ទីក្រុងបូហ្គោតា៖ ក្រោយហេតុការណ៍រញ្ជួយដីនៅប្រទេសកូឡុំប៊ីកាលពីម្សិលមិញ គេឃើញថាមនុស្សជាច្រើននាក់បន្តជាប់ផុងនៅក្រោមគំនរបាក់បែក។ ក្រុមអ្នកស្វែងរក និងជួយសង្គ្រោះកំពុងធ្វើការយ៉ាងដុតដៃដុតជើងនៅតាមទីក្រុងរាប់សិបកន្លែងដើម្បីស្វែងរកមនុស្សជាងបីពាន់នាក់ដែលបាត់ខ្លួន។ អភិបាលក្រុង និងអភិបាលខេត្តមកពីខាលី (Cali), ប៉េរ៉េរ៉ា (Pereira), ឆូកូ (Choco) និងម៉ានីហ្សាឡេស (Manizalez) ថ្លែងថាមនុស្សយ៉ាងតិច១៧៩បានស្លាប់នៅក្នុងតំបន់របស់ខ្លួន។ អគារ១៦០០ខ្នងខូចខាត ឬបាក់រលំដល់ដី។ ទាហាន រួមជាមួយក្រុមអ្នកសង្គ្រោះ និងក្រុមគ្រួសារអ្នកបាត់ខ្លួនត្រូវតែជីកកកាយគំនរបាក់បែកដោយដៃទទេដើម្បីពន្លឿនការស្វែងរក។
ឆូកូជាតំបន់ដែលហ៊ុមព័ទ្ធចំណុចកណ្ដាលនៃការរញ្ជួយដីលើកនេះ និងជាតំបន់ដ៏មានជីវភាពក្រីក្របំផុតមួយរបស់ប្រទេសកូឡុំប៊ីដោយសារសង្គ្រាមរវាងចលនាប្រដាប់អាវុធនានាដែលប្រជែងគ្នា។ ទីនេះមួយភាគធំអាចធ្វើដំណើរទៅបានតាមទូក តាមរយៈការដើរកាត់ព្រៃ ឬតាមយន្តហោះ។ ដូច្នេះ គេមានព័ត៌មាននៅក្នុងដៃតិចតួចជាទីបំផុតពាក់ព័ន្ធនឹងទំហំនៃការខូចខាតដោយសារការរញ្ជួយដីលើកនេះ។ ប្រធានាធិបតីកូឡុំប៊ី លោកអាបេឡាដូ ដឺឡា អេស្ព្រីយ៉ា (Abelardo De la Espriella) បានចុះទៅពិនិត្យមើលសភាពការណ៍នៅរដ្ឋធានីរបស់តំបន់ឆូកូកាលពីរាត្រីថ្ងៃចន្ទ និងប្រកាសថាលោកបានចល័តកងទ័ព និងនគរបាលដើម្បីចុះដោះស្រាយបញ្ហាលំបាក។
លោកថ្លែងបន្តទៀតថាបានបញ្ជូនក្រុមវិស្វករ ក្រុមអ្នកជួយសង្គ្រោះ និងសត្វសុនខសម្រាប់ហិតក្លិន។ លោកសន្យាថានឹងមិនបណ្ដោយឱ្យឆូកូក្លាយជាទឹកដីដែលគេបោះបង់ចោលជាដាច់ខាត។ ការរញ្ជួយដីលើកនេះជាវិញ្ញាសាសាកល្បងដ៏ធំមួយ និងជាលើកដំបូងសម្រាប់ការដឹកនាំរបស់លោកដឺឡា អេស្ព្រីយ៉ា ដែលទើបតែស្បថចូលកាន់តំណែងកាលពីថ្ងៃសុក្រសប្ដាហ៍មុន។ លោកក្លាយជាបុគ្គលដ៏ចម្រូងចម្រាសដោយសារតែការសច្ចាយ៉ាងមុតមាំថាត្រូវតែកម្ចាត់ក្រុមឧក្រិដ្ឋជនគ្រប់ប្រភេទឱ្យដល់ឫសគល់នៅក្នុងប្រទេសស្ថិតនៅលើជួរភ្នំអង់មួយនេះ (Ande)។ ក្រុមគ្រួសារដែលបាត់បង់សាច់ញាតិរបស់ខ្លួនបានបង្ហោះដំណឹងនេះនៅលើគេហទំព័រនានាដែលរៀបចំដោយជនស៊ីវិល។
ជនជាតិកូឡុំប៊ីឈ្មោះដាណា ការ៉ូឡាយណា ហ្សាម៉ូរ៉ា (Dana Carolina Zamora) បានបង្ហោះរូបភាពឪពុកមារបស់អ្នកស្រីអាយុ៦០ឆ្នាំដែលកំពុងបាត់ខ្លួន។ គាត់ឈ្មោះមីហ្គែល អានហ្គែល ហ្សាម៉ូរ៉ា (Miguel Ángel Zamora) នៅពេលបណ្ដើរឆ្កែដើរលេងសុខៗក៏កើតមានគ្រោះរញ្ជួយដី ហើយគាត់ក៏បាត់ខ្លួនជារៀងរហូត។ មុនពេលកើតហេតុ បុរសកសិករម្នាក់នេះរស់នៅតំបន់ជនបទអែលខាយរ៉ូ (El Cairo) មិនឆ្ងាយប៉ុន្មានពីចំណុចកណ្ដាលនៃការរញ្ជួយនៅសាន់ ចូសេ ដែល ប៉ាម៉ា (San Jose Del Palmar) ប៉ុន្មានទេ។ អាជ្ញាធរមូលដ្ឋានប្រាប់ថាអែលខាយរ៉ូ៨០%រងការខូចខាត។ ទីក្រុងនេះមានប្រជាជនរស់នៅប្រហែល៧ពាន់នាក់។ ហ្សាម៉ូរ៉ាប្រាប់ថាឪពុកមារបស់អ្នកស្រីរស់នៅក្នុងផ្ទះបុរាណមួយខ្នងសង់អំពីឈើ និងដីភក់។ អ្នកស្រីរៀបរាប់បន្តទៀតថាយើងភ័យណាស់ យើងសង្ឃឹមថាមិនមានអ្វីកើតឡើងចំពោះគាត់ទៅចុះ។ ប៉ុន្តែរហូតមកដល់ពេលនេះ យើងបាត់ដំណឹងរបស់គាត់ទាំងស្រុង៕ ប្រភព៖ AP
ចែករំលែកព័តមាននេះ