មន្ទីរបរិស្ថានខេត្តក្រចេះ បង្ក្រាបបទល្មើសធនធានធម្មជាតិបានជិត ២០០ករណី ក្នុងឆមាសទី១ ឆ្នាំ២០២៦
- ក្រចេះ
ខេត្តក្រចេះ៖ ក្នុងរយៈពេល ៦ខែដើមឆ្នាំ២០២៦ នេះ មន្ត្រីឧទ្យានុរក្សនៃមន្ទីរបរិស្ថានខេត្តក្រចេះ សហការជាមួយអាជ្ញាធរដែនដី និងអង្គការដៃគូ បានចុះល្បាតក្នុងតំបន់ការពារធម្មជាតិចំនួន ៩៣២លើក ដោយបានបង្ក្រាបបទល្មើសធនធានធម្មជាតិសរុបចំនួន ១៩៥ ករណី និងបានកសាងសំណុំរឿងបញ្ជូនទៅតុលាការចំនួន ៤២ករណី។
យោងតាមរបាយការណ៍របស់មន្ទីរបរិស្ថានខេត្តក្រចេះ ឱ្យដឹងថា ប្រតិបត្តិការចុះល្បាត និងទប់ស្កាត់បទល្មើសនេះ ត្រូវបានធ្វើឡើងនៅលើផ្ទៃដីតំបន់ការពារធម្មជាតិសរុប ២៨៣,៤០២ ហិកតា រួមមាន៖ ដែនជម្រកសត្វព្រៃព្រៃឡង់, កែវសីមា, ព្រែកប្រសព្វ, សំបូរ, លំផាត់ និងតំបន់ប្រើប្រាស់ច្រើនយ៉ាងសសរស្តម្ភសត្វតោ។ក្នុងចំណោមបទល្មើសទាំង ១៩៥ករណី ដែលត្រូវបង្ក្រាប រួមមាន៖បទល្មើសទន្ទ្រានដីព្រៃ ៨៩ករណី.បទល្មើសសត្វព្រៃ ៣៧ករណី. បទល្មើសឡធ្យូងខុសច្បាប់២៩ករណី.បទល្មើសព្រៃឈើ ២៤ករណី.បទល្មើសសាងសង់រោងខុសច្បាប់ ២៤ករណី។
ប្រភពដដែលបន្តថា សំណុំរឿងចំនួន ៤២ ត្រូវបានបញ្ជូនទៅសាលាដំបូងខេត្តក្រចេះ ដើម្បីចាត់ការតាមនីតិវិធីច្បាប់ ក្នុងនោះជនសង្ស័យចំនួន ៦នាក់ ត្រូវបានចាប់ខ្លួន។ ចំពោះវត្ថុតាងដែលដកហូតបាន រួមមាន រថយន្តកែច្នៃ ១គ្រឿង, គោយន្តកន្ត្រៃ ៣គ្រឿង, ម៉ូតូ ១១គ្រឿង, រណាយន្ត ១៨គ្រឿង, អាវុធកែច្នៃ ១០ដើម, ឈើអាFresh/លាយជាង ១២ម៉ែត្រគូប, អន្ទាក់ខ្សែ ២៨៤ខ្សែ និងមោងចាប់សត្វ ១០០ម៉ែត្រ។
មន្ទីរបរិស្ថានខេត្តក្រចេះ បានបញ្ជាក់ពីប្ដេជ្ញាចិត្តបន្តរឹតបន្តឹងការអនុវត្តច្បាប់យ៉ាងម៉ឺងម៉ាត់ ស្របតាមយុទ្ធសាស្ត្ររបស់ក្រសួងបរិស្ថាន ដើម្បីការពារធនធានធម្មជាតិ និងជំរុញការអភិវឌ្ឍប្រកបដោយភាពស្អាតបៃតង និងចីរភាព៕
ចែករំលែកព័តមាននេះ