ខេត្តកំពង់ឆ្នាំង ៖ មានករណីអគ្គិភ័យបានឆាបឆេះផ្ទះថ្មមួយល្វែង បណ្តាលឱ្យមានផ្សែងហុយខ្មួលខ្មាញ់ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តអគ្គិភ័យរបស់ស្នងការដ្ឋាននគរបាលខេត្តចុះមកជួយអន្តរាគមន៍ពន្លត់ទាន់ពេលវេលា ។ ពាក់ព័ន្ធនឹងករណីនេះ ត្រូវបានគេសង្ស័យថា បណ្តាលមកពីម្ចាស់ផ្ទះដុតធូបសែននៅកន្លែងកុងម៉ា…
ខេត្តកំពង់ឆ្នាំង ៖ មានករណីអគ្គិភ័យបានឆាបឆេះផ្ទះថ្មមួយល្វែង បណ្តាលឱ្យមានផ្សែងហុយខ្មួលខ្មាញ់ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តអគ្គិភ័យរបស់ស្នងការដ្ឋាននគរបាលខេត្តចុះមកជួយអន្តរាគមន៍ពន្លត់ទាន់ពេលវេលា ។ ពាក់ព័ន្ធនឹងករណីនេះ ត្រូវបានគេសង្ស័យថា បណ្តាលមកពីម្ចាស់ផ្ទះដុតធូបសែននៅកន្លែងកុងម៉ា ព្រោះជាថ្ងៃសីល ទើបបង្កជាអគ្គិភ័យឆាបឆេះតែម្តង ។
ហេតុការណ៍ខាងលើនេះបង្កឱ្យមានការការភ្ញាក់ផ្អើលបានកើតឡើងកាលពីវេលាម៉ោង១១និង២០នាទីព្រឹកថ្ងៃទី២៧ ខែតុលា ឆ្នាំ២០១៩ នៅចំណុចផ្ទះថ្មមួយល្វែង ស្ថិតក្នុងភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង ។
សមត្ថកិច្ចនគរបាលមូលដ្ឋានបានឲ្យដឹងថា ម្ចាស់ផ្ទះកើតហេតុឈ្មោះ លី គឹមថៃ អាយុ៤៥ឆ្នាំ រស់នៅក្នុងភូមិឃុំកើតហេតុខាងលើ។
តាមប្រភពដដែលបានបន្តថា មុនពេលកើតហេតុ ដោយសារជាថ្ងៃសីលទើបម្ចាស់ផ្ទះខាងលើបានដុតធូបសែននៅកន្លែងកុងម៉ា ហើយចេញទៅលក់ដូរនៅផ្សារក្រោមបាត់ ។ លុះដល់វេលាម៉ោងជាង១១ព្រឹកថ្ងៃដដែល ក៏ស្រាប់តែកើតមានអគ្គីភ័យឆាបឆេះចេញពីខាងក្នុងផ្ទះនិងមានផ្សែងហុយខ្មួលខ្មាញ់មកខាងក្រៅ ធ្វើឱ្យមានការផ្អើលឆោឡោឡើងតែម្តង ។ បន្ទាប់មករថយន្តពន្លត់អគ្គីភ័យចំនួន៣គ្រឿង ដែលដឹកនាំផ្ទាល់ដោយលោកឧត្តមសេនីយ៍ទោ ខូវ លី ស្នងការនគរបាលខេត្ត បានបញ្ជាដោយផ្ទាល់ដើម្បីចុះអន្តរាគមន៍បាញ់ពន្លត់ទឹកទាន់ពេលវេលា ។
សមត្ថកិច្ចបានបញ្ជាក់ថា ពាក់ព័ន្ធនឹងករណីខាងលើនេះគឺបណ្ដាលមកពីម្ចាស់ផ្ទះធូបសែននៅកន្លែងកុងម៉ាទុកចោល ហើយក៏បង្កជាអគ្គិភ័យឆាបឆេះនិងបន្តឆេះរាលដាលដល់ទូឈើមួយទៀត ប៉ុន្តែដោយសារតែមានការអន្តរាគមន៍ទាន់ពេលវេលាទើបអាចគ្រប់គ្រងសភាពការណ៍បាន ។ ក្នុងហេតុការណ៍ខាងលើនេះដែរ មិនមាននរណាម្នាក់រងគ្រោះនោះទេ ប៉ុន្តែសម្រាប់ប្រជាពលរដ្ឋដែលរស់នៅជាប់ផ្ទះកើតហេតុនោះ មានការភ័យស្លន់ស្លោយ៉ាងខ្លាំង ដោយសារឃើញផ្សែងហុយខ្មួលខ្មាញ់ចេញពីក្នុងផ្ទះខាងលើខ្លាំងពេក ហើយប្រជាពលរដ្ឋក៏បានអរគុណដល់សមត្ថកិច្ចដែលចេញអន្តរាគមន៍ជួយពន្លត់ទាន់ពេលវេលាផងដែរ ។
ជុំវិញករណីដុតទៀនធូបសែនទុកចោលហើយម្ចាស់ផ្ទះមិននៅបែបនេះ កន្លងមកសមត្ថកិច្ចក៏ដូចជាអាជ្ញាធរគ្រប់ជាន់ថ្នាក់ធ្លាប់អប់រំណែនាំរួចមកហើយ ឲ្យមានការប្រុងប្រយ័ត្ន មុននឹងចេញពីផ្ទះត្រូវពន្លត់ភ្លើងទៀន ធូបឲ្យបានត្រឹមត្រូវ និងបិទបារ៉ែតភ្លើងជាដើម ចៀសវាងកើតមានដូចករណីខាងលើ ៕ (កែសម្រួលដោយ ៖ ធីតា)
ចែករំលែកព័តមាននេះ