ខេត្តស្វាយរៀង ៖ នៅថ្ងៃទី១១ ខែសីហាឆ្នាំ២០២៦ គណៈបញ្ជាការឯកភាពខេត្តស្វាយរៀង បានបើកប្រតិបត្តិការចុះធ្វើរដ្ឋបាលចំហក្នុងទ្រង់ទ្រាយធំ ទៅលើទីតាំងសង្ស័យមួយចំនួន ដែលស្ថិតនៅក្នុងភូមិសាស្ត្រក្រុងបាវិត ដើម្បីបង្ក្រាបសកម្មភាពខុសច្បាប់ ពាក់ព័ន្ធនឹងការលួចលាក់ស្នាក់នៅ ធ្វើការងារខុសច្បាប់ និងការឆបោកតាមប្រព័ន្ធបច្ចេកវិទ្យា (Online Scam) ចំនួន០៨ទីតាំង រកឃើញទីតាំងចំនួន០២ ទីតាំង ដែលមានពាក់ព័ន្ធនឹង Online Scam រួមមាន ៖
១. ទីតាំង G16 (ម្ចាស់ឈ្មោះ សួស អែលពិសិដ្ឋ) ៖ ទោះបីជាពុំមានជនបរទេសស្នាក់នៅក៏ដោយ សមត្ថកិច្ចបានរកឃើញ និងដកហូតសម្ភារៈភស្តុតាងរួមមាន កុំព្យូទ័រយួរដៃ (Laptop) ចំនួន ៤ គ្រឿង និងទូរស័ព្ទដៃចម្រុះចំនួន ២៥ គ្រឿង ដែលសង្ស័យថា កំពុងត្រូវបានប្រើប្រាស់សម្រាប់សកម្មភាពឆបោក ។
២. ទីតាំង G18 (មិនស្គាល់ម្ចាស់ផ្ទះ)៖ រកឃើញជនបរទេសស្នាក់នៅចំនួន ៦នាក់ (ស្រី១នាក់) ព្រមទាំងលិខិតឆ្លងដែនចំនួន ៦ក្បាល និងទូរសព្ទដៃផ្ទាល់ខ្លួន ចំនួន ៨គ្រឿង ដែលសង្ស័យថា ពាក់ព័ន្ធនឹងករណី online scam ។ ដោយឃាត់ខ្លួនមនុស្សក្នុងរង្វង់ប្រតិបត្តិការចំនួន ០៦នាក់ ស្រី ០១នាក់ ជាជនជាតិវៀតណាម ព្រមទាំងបានដកហូតសម្ភារពាក់ព័ន្ធនឹងបទល្មើសមួយចំនួនទៀត ។
ប្រតិបត្តិការនេះត្រូវបានដឹកនាំដោយលោក ម៉ែន អេង អភិបាលរងខេត្ត តំណាងលោក ប៉េង ពោធិ៍សា អភិបាលខេត្តស្វាយរៀង ដោយមានការសម្របសម្រួលនីតិវិធីផ្ទាល់ពីលោក ហួត វិចិត្រ ព្រះរាជអាជ្ញារង អមសាលាដំបូងខេត្ត លោក ម៉ែន ចាន់រ៉ា អភិបាលក្រុងបាវិត លោកឧត្តមសេនីយ៍ត្រី កែវ សុថា ស្នងការរង ទទួលផែនគ្រឿងញៀន និងលោកវរសេនីយ៍ឯក ស្រេង ហួត ស្នងការរង ទទួលផែនបច្ចេកវិទ្យា រួមទាំងកម្លាំងចម្រុះបានសហការជាមួយគណៈបញ្ជាការឯកភាពរដ្ឋបាលក្រុងបាវិត ។
ជាលទ្ធផល កម្លាំងចម្រុះបានធ្វើការត្រួតពិនិត្យទីតាំងសរុបចំនួន ០៩កន្លែង ដោយក្នុងនោះ ០៨ទីតាំង ស្ថិតក្នុងបុរី CK និង ១ទីតាំងទៀត ស្ថិតនៅតំបន់ផ្សាររាត្រី២ ។
ក្រោយការត្រួតពិនិត្យយ៉ាងហ្មត់ចត់ កម្លាំងសមត្ថកិច្ចបានរកឃើញ ទីតាំងចំនួន ០៧ ៖ (ផ្ទះល្វែង និងទីតាំងផ្សាររាត្រី) មានជនបរទេសជាជនជាតិចិន និងវៀតណាម ស្នាក់នៅចំនួន ១៣ នាក់។ ទោះជាយ៉ាងណា ក្រោយការត្រួតពិនិត្យបឋម សមត្ថកិច្ចមិនទាន់រកឃើញតម្រុយ ដែលពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា (online scam) នៅឡើយទេ ។
នាពេលបច្ចុប្បន្ន ដោយមានការឯកភាពគ្នារវាងកម្លាំងចម្រុះ និងតំណាងអយ្យការ ទីតាំងដែលមានការពាក់ព័ន្ធទាំងនោះ ត្រូវបានសម្រេចបិទជាបណ្ដោះអាសន្ន។ ចំណែកជនសង្ស័យ រួមទាំងសម្ភារៈអេឡិចត្រូនិច ដែលដកហូតបាន ត្រូវបានបញ្ជូនទៅកាន់ការិយាល័យប្រឆាំងបទល្មើសបច្ចេកវិទ្យា ដើម្បីបន្តនីតិវិធីស៊ើបអង្កេត និងចាត់ការតាមផ្លូវច្បាប់ ។
ប្រតិបត្តិការចុះធ្វើរដ្ឋបាលចំហនេះ បង្ហាញពីការប្តេជ្ញាចិត្តរបស់អាជ្ញាធរខេត្តស្វាយរៀង ក្នុងការបង្ក្រាបរាល់សកម្មភាពល្មើសច្បាប់ ជាពិសេសបទល្មើសបច្ចេកវិទ្យា ដែលកំពុងបង្កឱ្យមានការប៉ះពាល់ដល់សន្តិសុខ និងសណ្តាប់ធ្នាប់សង្គម ៕
ចែករំលែកព័តមាននេះ