រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ ដែលត្រូវបានគេរៀបចំធ្វើឡើងក្នុងមួយខែ២ដងនោះ នៅថ្ងៃអាទិត្យ ទី១១ ឧសភា សប្តាហ៍នេះបានវិលត្រឡប់មកកំដរអារម្មណ៍ប្រិយមិត្តទស្សនិកជនសាជាថ្មីទៀតហើយ ។ កីឡាករឈាន ហុង មកពីសមាគមកីឡាប្រដាល់ក្រសួងការពារជាតិ នឹងត្រូវជួបជាមួយកីឡាករថៃ Kitty Pong
រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ ដែលត្រូវបានគេរៀបចំធ្វើឡើងក្នុងមួយខែ២ដងនោះ នៅថ្ងៃអាទិត្យ ទី១១ ឧសភា សប្តាហ៍នេះបានវិលត្រឡប់មកកំដរអារម្មណ៍ប្រិយមិត្តទស្សនិកជនសាជាថ្មីទៀតហើយ ។ កីឡាករឈាន ហុង មកពីសមាគមកីឡាប្រដាល់ក្រសួងការពារជាតិ នឹងត្រូវជួបជាមួយកីឡាករថៃ Kitty Pong ខណៈកីឡាករឃឹម ឌីម៉ា មកពីក្លិបរស្មីភូមិគាប ខេត្តបន្ទាយមានជ័យ ត្រូវជួបជាមួយកីឡាករអេស្ប៉ាញ Alvarez Baiget Joan ។
កីឡាករថៃ Kitty Pong ធ្លាប់ផ្តួលកីឡាករកម្ពុជា អាំង សំអាត នៅមុនស្នូរជួងបញ្ចប់ទឹកទី៥ ដែលកាលណោះគេប្រកួតក្នុងប្រភេទទម្ងន់៥៤គីឡូក្រាម ។ ពេលនេះគេមកជួប ឈាន ហុង ទម្ងន់របស់គេបានឡើងរហូតដល់៦០គីឡូក្រាមឯណោះ ទើបមិនទាន់ដឹងថា លទ្ធផលនឹងទៅជាយ៉ាងណានោះឡើយ ។ កីឡាករថៃរូបនេះមានស្នៀតប្រយុទ្ធល្អគួរសមទាំងស្នៀតជើង និងស្នៀតដៃពេលធ្វើការវាយចេញម្តងៗ គឺមានភាពច្បាស់លាស់ល្អ ថែមទាំងមានទម្ងន់ធ្ងន់ទៀតផង។ ចំណែក ឈាន ហុង ក៏មិនធម្មតាបុ៉ន្មានដែរ ផ្លែកែង និងជង្គង់របស់គេអាចវាយចេញបានរហ័ស និងត្រូវចំគោលដៅទៀតផង ម្យ៉ាងវិញទៀតផ្លែជង្គង់របស់គេអាចវាយចេញជាប្រយោលក៏បាន និងចូលកៀកក៏បាន ឯចិត្តក៏ធ្ងន់ មិនចេះឆេវឆាវផ្តាសឡើយ ។
លោកទី រ៉ាណាត អ្នករៀបចំកម្មវិធីប្រកួតប្រដាល់ប្រចាំស្ថានីយទូរទស្សន៍បុ៉ស្តិ៍លេខ៣ បានធ្វើការអះអាងថា Kitty Pong បើសិនជាចង់ផ្តួល ឈាន ហុង នោះ មិនមែនជារឿងងាយស្រួលបុ៉ន្មានឡើយ ព្រោះនៅស្រុកខ្មែរអ្នកណាមិនល្បីថា ឈាន ហុង ជាកំពូលអ្នកប្រដាល់ដែលមានស្នៀតកែង និងជង្គង់ល្អនោះ ។ ចាំមើល Kitty Pong អាចផ្តួល ឈាន ហុង បានឬអត់ ? ចំណែកកីឡាករអេស្ប៉ាញ Alvarez Baiget Joan ដែលត្រូវជួបជាមួយកីឡាករកម្ពុជា ឃឹម ឌីម៉ា ក្នុងប្រភេទទម្ងន់៦៥គីឡូក្រាមនោះ មិនធ្លាប់មកស្រុកខ្មែរម្តងណាឡើយ ។ ការមកស្រុុកខ្មែរជាលើកដំបូងត្រូវគេដាក់ឱ្យប្រកួតជាមួយ ឃឹម ឌីម៉ា ដែលពូកែប្រើស្នៀតកែង និងជង្គង់ផ្តួលគូប្រកួតនោះ មិនទាន់ដឹងថា អ្នកណាខ្លាំងជាងអ្នកណានោះឡើយ ។ ឃឹម ឌីម៉ា គឺជាជើងខ្លាំងមួយរូបដែលមានល្បិចប្រយុទ្ធនៅលើសង្វៀនយ៉ាងសម្បូរបែប ហើយសព្វថ្ងៃនេះគេស្ទើរតែរកគូប្រកួតមិនបានទៀតផង ។ ទោះបីយ៉ាងណា ក៏គ្មាននរណាហ៊ានអះអាងទុកមុនពីលទ្ធផលចាញ់ឈ្នះនោះទេ ព្រោះគេមិនធ្លាប់ស្គាល់ពីប្រវត្តិកីឡាករអេស្ប៉ាញច្បាស់លាស់ ។
លោកទី រ៉ាណាត គ្រាន់តែបង្ហើបថា កីឡាករអេស្ប៉ាញរូបនេះមិនជាអន់ខ្សោយប៉ុន្មានឡើយ គេធ្លាប់ធ្វើការហ្វឹកហាត់ និងឡើងប្រកួតនៅលើសង្វៀនស្រុកថៃមិនតិចដងទេ ។ ដូច្នេះអាចចាត់ទុកថា គេគឺជាជើងខ្លាំងម្នាក់ដែរ ដែល ឃឹម ឌីម៉ា មិនអាចមើលស្រាលបានឡើយ ។ ក្រៅពីគូអន្តរជាតិនេះទៅនៅមានការប្រកួតរវាងកីឡាករកម្ពុជា និងកម្ពុជាជាច្រើនគូទៀតដូចជា កីឡាកររឿង សារ័ត្ន មកពីក្លិបកងទ័ពពិសេសឆត្រយោង៩១១ ជួបជាមួយកីឡាករម៉ន រដ្ឋា មកពីក្លិបការិយាល័យទី៥ កងទ័ពជើងគោក ។
កីឡាករហ៊ល ដារ៉ា មកពីក្លិបសាលវ័ន្តកីឡា ត្រូវជួបជាមួយកីឡាករអាន សុផល មកពីក្លិបមិត្តបូ៉លិស និងកីឡាករវៀត ប៊ុនឌឿន មកពីសមាគមកីឡាប្រដាល់ក្រសួងការពារជាតិ ជួបជាមួយកីឡាករង៉ែត រដ្ឋា មកពីសមាគមកីឡាប្រដាល់ក្រសួងមហាផ្ទៃ ៕
ចែករំលែកព័តមាននេះ