រាជធានីភ្នំពេញ ៖ ឯកឧត្តម ឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ឯកឧត្តម សាកល្បងពាក់វ៉ែនតាឆ្លាតវៃ ប៉ុន្តែដូចជាមិនឆ្លាតជាងមុនសោះ តែវ៉ែនតាវៃឆ្លាត អាចជួយសិស្សបាន ទាល់តែសិស្ស ត្រូវខិតខំប្រឹងប្រែងពង្រឹងសមត្ថភាពរបស់ខ្លួនឯង ។
តាមរយៈបណ្តាញសង្គមហ្វេសប៊ុក នៅថ្ងៃទី១១ ខែសីហា ឆ្នាំ២០២៦ ដែលត្រូវជាថ្ងៃទី២ នៃការប្រឡងសញ្ញាបត្រទុតិយភូមិ ឬហៅកាត់ថា ប្រឡងបាក់ឌុប ឯកឧត្តម ហង់ជួន ណារ៉ុន បានលើកឡើងពីករណីបេក្ខជនពាក់វ៉ែនតាឆ្លាតវៃ ពេលកំពុងដំណើរការប្រឡងកាលពីថ្ងៃទី១ ថា វ៉ែនតាឆ្លាតវៃ អាចជួយសិស្សបាន ទាល់តែសិស្សត្រូវខិតខំប្រឹងប្រែងពង្រឹងសមត្ថភាពរបស់ខ្លួនឯង ទើបអាចទទួលលទ្ធផលបាន ។
សូមបញ្ជាក់ថា ការលើកឡើងរបស់រដ្ឋមន្ត្រីអប់រំ បែបនេះ ដោយសារកាលពីរសៀលថ្ងៃទី១០ ខែសីហា ឆ្នាំ២០២៦ ដែលត្រូវជាថ្ងៃប្រឡងទី១របស់បេក្ខជនជាង១៥ម៉ឺននាក់ ដែលបានដាក់ពាក្យប្រឡងនោះ នៅមណ្ឌលប្រឡងសាលាបឋមសិក្សា ២ធ្នូ ខេត្តស្វាយរៀង មានករណីចាប់បានបេក្ខជន នាំចូលទៅក្នុងបន្ទប់ប្រឡង នូវវ៉ែនតា និងទូរសព្ទឆ្លាតវៃ ។ ជាងនេះ នៅតាមមណ្ឌលប្រឡងមួយចំនួនទៀត ក៏មានការចាប់បាននូវវ៉ែនតា និងទូរសព្ទឆ្លាតវៃនេះផងដែរ ។
ក្រោយចាប់បានបេក្ខជន ត្រូវបានកត់ត្រាក្នុងកំណត់ហេតុពិសេស ហើយឧបករណ៍អេឡិកត្រូនិក (វ៉ែនតាឆ្លាតវៃ និងទូរសព្ទឆ្លាតវៃ) ដែលបេក្ខជនបាននាំចូលក្នុងបន្ទប់ប្រឡងត្រូវបានរឹបអូសទុក។ ក្រសួងអប់រំ យុវជន និងកីឡា នឹងចាត់វិធានការណ៍ចំពោះករណីនេះតាមគោលការណ៍ជាធរមាន។
ជាមួយគ្នានោះដែរក្រសួងអប់រំ យុវជន និងកីឡា ក្រើនរំលឹ កដល់បេក្ខជនប្រឡងគ្រប់រូប ក្នុងការគោរពតាមការណែនាំផ្សេងៗទាក់ទងនឹងការហាមឃាត់មិនឱ្យនាំចូលឧបករណ៍អេឡិកត្រូនិកចូលក្នុងមណ្ឌល និងបន្ទប់ប្រឡង ឱ្យបានខ្ជាប់ខ្ជួន៕
ចែករំលែកព័តមាននេះ