រាជធានី​ភ្នំពេញ ៖ ក្រុម​ជម្រើសជាតិ​កម្ពុជា​យុវជន​អាយុ​ក្រោម​១៩​ឆ្នាំ (U19) នឹង​ត្រូវ​ជួប​ក្រុម U19 ថៃ នៅ​ក្នុង​វគ្គ​ពាក់កណ្ដាល​ផ្ដាច់ព្រ័ត្រ ពានរង្វាន់​ជើងឯក​អាស៊ី​អាគ្នេយ៍​យុវជន​អាយុ​ក្រោម ១៩​ឆ្នាំ (ASEAN U-19 Boys’ Championship 2026) នា​វេលា​ម៉ោង ៤​រសៀល ថ្ងៃ​ទី​១១ ខែមិថុនា ឆ្នាំ​២០២៦ ដែល​ធ្វើ​ឡើង​នៅ​កីឡដ្ឋាន Utama Sumatera Utara នៃ​ប្រទេស​ឥណ្ឌូ​ណេ​ស៊ី​។

នេះ​គឺជា​ជំនួប​ដ៏​ទាក់ទាញ​សម្រាប់​អ្នកគាំទ្រ ហើយ​ក៏​ជា​ការ​បន្ត​បេសកកម្ម​ដ៏​សំខាន់​របស់​ក្រុម U19 កម្ពុជា បន្ទាប់​ពី​បង្កើត​កំណត់​ត្រា​ថ្មី តាម​រយៈ​ការ​ឈាន​ដល់​វគ្គ​ពាក់កណ្តាល​ផ្តាច់ព្រ័ត្រ​នៃ​ពានរង្វាន់​នេះ​។

លោក Yasuhiro Yoshida គ្រូបង្វឹក​ក្រុម U19 កម្ពុជា បាន​ថ្លែង​នៅ​ក្នុង​សន្និសីទ​មុន​ការ​ប្រកួត​ដ៏​សំខាន់​នេះ ដើម្បី​បន្ដ​លើកទឹកចិត្ត​ដល់​កីឡាករ​ទាំងអស់​ឱ្យ​ខំប្រឹង​ប្រែង ហើយ​កែប្រែ​កន្លែង​ខ្វះខាត ក៏​ដូច​ជា​បន្ដ​លើកទឹកចិត្ត​ឱ្យ​រក្សា​ចំណុច​ល្អ​ដែល​ក្រុម​មាន​កន្លង​មក​។ សំខាន់​លើស​ពី​នេះ លោក​បាន​សង្កត់ធ្ងន់​ដូច្នេះ​ថា «​អ្វី​ដែល​យើង​ចង់​ឃើញ​ពី​កីឡាករ​នោះ គឺ​មាន​វិន័យ​ល្អ មានការ​ប្ដេជ្ញា​ខ្ពស់ និង​ខំប្រឹង​ប្រែង​ឱ្យ​ខ្លួន​អភិវឌ្ឍន៍​ទៅ​មុខ​ទៀត នៅ​ថ្ងៃ​ខាង​មុខ​»​។

គួរ​រំលឹក​ជូន​ថា ឆ្លងកាត់​ការ ២ ប្រកួត​នៅ​ក្នុង​ពូ​ល C ក្រុម U19 កម្ពុជា ឈ្នះ ១ និង​ស្មើ ១ ពោល​គឺ​ឈ្នះ​ហ្វី​លី​ពី​ន​លទ្ធផល ២-០ និង​ស្មើ​អូស្ត្រាលី​លទ្ធផល ២-២ ដោយ​ឈាន​ដល់​វគ្គ​ពាក់កណ្តាល​ផ្តាច់ព្រ័ត្រ នៅ​ក្នុង​នាម​ក្រុម​លេខ​២​ល្អ​ជាងគេ ពោល​ល្អ​ជាង U19 វៀតណាម​ក្នុង​ពូ​ល A និង U19 ម៉ា​ឡេ​ស៊ីក្នុង​ពូ​ល B ដែល​មាន​ត្រឹម ៣​ពិន្ទុ​ដូច​គ្នា​។

ការ​ប្រកួត​វគ្គ​ពាក់កណ្តាល​ផ្តាច់ព្រ័ត្រ​ពានរង្វាន់ ASEAN U-19 Boys’ Championship 2026 នៅ​កីឡដ្ឋាន Utama Sumatera Utara ថ្ងៃ​ទី​១១ ខែមិថុនា ឆ្នាំ​២០២៦ ៖

-​ថៃ ប៉ះ កម្ពុជា វេលា​ម៉ោង ៤ រសៀល
-​ម្ចាស់ផ្ទះ​ឥណ្ឌូ​ណេ​ស៊ី ប៉ះ អូស្ត្រាលី វេលា​ម៉ោង ៨ និង ១៥ នាទី​យប់​៕ រូបភាព ៖ សហព័ន្ធ​កីឡាបាល់ទាត់​កម្ពុជា