អន្តរជាតិ ៖ ពូល L ដែលជាពូលចុងក្រោយគេនៃព្រឹត្តិការណ៍ World Cup ឆ្នាំ ២០២៦ រួមមានក្រុមជម្រើសជាតិអង់គ្លេស ក្រូអាស៊ី ហ្កាណា និងប៉ាណាម៉ា។ ពូលនេះ ត្រូវបានចាត់ទុកជាពូលដ៏គួរឱ្យចាប់អារម្មណ៍បំផុត និងគួររំលងជាមួយការប្រកួតប្រជែងគ្នាយ៉ាងស្វិតស្វាញ ជាពិសេសការផ្តោតយ៉ាងសំខាន់លើក្រុមតោកំណាចអង់គ្លេស។
អង់គ្លេស ត្រូវបានចាត់ទុកថាជាក្រុមមួយដែលមានឱកាសខ្ពស់ក្នុងការប្រជែងពានរង្វាន់ World Cup ឆ្នាំ ២០២៦ ស្ថិតក្រោមការដឹកនាំរបស់គ្រូបង្វឹកថ្មីជនជាតិអាល្លឺម៉ង់ លោក Thomas Tuchel។ កាលពីវគ្គជម្រុះ ក្រុមរហស្សនាមតោកំណាចមួយនេះ ធ្វើបានយ៉ាងល្អឥតខ្ចោះ ដោយឈ្នះទាំង ៨ ប្រកួត ស៊ុតបញ្ចូលទីបាន ២២ គ្រាប់ និងគ្មានរបូតសូម្បីតែ១គ្រាប់។ លោក Tuchel បានផ្លាស់ប្តូរអង់គ្លេសឱ្យមកលេងក្នុងទម្រង់វាយបក និងការគ្រប់គ្រងបាល់ដ៏មានប្រសិទ្ធភាព ខុសប្លែកពីទម្រង់ការពារខ្លាំងពេក កាលពីសម័យកាលដឹកនាំរបស់លោក Gareth Southgate។ នៅព្រឹត្តិការណ៍ឆ្នាំ ២០២៦ អង់គ្លេសដាក់គោលដៅយ៉ាងមោះមុតបញ្ចប់ការរង់ចាំការឈ្នះជើងឯកពិភពលោកអស់រយៈពេល ៦០ ឆ្នាំ គិតចាប់តាំងពីឆ្នាំ ១៩៦៦ ដែលក្នុងនាមជាម្ចាស់ផ្ទះពួកគេឈ្នះជើងឯកលើកដំបូង។
-ចំណាត់ថ្នាក់ FIFA ៖ លេខ ៤
-ឱកាសលេខ ១ ក្នុងពូលពីការព្យាករណ៍របស់ Opta ៖ ៦៧,៥%
-កីឡាករឆ្នើម ៖ Harry Kane, Jude Bellingham, Bukayo Saka និង Declan Rice
ក្រូអាស៊ី បានកៅអីឡើងមកព្រឹត្តិការណ៍ World Cup ឆ្នាំ ២០២៦ ជាផ្លូវការ បន្ទាប់ពី បញ្ចប់នៅចំណាត់ថ្នាក់លេខ ១ ពូល L វគ្គជម្រុះទ្វីបអឺរ៉ុប។ នេះគឺជាការបង្ហាញខ្លួនលើកទី ៧ របស់ពួកគេក្នុងពានរង្វាន់ពិភពលោក ហើយពួកគេលែងត្រូវបានគេចាត់ទុកជាក្រុមទន់ខ្សោយតទៀតហើយ ចាប់តាំងពីក្លាយជាក្រុមរងជើងឯកឆ្នាំ ២០១៨ និងចំណាត់ថ្នាក់លេខ ៣ ឆ្នាំ ២០២២។ ក្រោមការដឹកនាំរបស់លោក Zlatko Dalić តែងនិយមប្រើប្រាស់ទម្រង់ ៤-៣-៣ ឬ ៤-២-៣-១។ ប៉ុន្តែសម្រាប់ការប្រកួតឆ្នាំនេះ លោកបានបង្ហើបពីការផ្លាស់ប្តូរមកប្រើប្រាស់ទម្រង់ ៣-៤-២-១ វិញ ព្រោះមានកីឡាករសំខាន់ៗជាច្រើនស៊ាំនឹងទម្រង់នេះជាមួយក្លិបអាជីពរបស់ពួកគេ ជាពិសេសដើម្បីទប់ទល់នឹងក្រុមខ្លាំងៗ។
-ចំណាត់ថ្នាក់ FIFA ៖ លេខ ១១
-ឱកាសលេខ ១ ក្នុងពូលពីការព្យាករណ៍របស់ Opta ៖ ២០,៤%
-កីឡាករឆ្នើម ៖ Luka Modrić, Joško Gvardiol, Mateo Kovačić និង Andrej Kramarić
ហ្កាណា បានកៅអី World Cup ឆ្នាំ២០២៦ ដែលជាការបង្ហាញខ្លួនលើកទី៥ របស់ពួកគេនៅក្នុងព្រឹត្តិការណ៍បាល់ទាត់ពិភពលោក។ ក្រុមរហស្សនាមផ្កាយខ្មៅមួយនេះ មិនអន់ទេ ដោយបានបញ្ចប់ក្នុងចំណាត់ថ្នាក់លេខ ១ ពូល I វគ្គជម្រុះទ្វីបអាហ្វ្រិក ដោយឈ្នះ ៨ ប្រកួត និងចាញ់តែ ១ ប្រកួតប៉ុណ្ណោះ ក្នុងចំណោម ១០ ប្រកួត។ ទោះបីជាដឹកនាំក្រុមឆ្លងផុតវគ្គជម្រុះក្តី ប៉ុន្តែលោក Otto Addo ត្រូវបានសហព័ន្ធបាល់ទាត់ហ្គាណាបញ្ចប់តំណែង កាលពីខែមីនា ឆ្នាំ២០២៦ បន្ទាប់ពីលទ្ធផលប្រកួតមិត្តភាពមិនសូវល្អ។ អតីតជំនួយការលោក Sir Alex Ferguson នៅ Manchester United គឺលោក Carlos Queiroz ត្រូវបានតែងតាំងជាគ្រូបង្វឹកថ្មីដើម្បីដឹកនាំក្រុមក្នុងព្រឹត្តិការណ៍នេះ។
-ចំណាត់ថ្នាក់ FIFA ៖ លេខ ៧៣
-ឱកាសលេខ ១ ក្នុងពូលពីការព្យាករណ៍របស់ Opta ៖ ៧,២%
-កីឡាករឆ្នើម ៖ Antoine Semenyo, Jordan Ayew និង Thomas Partey
ប៉ាណាម៉ា ឡើងមកកាន់ព្រឹត្តិការណ៍ World Cup ឆ្នាំ ២០២៦ ដែលជាការបង្ហាញខ្លួនលើកទី២ក្នុងប្រវត្តិសាស្ត្រ។ ក្រោមការដឹកនាំរបស់គ្រូបង្វឹកជនជាតិដាណឺម៉ាក លោក Thomas Christiansen ប៉ាណាម៉ាបានក្លាយជាក្រុមដ៏ខ្លាំងប្រចាំតំបន់អាមេរិកកណ្តាល និងមានមហិច្ឆតាខ្ពស់ជាងកាលពីឆ្នាំ ២០១៨។
-ចំណាត់ថ្នាក់ FIFA ៖ លេខ ៣៤
-ឱកាសលេខ ១ ក្នុងពូលពីការព្យាករណ៍របស់ Opta ៖ ៤,៩%
-កីឡាករឆ្នើម ៖ Adalberto Carrasquilla, Michael Amir Murillo និង Ismael Díaz
កាលវិភាគប្រកួតទី ១ (ម៉ោងនៅកម្ពុជា)
-អង់គ្លេស ប៉ះ ក្រូអាស៊ី ម៉ោង ៣ រំលងអាធ្រាត្រចូលថ្ងៃទី១៨ ខែមិថុនា
-ហ្កាណា ប៉ះ ប៉ាណាម៉ា ម៉ោង ៦ ព្រឹកថ្ងៃទី១៨ ខែមិថុនា
កាលវិភាគប្រកួតទី ២
-អង់គ្លេស ប៉ះ ហ្កាណា ម៉ោង ៣ រំលងអធ្រាត្រចូលថ្ងៃទី២៤ ខែមិថុនា
-ប៉ាណាម៉ា ប៉ះ ក្រូអាស៊ី ម៉ោង ៦ ព្រឹកថ្ងៃទី២៤ ខែមិថុនា
កាលវិភាគប្រកួតទី ៣
-ប៉ាណាម៉ា ប៉ះ អង់គ្លេស ម៉ោង ៤ ទៀបភ្លឺថ្ងៃទី២៨ ខែមិថុនា
-ក្រូអាស៊ី ប៉ះ ហ្កាណា ម៉ោង ៤ ទៀបភ្លឺថ្ងៃទី២៨ ខែមិថុនា៕ ប្រភព ៖ FIFA, BBC, Yahoo Sports, Opta Analyst, MLS Soccer និងប្រភពផ្សេងទៀត
ចែករំលែកព័តមាននេះ