ប្រទេសស៊ីរី ៖ តុលាការស៊ីរី កាលពីថ្ងៃទី១១ សីហា បានកាត់ទោសដោយកំបាំងមុខប្រហារជីវិត ប្រធានាធិបតីត្រូវផ្ដួលរំលំលោកបាចាអាល់ អាសាដ ប្អូនប្រុសលោកម៉ាហ័រ និងអតីតអ្នកទទួលខុសត្រូវច្រើនរូបទៀត ពីបទឧក្រិដ្ឋនានា ប្រព្រឹត្តក្នុងអំឡុងពេលសង្គ្រាមស៊ីវិលនៅស៊ីរី។ នោះជាការកាត់ទោសលើកដំបូងប្រឆាំងបណ្ដាសមាជិកអតីតរដ្ឋអំណាចប្រទេសនេះ។
នៅមុខតុលាការក្រុងដាម៉ាស់មួយ ចៅក្រមមួយរូបលោក FAKHR AL DIN AL-ARYAN លើកឡើងថា លោកបាចាអាល់អា
សាដ ជាប់ពិរុទ្ធពីបទឧក្រិដ្ឋប្រឆាំងមនុស្សជាតិ និងបទឧក្រិដ្ឋកម្មសង្គ្រាម ក្នុងនោះ មានការសម្លាប់មនុស្សដោយចេតនាច្រើននាក់ និងសម្លាប់ដោយអចេតនា បណ្ដាកុមារមានវ័យក្រោម១៥ឆ្នាំ ធ្វើទារុណកម្មរហូតដល់ស្លាប់ និងបំបាត់សេរីភាព ដូច្នេះលោកត្រូវទទួលការកាត់ទោសប្រហារជីវិត ។
អាជ្ញាធរបណ្ដោះអាសន្នស៊ីរីដែលផ្ដួលរំលំលោកបាចាអាល់អាសាដ កាលពីខែធ្នូ ឆ្នាំ២០២៤ ក្រោយសង្គ្រាមស៊ីវិលអស់ពេល១៣ឆ្នាំ បានចោទប្រកាន់លោកអាសាដថា បានប្រព្រឹត្តអំពើឧក្រិដ្ឋនានា ក្រោមការកាន់អំណាចរបស់លោក ។ តុលាការកាលពីខែមេសា កន្លងទៅ បានសម្រេចធ្វើការចោទប្រកាន់លោកបាចាអាល់អាសាដ និងអ្នកទទួលខុសត្រូវដទៃៗទៀត ។
ដូច្នេះហើយ បានជាអតីតប្រធានាធិបតីស៊ីរីរូបនោះ ដែលរត់ភៀសខ្លួនរស់នៅនិរទេសក្នុងប្រទេសរុស្ស៊ី ត្រូវបានតុលាការកាត់ទោសប្រហារជីវិតដោយកំបាំងមុខ ក៏ដូចជាបណ្ដាអតីតអ្នកទទួលខុសត្រូវជាន់ខ្ពស់ ដែលខ្លះរត់គេចខ្លួនទៅក្រៅប្រទេស ខ្លះទៀតរត់គេចទៅកាន់តំបន់ឆ្នេរសមុទ្រដែលជាទីតាំងរបស់ក្រុមជនជាតិភាគតិច ALAOUITE ដែលលោកអាសាដមានដើមកំណើតពីក្រុមជនជាតិភាគតិចនោះ ។
ក្នុងចំណោមមនុស្សត្រូវកាត់ទោសប្រហារជីវិតកំបាំងមុខ ក៏មានប្អូនប្រុសលោកអាសាដគឺលោកម៉ាហ័រ ជាប្រមុខកងពលធំពិសេសលេខ៤ ដែលរត់គេចខ្លួនចេញពីប្រទេសដែរ ។ ក្រៅពីនេះ មានអតីតរដ្ឋមន្ត្រីការពារប្រទេសលោក FAHD AL FREJ និងលោកLOUAY AL ALIដែលដឹកនាំភ្នាក់ងារស៊ើបការណ៍យោធាក្នុងខេត្តដឺរ៉ាអា ។ ជនជាប់ចោទដែលមានវត្តមានតែម្នាក់គត់ គឺលោកអាតេហ្វណាជីបប្រមុខសន្តិសុខនយោបាយខេត្តដារ៉ាអា ៕
ចែករំលែកព័តមាននេះ