នេសាទចប់បម្រុងវិលទៅជួបជុំគ្រួសារ ស្រាប់តែទូកលិចបាត់បង់ឧបករណ៍ចិញ្ចឹមជីវិត សំណាងកម្លាំងជំនាញ ជួយសង្គ្រោះទាន់
- ព្រះសីហនុ
ខេត្តព្រះសីហនុ ៖ ប្រជានេសាទម្នាក់លិចទូកត្រូវបានកម្លាំងទីបញ្ជាការជួរមុខអគ្គលេខាធិការដ្ឋាននៃគណៈកម្មាធិការជាតិសន្តិសុខលម្ហសមុទ្រ ជួយសង្គ្រោះទាន់ពេលវេលា ។
ព័ត៌មានដែលទទួលបានពីផេកផ្លូវការ របស់កម្លាំងទីបញ្ជាការជួរមុខអគ្គលេខាធិការដ្ឋាននៃគណៈកម្មាធិការជាតិសន្តិសុខលម្ហសមុទ្រ នៅវេលាម៉ោង១៣និង២០នាទីរសៀល ថ្ងៃទី១១ ខែសីហា ឆ្នាំ ២០២៦ មានករណីលិចទូកនេសាទខ្នាតតូច ប្រភេទទូកកន្ទុយវែង បំពាក់ម៉ាស៊ីនសាំង កម្លាំង៨.៥០សេះ ត្រូវបានលិចត្រង់ចំណុចនិយាមកាlat:10°40’12″N Long:103°30’42″E ចម្ងាយប្រមាណ ២០០ម៉ែត្រ ខាងជើងកោះព្រាប ។
បន្ទាប់ពីទទួលបានព័ត៌មានពីប្រជានេសាទ និងដោយបានការអនុញ្ញាតដ៏ខ្ពង់ខ្ពស់ពីលោកឧត្តមនាវីទោលី ហួត មេបញ្ជាកាជួរមុខអគ្គលេខាធិការដ្ឋាននៃគណៈកម្មាធិការជាតិសន្តិសុខលម្ហសមុទ្រ បានដាក់បទបញ្ជាមកឧត្តមនាវីទោ ហែម សុខេង អនុប្រធាននាយកដ្ឋានផ្គត់ផ្គង់ប្រចាំបញ្ជាចាត់តាំងលោក វរនាវីទោហាស់ ប៊ុនថន អនុប្រធានការិយាល័យប្រចាំការ ទីបញ្ជាការជួរមុខដឹកនាំកម្លាំងចំនួន០៤រូប ប្រើប្រាស់អូប័រ RIHB ចំនួន០១គ្រឿងចេញអន្តរាគមន៍ជួយសង្គ្រោះប្រជានេសាទ ០១នាក់ ដែលជួបហានិភ័យបានលិចទូក ខណៈកំពុងតែបើកបរវិលត្រឡប់មកផ្ទះវិញ ប្រតិបត្តិការជួយសង្គ្រោះបានប្រព្រឹត្តទៅដោយជោគជ័យ និងប្រកបដោយសុវត្ថិភាព ។
ជនរងគ្រោះជាម្ចាស់ទូកឈ្មោះ សែម សុខន ភេទប្រុស អាយុ៤២ឆ្នាំ មុខរបរនេសាទ រស់នៅភូមិ០៣(ទំនប់រលក)សង្កាត់លេខ០១ ក្រុង/ខេត្តព្រះសីហនុ ។
តាមការបំភ្លឺ របស់ជនរងគ្រោះជាម្ចាស់ទូកបានឱ្យដឹងថា ទូកនេសាទជាប្រភេទទូកកន្ទុយវែងខ្នាតតូច បំពាក់ម៉ាស៊ីនសាំង កម្លាំង៨.៥សេះ ត្រូវបានលិចដោយសារចុងទុយោបូមទឹកបត់ចូលក្នុងទូក បណ្តាលឱ្យទឹកហូរចូល និងបានលិចតែម្តង ព្រមទាំងបាត់បង់សម្ភារៈនេសាទមួយចំនួនផងដែរ ។ បច្ចុប្បន្នជនរងគ្រោះមានសុវត្ថិភាព និងកំពុងស្វែងរកមធ្យោបាយស្រង់ទូកឡើងវិញ ៕
ចែករំលែកព័តមាននេះ