តាម​ប្រភព​ព័ត៌មាន Business Insider បានឱ្យ​ដឹង​ថា កីឡាករ​ប្រដាល់​ក្នុង​ទ្រុង UFC លំដាប់​ពិភពលោក Conor McGregor ចង់​ឡើង​ប្រកួត​ជាមួយនឹង​តារា​រ៉េ​ប 50 Cent ព្រោះតែ​តារា​ម្នាក់​នេះ​ចេះ​តែ​យក​រូប​របស់ Conor ទៅ​ធ្វើ​ជា​រូប​កំប្លែង (Meme)​។

រូបថត​មួយ​ដែល 50 Cent បង្ហោះ​នៅ​លើ​បណ្តាញ​សង្គម Instagram កាលពី​ឆ្នាំ​មុន បាន​បង្ហាញ​រូប McGregor តែងខ្លួន​ធ្វើ​ជា Britney Spears កាន់ឆត្រ​នៅ​ជិត​ឡាន​របស់​គេ ។ រូប​នេះ​ត្រូវ​បាន​បង្ហោះ​ភ្លាម​ៗ បន្ទាប់​ពី McGregor វាយប្រហារ​លើ​ឡានក្រុង​មួយ​ដែល​ដឹក​អត្ត​ព​លិ​ក UFC ហើយ​បង្ក​របួស​ស្នាម​ដល់​មនុស្ស​នៅ​ក្នុង​នោះ ។

នៅ​ពេល​ដែល McGregor ត្រូវ​បានដៃ​គូប្រកួត​វាយ​សុះសាច់​កាលពី​ខែតុលា​ឆ្នាំ​មុន នៅ UFC 229 តារាចម្រៀង​រ៉េ​ប 50 Cent បាន​បង្ហោះ​រូប​ជាមួយនឹង​សារ​សើច​ឌឺដង​មួយ​នៅ​លើ Twitter ។ McGregor ដឹង​ច្បាស់​អំពី Meme ទាំងនេះ ហើយ​បាន​និយាយ​នៅ​ក្នុង​សន្និសីទ​សារព័ត៌មាន​នា​ពេល​ថ្មី​ៗ​នេះ​នៅ​ទីក្រុង​មូ​ស្គូ​ថា​៖ «​ខ្ញុំ​ចង់​ឡើង​ប្រកួត​ជាមួយនឹង​គាត់​»​។

McGregor បាន​បន្ត​ថា​៖ «​គាត់​បាន​ចាប់ផ្តើម​ឌឺដង​ប្រឆាំង​នឹង​ខ្ញុំ​នៅ​លើ​បណ្តាញ​សង្គម ជា​ពិសេស​លើ Instagram ដែល​តែងតែ​បង្ហោះ​រូប​ឌឺ​រហូត​។ រាល់ពេល​ខ្ញុំ​ប្រើ​អ៊ី​ន​ធើ​ណេ​ត ខ្ញុំ​តែង​ឃើញ 50 Cent បង្ហោះ​រូប Meme ឆ្កួត​ៗ​។ ខ្ញុំ​បាន​ចូល Comment ថា ៖ ប្រុស​ចាស់​លើ​អ៊ី​ន​ធើ​ណេ​ត ដែល​តែង​បង្ហោះ​រូប Meme ឆ្កួត​ៗ​។ ភ្លាម​នោះ គាត់​ក៏​ប្លុក​ខ្ញុំ​»​។

គួរ​បញ្ជាក់​ផង​ដែរ​ថា កាលពី​ស​ប្តា​ហ៍​មុន McGregor បាន​និយាយ​ថា គាត់​គ្រោង​នឹង​វិល​ត្រឡប់​មក​ប្រកួត​នៅ UFC វិញ​នៅ​ខែមករា នៅ​ឡាស​វេ​ហ្គា​ស ដោយ​បន្ថែម​ថា​គាត់​ចង់​ប្រយុទ្ធ​បី​ដង​នៅ​ឆ្នាំ ២០២០ ៕

ប្រភព ៖ businessinsider , កែសម្រួល​ដោយ ៖ សំណាង