World Cup ៖ ព្រឹត្តិការណ៍បាល់ទាត់ពិភពលោក២០២៦(FIFA World Cup 2026) កាន់តែខិតជិតចូលមកដល់ហើយពោលគឺនៅសល់ត្រឹមតែ១សប្តាហ៍ទៀតប៉ុណ្ណោះ ។ ជាមួយគ្នានេះ ក្រុមជម្រើសជាតិនីមួយៗដែលទទួល
បានកៅអីចូលប្រកួតប្រជែង ក៏បានប្រកាសបញ្ជីឈ្មោះតាមក្រុមនីមួយៗរួចរាល់ហើយដែរ។
ព្រឹត្តិការណ៍បាល់ទាត់លំដាប់យក្សមួយនេះ តែងតែជាទីន្លែងធ្វើឱ្យរះឡើងនៃអាជីពកីឡាករបាល់ទាត់ជាច្រើន ជាពិសេសកីឡាករ ក្មេងៗដែលមានសមត្ថភាពលេចធ្លោ និងទើបបង្ហាញខ្លួនលើកដំបូងនៅក្នុងព្រឹត្តិការណ៍បាល់ទាត់ដ៏គួរឲ្យចាប់អារម្មណ៍បំផុតមួយនេះ។
១.កីឡាករ Lamine Yamal ៖ ខ្សែប្រយុទ្ធវ័យក្មេងរូបនេះនឹងក្លាយជាសរសរទ្រូងដ៏សំខាន់របស់ក្រុមគោជល់ អេស្ប៉ាញ នៅ World Cup 2026 ។ បច្ចុប្បន Lamine Yamal ទើបមាន១៨ឆ្នាំប៉ុណ្ណោះ ប៉ុន្តែមានសមត្ថភាពល្អហួសពីការស្មាន ទាំងការលេងនៅក្លិប Barcelona និងជម្រើសជាតិ អេស្ប៉ាញ។
នៅ Barcelona គឺ Yamal បានបង្ហាញឱ្យអ្នកគាំទ្របានឃើញរួចហើយអំពីសមត្ថភាពដ៏អស្ចារ្យរបស់គេ ។ រូបគេត្រូវបាន Barcelona ដំឡើងមកកាន់ក្រុមឈុតធំ៣រដូវកាលហើយ ក្នុងនោះបង្ហាញខ្លួនបានចំនួន១៥១ប្រកួត រក
បាន៤៩គ្រាប់ និង៥២បញ្ជូន ។ ចំណែកនៅជម្រើសជាតិវិញ Yamalក៏បានបង្ហាញរួចហើយដែរតាមរយៈជួយឱ្យក្រុមគោជល់ឈ្នះពាន Euro 2024 និងឡើងដល់វគ្គផ្តាច់ព្រ័ត្រពាន UEFA Nations League 2025 ។ ភស្តុតាងទាំងនេះ បានបង្ហាញថា Yamal នឹងក្លាយជាកីឡាករ ដែលអ្នកគាំទ្រតាមដាន និងលេចធ្លោបំផុតនៅ World Cup 2026។
២.កីឡាករ Joao Neves ៖ ខ្សែបម្រើវ័យកក្មេងរបស់ជម្រើសជាតិព័រទុយហ្គាល់រូបនេះ កំពុងធ្វើឱ្យអ្នកគាំទ្របាល់ទាត់ចាប់អារម្មណ៍យ៉ាងខ្លាំង អំពីសមត្ថភាពនាំលេង និងការចែកបាល់របស់គេ ។ រូបគេក៏ជាកីឡាករដ៏សំខាន់ម្នាក់ផងដែរដែលបានរួមចំណែកជួយឱ្យក្រុម Paris SG ឈ្នះពានយូហ្វាឆេមពានលីគ ២ រដូវកាលជាប់គ្នា។
ភាពឆ្លាតវៃ និងជំនាញចែកបាល់ដ៏ល្អរបស់កីឡាករវ័យ២១ឆ្នាំរូបនេះ ត្រូវបានគេរំពឹងថា នឹងក្លាយជាកីឡាករដែលមិនអាចរំលងបានម្នាក់នៅ World Cup 2026 ។ ជាមួយគ្នានេះ Joao Nevesក៏ត្រូវបានគេចាត់ទុកជាកម្លាំងចលករដ៏សំខាន់ដើម្បីជួយដល់ក្រុមបញ្ចខែលព័រទុយហ្គាល់ ឱ្យឈ្នះពាន World Cup ជាលើកដំបូងនៅឆ្នាំ ២០២៦ផងដែរ។
៣.កីឡាករ Desire Doue ៖ កីឡាកររូបនេះបានបង្ហាញសមត្ថភាពយ៉ាងអស្ចារ្យនៅក្រុម Paris SG នា២រដូវកាលចុងក្រោយ រហូតត្រូវបានក្រុមជម្រើសជាតិ បារាំង កោះហៅទៅលេង World Cup ជាលើកដំបូង ។ Desire Doue បានរួមចំណែកយ៉ាងធំធេងក្នុងការជួយឱ្យ Paris SG ឈ្នះពានយូហ្វាឆេមពានលីគ ២ រដូវកាលជាប់គ្នា ពោលគឺរដូវកាល ២០២៤-២៥ និង ២០២៥-២៦។
Desire Doue បានធ្វើឱ្យអ្នកគាំទ្របាល់ទាត់ជាច្រើនចាប់អារម្មណ៍តាមរយៈការបញ្ចេញជំនាញញាក់បាល់ប្រកបដោយទេពកោសល្យ។
សមត្ថភាពនៃការញាក់ រត់ និងស៊ុតបញ្ចូលទីរបស់ខ្សែប្រយុទ្ធស្លាបវ័យ២០ឆ្នាំរូបនេះត្រូវបានគេជឿជាក់ថា នឹងលេចធ្លោខ្លាំងនៅ World Cup 2026 ។
៤.កីឡាករ Arda Guler ៖ ជាកីឡាករដែលមានទេពកោលស្យម្នាក់របស់ក្រុមជម្រើសជាតិតួកគីយេ ។ រូបគេក៏មានគុណសម្បត្តិធំធេងក្នុងការជួយឱ្យក្រុមតួកគីយេ ឆ្លងផុតវគ្គជម្រុះតាមទ្វីបឡើងមកកាន់ជុំចុងក្រោយនៃព្រឹត្តិការណ៍ World Cup 2026 ។ ខ្សែបម្រើវ័យ២១ឆ្នាំរូបនេះ ត្រូវបានគេរំពឹងថា នឹងក្លាយជាកីឡាករ
សំខាន់ក្នុងការជួយក្រុមតួកគីយេ នៅ World Cup 2026។
ថ្វីដ្បិត Arda Guler មានវ័យក្មេង ប៉ុន្តែរូបគេមានសមត្ថភាពល្អគួរឱ្យកត់សម្គាល់ ក្នុងការលេងនៅក្រុម Real Madrid កាលពីរដូវកាលមុន។ ទោះបីជាក្រុមស្ដេចស មិនបានឈ្នះពានអ្វីសោះ ប៉ុន្តែរូបគេបានបង្ហាញស្ថិតិដ៏ល្អ ដោយលេងបាន ៥១ ប្រកួត ក្នុងនោះរកបាន ៦ គ្រាប់ និងបញ្ជូនបាល់១៤លើក។
៥.កីឡាករ Nico Paz ៖ ជាកីឡាកររបស់ក្រុមជម្រើសជាតិអាហ្សង់ទីន ដែលបានកោះហៅមកពីក្រុម Como នៃលីគកំពូលអុីតាលី(ស៊េរីA)។ ខ្សែបម្រើប្រយុទ្ធវ័យ២១ឆ្នាំរូបនេះត្រូវបានគេរំពឹងថា នឹងក្លាយជាកម្លាំងដ៏សំខាន់
ម្នាក់របស់ក្រុមពពកសនៅព្រឹត្តិការណ៍World Cup 2026 ។
នៅវ័យក្មេងក៏ពិតមែន ប៉ុន្តែរូបគេបានបង្ហាញសមត្ថភាពយ៉ាងលេចធ្លោជាមួយក្រុម Como កាលពីរដូវកាល២០២៥-២០២៦។
Nico Paz បង្ហាញខ្លួនសរុបបានចំនួន៤០ប្រកួត ក្នុងនោះរកបាន១៣គ្រាប់ និងបញ្ជូន៨លើក។ ហើយរឿងដ៏ពិសេសនោះ គឺកីឡាកររូបនេះបានរួមចំណែកយ៉ាងធំធេងជួយឱ្យ Como ឈរលេខ៤ក្នុងតារាងលីគកំពូល ដើម្បីទទួលបានកៅអីលេងយូហ្វាឆេមពានលីគនៅរដូវកាលក្រោយ។
មិនទាន់អស់ទេ នៅមានកីឡាករវ័យក្មេងឆ្នើមៗជាច្រើនទៀតដែលនឹងបង្ហាញវត្តមាននៅក្នុងព្រឹត្តិការណ៍ World Cup 2026 ប៉ុន្តែការលើកយកកីឡាករវ័យក្មេងទាំង៥ខាងលើមកបង្ហាញ ដោយសារពួកគេលេចធ្លោជាងគេ ហើយ
រំពឹងថា នឹងអាចជួយក្រុមដល់វគ្គសំខាន់ៗឬវគ្គផ្តាច់ព្រ័ត្រឬឈានដល់ឈ្នះពានជើងឯកតែម្ដង៕
ចែករំលែកព័តមាននេះ