កម្លាំងចម្រុះចុះបង្ក្រាបបទល្មើសនេសាទនៅស្រុកឆ្លូង ដកហូតឧបករណ៍ខុសច្បាប់ និងរំដោះត្រីប្រមាណ ៤០០គីឡូក្រាម
- ស្ទឹងត្រែង
ខេត្តក្រចេះ៖កម្លាំងសមត្ថកិច្ចចម្រុះខេត្តក្រចេះ បានចុះប្រតិបត្តិការទ្រង់ទ្រាយធំទប់ស្កាត់និងបង្ក្រាបបទល្មើសនេសាទខុសច្បាប់ ស្ថិតក្នុងភូមិសាស្ត្រស្រុកឆ្លូង ដោយបានដកហូតឧបករណ៍ល្មើសច្បាប់មួយចំនួន និងបានរំដោះត្រីចម្រុះប្រមាណ ៤០០គីឡូក្រាម ចាក់លែងចូលទៅក្នុងដែនទឹកធម្មជាតិវិញ ដើម្បីរួមចំណែកដល់ការអភិរក្សពូជមច្ឆជាតិឱ្យបានគង់វង្ស។
ប្រតិបត្តិការនេះ បានប្រព្រឹត្តទៅកាលពីថ្ងៃទី១១ ខែសីហា ឆ្នាំ២០២៦ ក្រោមការដឹកនាំផ្ទាល់របស់លោក ម៉ុក ពន្លក នាយខណ្ឌរដ្ឋបាលជលផលខេត្តក្រចេះ ដោយមានកិច្ចសហការរវាង ផ្នែករដ្ឋបាលជលផលព្រែកប្រសព្វ. កម្លាំងនគរបាលប្រឆាំងបទល្មើសសេដ្ឋកិច្ចខេត្ត និងគណៈកម្មការបញ្ជាការឯកភាពស្រុកឆ្លូង។
ក្នុងប្រតិបត្តិការនោះ កម្លាំងជំនាញបានចុះត្រួតពិនិត្យ និងបង្ក្រាបនៅចំណុចគោលដៅក្តៅៗមួយចំនួន រួមមាន ចំណុចបឹងប្រា, បឹងកូនសត្វ, ជ្រោយវែង និងទំនប់តាណូ ដែលស្ថិតនៅក្នុងភូមិឆក់កន្ទោង ឃុំព្រែកសាម៉ាន់ ស្រុកឆ្លូង ខេត្តក្រចេះ។
ជាលទ្ធផល បន្ទាប់ពីបានបង្ក្រាប និងដកហូតឧបករណ៍នេសាទខុសច្បាប់ជាច្រើនប្រភេទរួចមក មន្ត្រីជំនាញបានធ្វើការរំដោះត្រីចម្រុះទម្ងន់ប្រមាណ ៤០០ គីឡូក្រាម ដែលជាប់ក្នុងឧបករណ៍នេសាទល្មើសច្បាប់ទាំងនោះ ចាក់លែងចូលទៅក្នុងប្រភពទឹកធម្មជាតិវិញភ្លាមៗ ដើម្បីឱ្យពួកវារស់រានមានជីវិត និងបន្តពូជពងកូនក្នុងរដូវហាមឃាត់នេះ។
នាឱកាសនោះដែរ អាជ្ញាធរ និងមន្ត្រីជំនាញជលផល ក៏បានអំពាវនាវយ៉ាងទទូចដល់បងប្អូនប្រជា នេសាទទាំងអស់ ឱ្យបង្កើនស្មារតីចូលរួមគោរព ច្បាប់ស្តីពីជលផល និងត្រូវបញ្ឈប់ជាបន្ទាន់នូវការប្រើប្រាស់ឧបករណ៍នេសាទខុសច្បាប់គ្រប់ប្រភេទ ដើម្បីរួមគ្នារក្សាការពារធនធានធម្មជាតិ និងផលស្តុកត្រីឱ្យបានសម្បូរបែប សម្រាប់ផ្គត់ផ្គង់ជីវភាព និងទុកជាសម្បត្តិមច្ឆជាតិដល់កូនចៅជំនាន់ក្រោយ៕
ចែករំលែកព័តមាននេះ