អន្តរជាតិ ៖ ក្រុមការពារតំណែងជើងឯកអាហ្សង់ទីន គឺជាក្រុមមានភាគរយខ្ពស់បំផុតទទួលបានចំណាត់ថ្នាក់លេខ ១ ពូល J ព្រឹត្តិការណ៍ FIFA World Cup ឆ្នាំ២០២៦។ ដ្បិតពូលនេះមានការចូលរួមពីក្រុមកំពូលៗមកពី ៤ ទ្វីបផ្សេងគ្នាក្រៅពីអាហ្សង់ទីន រួមមាន អាល់ហ្សេរី អូទ្រីស និងក្រុមចំណូលថ្មី ហ្ស៊កដានី។
អាហ្សង់ទីន នៅក្នុងនាមជាម្ចាស់ការពារតំណែងជើងឯកពិភពលោក ដឹកនាំដោយលោក Lionel Scaloni ដែលមានខ្សែប្រយុទ្ធឆ្នើម Lionel Messi ជាប្រធានក្រុម ដែលនឹងក្លាយជាការប្រកួត FIFA World Cup លើកចុងក្រោយរបស់ខ្សែប្រយុទ្ធវ័យ៣៨ឆ្នាំរូបនេះ។ ក្រុមរហស្សនាមពពកសមួយនេះ ក៏មានកម្លាំងស្នូលដ៏រឹងមាំដូចជា Lautaro Martínez និង Julián Álvarez ព្រមទាំងកីឡាករឆ្នើមៗជាច្រើនផ្សេងទៀត។ ក្រុមពីអាមេរិកខាងត្បូងមួយនេះ កំពុងតែងស្វែងការឈ្នះជើងឯកពិភពលោកជាលើកទី៤របស់ខ្លួន ហើយពួកគេក៏ស្ថិតក្នុងចំណោមក្រុមភាគរយខ្ពស់ ដែលបណ្តាអ្នកវិភាគមើលឃើញថាអាចសម្រេចគោលដៅមួយនេះ។
-ចំណាត់ថ្នាក់ FIFA ៖ លេខ ១
-ឱកាសលេខ ១ ក្នុងពូលពីការព្យាករណ៍របស់ Opta ៖ ៧២%
-កីឡាករឆ្នើម ៖ Lionel Messi, Lautaro Martínez, Julián Álvarez និង Enzo Fernández
អាល់ហ្សេរី ក្រុមពីទ្វីបអាហ្វ្រិកមួយនេះ រំពឹងការធ្វើបានល្អកីឡាករបទពិសោធន៍ក្រាស់ក្រែលគឺ ខ្សែបម្រើប្រយុទ្ធ Riyad Mahrez និងទម្រង់លេងវាយសម្រុកដ៏មុតស្រួចពីខ្សែប្រយុទ្ធឆ្នើម Mohammed Amoura ដែលជាអ្នករកគ្រាប់បាល់បានច្រើនជាងគេកាលពីវគ្គជម្រុះ។ តាមរយៈនេះ បណ្តាអ្នកវិភាគមើលឃើញថា ក្រុមរហស្សនាមអ្នកចម្បាំងវាលខ្សាច់ ក្រោមការដឹកនាំរបស់លោក Vladimir Petković នឹងក្លាយជាគូប្រកួតប្រជែងដ៏ស្វិតស្វាញបំផុតរបស់អូទ្រីសដណ្តើមចំណាត់ថ្នាក់លេខ ២។
-ចំណាត់ថ្នាក់ FIFA ៖ លេខ ២៨
-ឱកាសលេខ ១ ក្នុងពូលពីការព្យាករណ៍របស់ Opta ៖ ៩,៣%
-កីឡាករឆ្នើម ៖ Mohamed Amoura, Riyad Mahrez និង Rayan Aït-Nouri
អូទ្រីស បានវិលត្រឡប់មកកាន់ការប្រកួត World Cup វិញ បន្ទាប់ពីខកខានអស់ពេល២៨ឆ្នាំ។ បច្ចុប្បន្នក្រោមការដឹកនាំរបស់លោក Ralf Rangnick ជនជាតិអាល្លឺម៉ង់ ក្រុមមកពីអឺរ៉ុបកណ្តាលមួយនេះ ប្រើប្រាស់ទម្រង់លេងដាក់សម្ពាធគូប្រកួតតាមរយៈការដេញដណ្តើមបាល់មកវិញភ្លាមៗ បន្ទាប់ពីបាត់បង់ការគ្រប់គ្រងបាល់។ ជាមួយកីឡាករឆ្នើមៗ រួមទាំង ខ្សែប្រយុទ្ធ Marcel Sabitzer និងខ្សែការពារ David Alaba នោះ អូទ្រីសគឺជាបេក្ខភាពឈានមុខគេទី ២ ក្នុងការឡើងទៅវគ្គបន្ត ដោយសារតែកម្រិតកីឡាករភាគច្រើនលេងក្នុងលីគកំពូលអាល្លឺម៉ង់ Bundesliga។
-ចំណាត់ថ្នាក់ FIFA ៖ លេខ ២៤
-ឱកាសលេខ ១ ក្នុងពូលពីការព្យាករណ៍របស់ Opta ៖ ១៣,៧%
-កីឡាករឆ្នើម ៖ David Alaba, Konrad Laimer និង Marcel Sabitzer
ហ្ស៊កដានី គឺជាការបង្ហាញខ្លួនលើកដំបូងបង្អស់ក្នុងប្រវត្តិសាស្ត្រ World Cup។ ក្រោមការដឹកនាំរបស់លោក Jamal Sellami និងខ្សែប្រយុទ្ធ Musa Al-Tamari ជាប្រធានក្រុម ដែលត្រូវបានគេដាក់រហស្សនាមថា «Messi ហ្ស៊កដានី។ ទោះយ៉ាងណាក៏ដោយ ក្រុមមកពីអាស៊ីខាងលិចមួយនេះ នឹងប្រឹងប្រែងឱ្យអស់ពីលទ្ធផល ក៏ដូចជាត្រូវតស៊ូយ៉ាងខ្លាំង ដោយសារការអវត្តមានខ្សែប្រយុទ្ធសំខាន់ Yazan Al-Naimat ដោយសាររបួស។
-ចំណាត់ថ្នាក់ FIFA ៖ លេខ ៦៣
-ឱកាសលេខ ១ ក្នុងពូលពីការព្យាករណ៍របស់ Opta ៖ ៥%
-កីឡាករឆ្នើម ៖ Musa Al-Taamari, Yazan Al-Arab, Nizar Al-Rashdan និង Ali Olwan
កាលវិភាគប្រកួតទី ១ (ម៉ោងនៅកម្ពុជា)
-អាហ្សង់ទីន ប៉ះ អាល់ហ្សេរី ម៉ោង ៨ ព្រឹកថ្ងៃទី១៧ ខែមិថុនា
-អូទ្រីស ប៉ះ ហ្ស៊កដានី ម៉ោង ១១ ព្រឹកថ្ងៃទី១៧ ខែមិថុនា
កាលវិភាគប្រកួតទី ២
-អាហ្សង់ទីន ប៉ះ អូទ្រីស ម៉ោង ១២ រំលងអធ្រាត្រចូលថ្ងៃទី២៣ ខែមិថុនា
-ហ្ស៊កដានី ប៉ះ អាល់ហ្សេរី ម៉ោង ១០ ព្រឹកថ្ងៃទី២៣ ខែមិថុនា
កាលវិភាគប្រកួតទី ៣
-អាល់ហ្សេរី ប៉ះ អូទ្រីស ម៉ោង ៩ ព្រឹកថ្ងៃទី២៨ ខែមិថុនា
-ហ្ស៊កដានី ប៉ះ អាហ្សង់ទីន ម៉ោង ៩ ព្រឹកថ្ងៃទី២៨ ខែមិថុនា៕ ប្រភព ៖ FIFA, Yahoo Sports, Opta Analyst, MLS Soccer និងប្រភពផ្សេងទៀត
ចែករំលែកព័តមាននេះ