ទីក្រុងតេអេរ៉ង់៖ ថ្ងៃនេះ ក្រុមឧទ្ទាមហ៊ូទីនៅប្រទេសយេម៉េនដែលជាសម្ព័ន្ធមិត្តចិត្តមួយថ្លើមមួយរបស់អ៊ីរ៉ង់បានវាយប្រហារយ៉ាងសន្ធាប់ទៅលើកប៉ាល់ដឹកទំនិញខ្នាតតូចមួយគ្រឿងនៅច្រកសមុទ្របាប អែល មេនដេប (Bab el-Mandeb) បណ្ដាលឱ្យស្លាប់បុគ្គលិកនៅលើកប៉ាល់បីនាក់។ ខាងលើនេះជាការអះអាងរបស់ឆ្មាំការពារដែនសមុទ្រយេម៉េន២នាក់ និងមន្ត្រីយោធា២នាក់ទៀតនៅក្នុងជួររដ្ឋាភិបាលយេម៉េន។ ប្រសិនបើរឿងនេះជាការពិតមែន វាជាករណីដំបូងបំផុតដែលក្រុមហ៊ូទីវាយប្រហារកប៉ាល់ដោតទង់ជាតិប្រទេសតង់ហ្សានីចាប់តាំងពីសង្គ្រាមអ៊ីរ៉ង់ផ្ទុះឡើងដំបូង។
ក្រុមហ៊ូទីមិនទាន់ប្រកាសទទួលស្គាល់ថានេះជាស្នាដៃរបស់ខ្លួននៅឡើយទេ។ ប៉ុន្តែពួកគេប្រកាសបិទខ្ទប់ដែនសមុទ្រប្រទេសអារ៉ាប៊ីសាអូឌីតនៅសមុទ្រក្រហមកាលពីខែកក្កដាដើម្បីឆ្លើយតបទៅនឹងអ្វីដែលពួកគេហៅថាជាការហ៊ុមព័ទ្ធពីសំណាក់អារ៉ាប៊ីសាអូឌីតទៅលើប្រទេសយេម៉េន។ អង្គការរបស់អង់គ្លេសដែលតាមដានស្ថានការណ៍នៅលើលំហសមុទ្រថ្លែងថាខ្លួនទទួលដំណឹងថាកប៉ាល់ដឹកទំនិញមួយគ្រឿងនៅពេលបើកទៅដល់តំបន់មាត់សមុទ្រអាល់ម៉ូខា (al-Mokha) ប្រទេសយេម៉េន ក៏រងការបាញ់ប្រហារពីគ្រាប់មីស៊ីលមិនស្គាល់អត្តសញ្ញាណ និងបណ្ដាលឱ្យស្លាប់មនុស្សមួយចំនួន។
ក្រុមហ៊ុនរបស់អង់គ្លេសឈ្មោះអាំប្រ៊ី (Ambrey) ដែលធ្វើការលើផ្នែកសន្តិសុខលំហសមុទ្រថ្លែងថាកប៉ាល់នោះជាគោលដៅវាយប្រហារពីសំណាក់ក្រុមហ៊ូទី បណ្ដាលឱ្យស្លាប់មនុស្សបីនាក់។ នៅពេលនោះ កប៉ាល់បោះយុថ្កាឈប់សំចតនៅរយៈចម្ងាយ៣,៣ម៉ាយភាគឦសានកោះផឺរីម (Perim) ប្រទេសយេម៉េន។ ប្រភពពីប្រទេសយេម៉េនបង្ហើបឱ្យដឹងថានៅក្នុងចំណោមជនរងគ្រោះដែលបានស្លាប់នោះ ២នាក់ជាជនជាតិប៉ាគីស្ថាន និងម្នាក់ជាជនជាតិឥណ្ឌូណេស៊ី។ នៅពេលនោះ កប៉ាល់ដឹកទំនិញចាកចេញដំណើរពីតំបន់សាឡាឡា (Salalah) ប្រទេសអូម៉ង់ ឆ្លងកាត់ប្រទេសជីប៊ូទី (Djibouti)។ ក្រោយការវាយប្រហារនោះ បុគ្គលិកនៅលើកប៉ាល់ចាប់ផ្ដើមបាត់ម្ចាស់ការ ហើយក្រោយមក ឆ្មាំការពារដែនសមុទ្រយេម៉េនក៏ចូលទៅកៀកកប៉ាល់។
ករណីវាយប្រហារកប៉ាល់តូចធំនានានៅច្រកសមុទ្របាប អែល មេនដេប ចាប់ផ្ដើមកើតមានកាន់តែញឹកញាប់ជាងមុន ហើយធ្វើឱ្យមានភាពមិនប្រាកដប្រជាសម្រាប់ក្រុមហ៊ុនរកស៊ីខាងដឹកជញ្ជូនទំនិញដែលប្រឈមនឹងបញ្ហាពិបាកស្រាប់ទៅហើយដោយសារការបិទច្រកសមុទ្រហ័រម៉ូស។ កាលពីសប្ដាហ៍មុន ជាមធ្យម កប៉ាល់ដឹកទំនិញ៣២គ្រឿងបើកកាត់ច្រកបាប អែល មេនដេបក្នុងមួយថ្ងៃៗ។ កាលពីមុនពេលបិទច្រកសមុទ្រនេះ កប៉ាល់ឆ្លងកាត់ជាមធ្យម៥០គ្រឿងក្នុងមួយថ្ងៃៗ។ ក្រុមហ៊ុនអាំប៊្រីកត់សម្គាល់ថាកប៉ាល់ដែលរងការបាញ់ប្រហារនោះមិនមែនជារបស់ប្រទេសអារ៉ាប៊ីសាអូឌីតទេ។ កប៉ាល់នេះចាកចេញដំណើរពីអាល់ម៉ូខាកាលពីថ្ងៃសៅរ៍៕ ប្រភព៖ Reuters
ចែករំលែកព័តមាននេះ