សហរដ្ឋអាមេរិក ៖ ការបរាជ័យរបស់អាល្លឺម៉ង់ក្រោមថ្វីជើងប៉ារ៉ាហ្គាយដ៏ភ្ញាក់ផ្អើល កាលពីវេលាព្រឹកថ្ងៃទី៣០ ខែមិថុនា ឆ្នាំ២០២៦ (ម៉ោងនៅកម្ពុជា) បានធានាថា ប្រេស៊ីលនៅតែរក្សាតំណែងជាក្រុមតែមួយគត់លើលោក ដែលឈ្នះជើងឯក World Cup ច្រើនជាងគេក្នុងប្រវត្តិសាស្ត្រ ពោល ៥ លើក ជាមួយឱកាសមាសបំបែកកំណត់ត្រាខ្លួនឯងនៅក្នុងការប្រកួតឆ្នាំ ២០២៦ នេះ។
អាល្លឺម៉ង់បានបញ្ចប់យុទ្ធនាការ World Cup ឆ្នាំ ២០២៦ នៅក្នុងលទ្ធផលដ៏ជូរចត់ ដ្បិតក្រុមរហស្សនាម ឥន្ទ្រីដែក មួយនេះ បានស្មើគ្នា ១-១ ជាមួយនឹងប៉ារ៉ាហ្គាយ បន្ទាប់ពីចប់ការប្រកួត ១២០ នាទី មុនចាញ់ក្នុងលទ្ធផល ៣-៤ ដោយការទាត់បាល់ប៉េណាល់ទីកាត់សេចក្តី នៅក្នុងវគ្គ ៣២ ក្រុមចុងក្រោយ។
ការបរាជ័យនេះ អាចនឹងត្រូវបានចងចាំដោយសារខកចិត្តខ្លាំងនៅត្រង់ចំណុចទាត់បាល់ប៉េណាល់ទី ប៉ុន្តែសម្រាប់សារព័ត៌មានអាល្លឺម៉ង់ បញ្ហាមិនមែនស្ថិតលើការទាត់ប៉េណាល់ទីកាត់សេចក្តីចុងក្រោយនោះទេ។
កាសែតអាល្លឺម៉ង់ចាត់ទុកបរាជ័យនេះជាសុបិន្តអាក្រក់ថ្មីមួយសម្រាប់បាល់ទាត់អាល្លឺម៉ង់ ដែលធ្លាប់តែមានទម្លាប់ជាបេក្ខភាពដណ្តើមជើងឯក។ តួយ៉ាង សារព័ត៌មាន WELT បានហៅថា មហន្តរាយ World Cup លើកបន្ទាប់ ខណៈដែល BILD បានប្រើឃ្លាធ្ងន់ជាងនេះថា សុបិន្តអាក្រក់ថ្មីនៃបាល់ទាត់អាល្លឺម៉ង់។ បន្ទាប់ពីការបរាជ័យនៅ World Cup ឆ្នាំ ២០១៨ និង ២០២២ ដោយធ្លាក់ត្រឹមវគ្គចែកពូល នៅក្នុងព្រឹត្តិការណ៍ឆ្នាំ ២០២៦ នេះ រឹតតែធ្វើឱ្យការខកចិត្តកាន់តែផុងជ្រៅទៅៗ។
ក្រឡេកទៅ ប្រេស៊ីលឯណោះវិញ ទម្លាក់ជប៉ុនយ៉ាងលំបាកក្នុងវគ្គ៣២ក្រុម ជាមួយនឹងលទ្ធផល ២-១ ដោយត្រូវអរគុណខ្សែប្រយុទ្ធ Gabriel Martinelli សម្រាប់គ្រាប់បាល់ជ័យជម្នះនៅវិនាទីគ្រោះថ្នាក់ ៩០+៥ ដើម្បីបន្តឡើងទៅវគ្គ១៦ក្រុមចុងក្រោយ។
យ៉ាងណាមិញ ទោះបីជាលទ្ធផលព្រឹត្តិការណ៍ World Cup ឆ្នាំ ២០២៦ ទៅជាយ៉ាងណាក៏ដោយ ក៏សាំបាប្រេស៊ីលនៅតែជាក្រុមជោគជ័យបំផុតក្នុងប្រវត្តិសាស្ត្រការប្រកួតនេះ យ៉ាងហោចណាស់សម្រាប់រយៈពេល ៤ ឆ្នាំខាងមុខទៀត។
បច្ចុប្បន្ន ប្រេស៊ីលកំពុងនាំមុខគេនៅ World Cup ដោយឈ្នះជើងឯក ៥ លើក នៅឆ្នាំ ១៩៥៨, ១៩៦២, ១៩៧០, ១៩៩៤ និង ២០០២។ រីឯអាល្លឺម៉ង់ (១៩៥៤, ១៩៧៤, ១៩៩០, និង ២០១៤) និងអ៊ីតាលី (១៩៣៤, ១៩៣៨, ១៩៨២ និង ២០០៦) នៅឈរលេខរៀងទី២ ដោយបានឈ្នះជើងឯក ៤ លើកដូចគ្នា ប៉ុន្តែអ៊ីតាលីឆ្លងមិនផុតវគ្គជម្រុះទ្វីបអឺរ៉ុប។ ដូច្នេះមិនទាន់មានក្រុមណាមួយអាចគំរាមកំហែងដល់តំណែងកំពូលរបស់ប្រេស៊ីលក្នុងនាមជាក្រុមជោគជ័យបំផុតក្នុងប្រវត្តិសាស្ត្រ World Cup នោះឡើយ។
សរុបមក លទ្ធផលការប្រកួតរវាងអាល្លឺម៉ង់ និងប៉ារ៉ាហ្គាយ មិនត្រឹមបង្កើតឱ្យមានការភ្ញាក់ផ្អើលយ៉ាងខ្លាំងប៉ុណ្ណោះទេ ប៉ុន្តែថែមទាំងបានជួយឱ្យប្រេស៊ីលបន្តរក្សាបានកំណត់ត្រាជាប្រវត្តិសាស្ត្រដ៏អស្ចារ្យមួយនេះ យ៉ាងហោចណាស់រហូតដល់ព្រឹត្តិការណ៍ឆ្នាំ ២០៣០ ។
ទៅណាមិនឆ្ងាយពីព្រឹត្តិការណ៍ World Cup ឆ្នាំ២០២៦ ក្រៅពីប្រេស៊ីល និងប៉ារ៉ាហ្គាយធ្វើបានល្អហើយនោះ ម៉ារ៉ុកឯណោះក៏មិនធម្មតា ដោយបានទម្លាក់ហូឡង់យ៉ាងភ្ញាក់ផ្អើល តាមរយៈការទាត់បាល់ប៉េណាល់ទីកាត់សេចក្តីលទ្ធផល ៣-២ ក្រោយស្មើគ្នា ១-១ នៅបញ្ចប់ ១២០ នាទី ដើម្បីបន្តឡើងទៅកាន់វគ្គ ១៦ ក្រុមចុងក្រោយ៕ ប្រភព ៖ Znews
ចែករំលែកព័តមាននេះ