រាជធានីភ្នំពេញ ៖ ឈ្មោះខ្មែរហៅថា ម្រើមព្រះ , ម្រោមព្រះ គឺជាប្រភេទសត្វពហុបាទីម្យ៉ាង ដែលមានជើងច្រើន ពួកវាមិនស្ថិតនៅក្នុងប្រភេទជាសត្វល្អិតទេ ប៉ុន្តែជាសមាជិកនៃក្រុម Myriapoda ( សត្វពហុបាទី ) ដែលរួមមានទាំងសត្តវង្សក្អែប (Centipedes) ផងដែរ ។ នេះបើយោងតាមផេកជីវៈចម្រុះនៃប្រទេសកម្ពុជា បានប្រកាសនាពេលថ្មីនេះ ។
ជីវៈចម្រុះនៃប្រទេសកម្ពុជា បានបន្តថា លក្ខណៈពិសេសរបស់វា គឺរាងកាយវែងបែងចែកជាច្រើនកំណាត់ ហើយភាគច្រើននៃកំណាត់នីមួយៗមាន ជើង ២គូ ។ ទោះបីមានឈ្មោះថា ម្រើមព្រះក៏ដោយ ក៏គ្មានប្រភេទណាមួយមានជើងដល់១,០០០ ជើងពិតប្រាកដនោះដែរ ។
ប្រភេទម្រើមព្រះ ដែលបានធ្វើកំណត់ត្រានៅកម្ពុជាយើងៈ រហូតមកដល់បច្ចុប្បន្ននេះ អ្នកវិទ្យាសាស្ត្របានកត់ត្រាអំពីប្រភេទរបស់ពួកវាបានចំនួន ១៩ ប្រភេទហើយ នៅក្នុងប្រទេសកម្ពុជាយើង ដែលបែងចែកទៅតាមចំណាត់ថ្នាក់នៃពូជដូចខាងក្រោម ៖
ម្រើមព្រះមានចំនួនសរុប ១៥ ពូជ (Genera) ចែកជា ១២ គ្រួសារ (Families) និង ៨ លំដាប់ (Orders) ។ ទោះជាយ៉ាងណា អ្នកស្រាវជ្រាវជឿជាក់ថា ចំនួនពិតប្រាកដអាចមានច្រើនជាងនេះ ព្រោះតំបន់ព្រៃភ្នំ និងព្រៃនិវត្តន៍ជាច្រើននៅកម្ពុជា មិនទាន់ត្រូវបានសិក្សាលម្អិតនៅឡើយទេ ។
ទីជម្រកម្រើមព្រះ អាចរស់នៅក្នុងបរិស្ថានដែលមានសំណើមខ្ពស់ ដូចជា៖ + ព្រៃនិវត្តន៍សំណើមខ្ពស់ +ព្រៃតំបន់ភ្នំ+ ព្រៃឫស្សី+ ក្រោមទីដែលមានស្លឹកឈើជ្រុះ+ ក្រោមទីដែលមានឈើពុក+ ក្រោមថ្ម និងក្នុងដីសើមពួកវាច្រើនចេញសកម្មជាចម្បងនៅពេលយប់ ឬក្រោយភ្លៀងធ្លាក់ ( សត្វរត្តិចរ )។ អាហារសម្រាប់ម្រើមព្រះ ភាគច្រើនជាសត្វស៊ីសំណល់រុក្ខជាតិ (Detritivore) ដោយពួកវាស៊ីអាហារដូចជា ៖ + ស្លឹកឈើជ្រុះ + ឈើពុក+ ផ្សិត+ សំណល់រុក្ខជាតិ+ សារធាតុសរីរាង្គដែលកំពុងរលួយ
នៅឆ្នាំ ២០២៥ អ្នកវិទ្យាសាស្ត្រក៏បានពិពណ៌នាអំពីប្រភេទថ្មីចំនួន ៣ ប្រភេទទៀតផងដែរ ក្នុងពូជ Orthomorpha ពីប្រទេសកម្ពុជា ដែលបង្ហាញថា ជីវចម្រុះរបស់សត្វម្រើមព្រះនៅកម្ពុជា នៅតែមិនទាន់ត្រូវបានសិក្សាអោយបានពេញលេញនៅឡើយទេ ។
ទោះបីជាសត្វម្រើមព្រះ ភាគច្រើនមិនស្ថិតក្នុងបញ្ជីក្រហមជិតផុតពូជក៏ដោយ ក៏ការកាប់បំផ្លាញព្រៃឈើ ការបាត់បង់ជម្រក និងការបំពុលបរិស្ថាន អាចប៉ះពាល់ដល់អត្រាចំនួនរបស់ពួកវាផងដែរ ។ ដូច្នេះហើយ ការអភិរក្សព្រៃធម្មជាតិ និងការស្រាវជ្រាវបន្ថែម គឺមានសារៈសំខាន់ណាស់ សម្រាប់ការយល់ដឹង និងការពារក្រុមសត្វនេះអោយបានល្អ និងទុកបន្តដល់កូនចៅជំនាន់ក្រោយបានស្គាល់ និងសិក្សាស្វែងយល់បន្ថែម ៕ អត្ថបទដោយ ៖ សុខ វិជ្ចា
ចែករំលែកព័តមាននេះ