ឈ្មោះខ្មែរហៅពស់ប្រមោយដំរី ជាឧរង្គសត្វរស់នៅក្នុងទឹកមួយប្រភេទ ដែលភាគច្រើនយើងអាចឃើញវារស់នៅតាមតំបន់ទំនាប តាមដងទន្លេ បឹង ពិសេសតំបន់ទឹកសាបលាយទឹកប្រៃ ជិតសមុទ្រ ក្នុងព្រៃកោងកាងជាដើម ។ នេះបើយោងតាមផេកជីវៈចម្រុះនៃប្រទេសកម្ពុជា បានប្រកាសនាព្រឹកថ្ងៃទី១២ ខែសីហានេះ ។
ជីវៈចម្រុះនៃប្រទេសកម្ពុជា បានបន្តថា វាជាប្រភេទពស់ដែលគ្មានពិសនោះទេ ហើយវាមានវត្តមាននៅតាមបណ្តាប្រទេសអាស៊ីអាគ្នេយ៍យើងមានដូចជា ៖ ឥណ្ឌូណេស៊ី , ម៉ាលេស៊ី , ថៃ , កម្ពុជា និង វៀតណាម ។ ពស់នេះ វាមានស្បែករលុងជាច្រើនជាន់ ដែលធ្វើអោយស្បែករបស់វាមានសណ្ឋានយារ ហើយនៅលើផ្ទៃស្បែករបស់វាមានស្រការាងជាក្រឡាតូចៗដូចបន្លា ដែលធ្វើឱ្យវាមានរូបរាងខុសប្លែកពីពស់ដ៏ទៃ ។ វាត្រូវបានគេស្គាល់ជា ភាសាអង់គ្លេសថា Javan Wart Snake ឬ Elephant-trunk Snake ដោយសារស្បែក និងរាងក្បាលរបស់វាមានលក្ខណៈពិសេស ។
ពស់ប្រមោយដំរី ពេញវ័យអាចមានប្រវែងប្រហែល ១–២ ម៉ែត្រ ហើយពស់ដែលមានអាយុចំណាស់ខ្លាំង អាចមានទំហំធំជាងនេះទៀត ចំនែកសត្វពស់ញីអាចមានទំហំធំជាងអាឈ្មោលរហូតដល់ ៣ ទៅ ៤ដង ឯណោះ ។
ជាមួយគ្នានោះដែរ ពស់ប្រមោយដំរី ជាពស់ដែលពឹងផ្អែកលើបរិស្ថានទឹកជាចម្បង ពួកវាច្រើនរស់នៅក្នុង ៖ ទន្លេ បឹង អូរ និងតំបន់ទឹកសាប ព្រែក តំបន់ទឹកសាបដែលមានចរន្តយឺត តំបន់ទឹកដែលមានស្មៅ និងរុក្ខជាតិទឹកច្រើន ។
ចំណែកអាហារវិញ វាជាសត្វស៊ីសាច់ (Carnivore) និងប្រមាញ់នៅក្នុងទឹក ។ ហើយអាហាររបស់វារួមមាន៖ ត្រី ត្រីតូចៗ
បន្ថែមនេះទៀត ពស់ប្រមោយដំរី មានការបន្តពូជខុសពីពស់ដ៏ទៃទៀតដែលដាក់ពង ។
វាជាប្រភេទពស់ដែល បង្ករកំណើតក្នុងទម្រង់ ជលម្ពុជា (viviparous) មានន័យថា កូនអភិវឌ្ឍនៅក្នុងរាងកាយម្តាយ ហើយកើតចេញជាកូនពស់ដែលអាចរស់ដោយខ្លួនឯងបានតែម្តង ។ ការបង្កើតកូនតែម្តង គឺជាការសម្របខ្លួនដែលមានអត្ថប្រយោជន៍ច្រើនសម្រាប់សត្វដែលចំណាយពេលភាគច្រើនរស់នៅក្នុងទឹកដូចជា សត្វពស់នេះ ព្រោះវាមិនចាំបាច់ឡើងទៅលើដីគោក ដើម្បីដាក់ពងនោះទេ ។
វាជាប្រភេទពស់កម្រឃើញ និងរងគ្រោះពីការជួយដូរផងដែរ ដោយសារតែគេទិញយកស្បែករបស់វាក្នុងតម្លៃថ្លៃ សត្វពស់ប្រមោយដំរីរាប់ពាន់ក្បាលត្រូវបានគេសម្លាប់យ៉ាងច្រើនក្នុងមួយឆ្នាំៗ ព្រោះតែដើម្បីយកស្បែករបស់វាមកធ្វើជាវត្ថុធាតុដើមក្នុងរោងចក្រ និងមួយចំនែកទៀតគេក៏យកសាច់របស់វាផងដែរ ។ ដោយសារតែអត្រាចំនួនពួកវាមាននៅក្នុងព្រៃច្រើន ទើបគេមិនឃើញមានឈ្មោះរបស់ពួកវានៅក្នុងបញ្ជីសត្វដែលជិតផុតពូជនោះទេ ។
សម្រាប់ការសិក្សាជីវចម្រុះនៅកម្ពុជា ពស់ប្រមោយដំរី គឺជាប្រភេទពស់មួយដែលគួរឱ្យចាប់អារម្មណ៍ ព្រោះវាបង្ហាញពីការសម្របខ្លួនយ៉ាងខ្លាំងរបស់សត្វល្មូនទៅនឹងជីវិតក្នុងទឹក ។ ប្រព័ន្ធទន្លេ និងដីសើមរបស់កម្ពុជា ដូចជា ទន្លេមេគង្គ បឹងទន្លេសាប និងតំបន់ដីសើមផ្សេងៗ មានសារៈសំខាន់សម្រាប់ជីវចម្រុះទឹកសាប ។ ការស្រាវជ្រាវបន្ថែមអំពីរប៉ាយ និងអត្រាចំនួនរបស់ពស់ប្រមោយដំរី នៅកម្ពុជា អាចជួយឱ្យយើងយល់កាន់តែច្បាស់អំពីសុខភាពនៃឋានប្រព័ន្ធទឹកសាបរបស់ប្រទេសយើងបាន ៕ អត្ថបទដោយ ៖ សុខ វិជ្ចា
ចែករំលែកព័តមាននេះ