ជួរដីលប់ដើមរុក្ខជាតិនេះទៅក្នុងដី ។
លោកបានបញ្ជាក់ថា រុក្ខជាតិចង្ក្រងស្វា អាចគ្រប់គ្រងរុក្ខជាតិចង្រៃតាមរយៈការលូតលាស់ដ៏លឿនរបស់វា ហើយអាចកាត់បន្ថយការហូរច្រោះរបស់ស្រទាប់ដី រក្សាសំណើមដល់ដីបានរយៈពេលយូរ និងកាត់បន្ថយសត្វល្អិតចង្រៃ ដែលបំផ្លាញដំណាំរបស់ប្រជាកសិករផងដែរ ។
លើសពីនេះ ទម្លាប់ការដាំដំណាំពោតរបស់កសិករ នៅក្នុងខេត្តប៉ៃលិន តែងតែភ្ជួររាស់ដី ហើយការនេះ ធ្វើឱ្យដីបានហូរច្រោះជីវជាតិ ជាហេតុធ្វើឱ្យដំណាំមានការថយចុះនូវទិន្នផលកាន់តែច្រើនឡើងៗ ។
ចំណែកកសិករផ្សេងៗទៀត ក៏បានឱ្យដឹងដែរថា ពួកគាត់ក៏នាំគ្នាដាំរុក្ខជាតិប្រភេទនេះ នៅតាមចំការរៀងៗខ្លួន ដើម្បីឱ្យដីនៅក្នុងចម្ការរបស់ខ្លួន ចាប់ផ្តើមផ្តល់ជីវជាតិឡើងវិញសម្រាប់បង្កឱ្យដំណាំពោត និងសណ្តែក ដែលពួកគាត់ដាំផ្តល់ទិន្នផលច្រើនជាងមុន ព្រោះបច្ចុប្បន្ននេះ ដីចំការរបស់ពួកគាត់លែងមានជីជាតិល្អដូចមុនហើយ ខណៈដែលបានប្រើជីគីមីជារៀងរាល់ឆ្នាំ ។ ពួកគាត់ខ្លះក៏បានដាំរុក្ខជាតិនេះ ហើយខ្លះទៀតក៏នឹងយកទៅដាំជាបន្តបន្ទាប់ ព្រោះងាយស្រួលជួយដល់ដីឱ្យមានសំណើម ធ្វើមានសត្វជន្លេនឡើងវិញ៕
ចែករំលែកព័តមាននេះ