ខេត្តព្រះសីហនុ ៖ បើតាមរបាយការណ៍របស់កម្លាំងកងរាជអាវុធហត្ថក្រុងកោះរ៉ុង នៃទីបញ្ជាការកងរាជអាវុធហត្ថខេត្តព្រះសីហនុ បានឲ្យដឹងថា បន្ទាប់ពីមានករណីបាត់ខ្លួនស្ត្រីជនជាតិអង់គ្លេសម្នាក់កាលពីម៉ោង៥និង៣០នាទីល្ងាច ថ្ងៃទី២៤ ខែតុលា ឆ្នាំ២០១៩កន្លងមកនោះ ពេលនេះសមត្ថកិច្ចនៅមិនទាន់ដឹងពីមូលហេតុនៅឡើយទេ…
ខេត្តព្រះសីហនុ ៖ បើតាមរបាយការណ៍របស់កម្លាំងកងរាជអាវុធហត្ថក្រុងកោះរ៉ុង នៃទីបញ្ជាការកងរាជអាវុធហត្ថខេត្តព្រះសីហនុ បានឲ្យដឹងថា បន្ទាប់ពីមានករណីបាត់ខ្លួនស្ត្រីជនជាតិអង់គ្លេសម្នាក់កាលពីម៉ោង៥និង៣០នាទីល្ងាច ថ្ងៃទី២៤ ខែតុលា ឆ្នាំ២០១៩កន្លងមកនោះ ពេលនេះសមត្ថកិច្ចនៅមិនទាន់ដឹងពីមូលហេតុនៅឡើយទេ គិតត្រឹមព្រឹកថ្ងៃទី២៧ ខែតុលានេះ ។
ប្រភពដដែលបន្តថា លោកគួច ចំរើន អភិបាលនៃគណៈអភិបាលខេត្តព្រះសីហនុ អមដំណើរដោយលោកវរសេនីយ៍ឯក វង្ស ប៊ុនថន មេបញ្ជាការរងទីបញ្ជាការកងរាជអាវុធហត្ថខេត្តព្រះសីហនុ រួមជាមួយមន្ត្រីក្រោមឱវាទជាច្រើននាក់ទៀត សហការជាមួយអាជ្ញាធរសមត្ថកិច្ចក្រុងកោះរ៉ុង បានចុះបើកកិច្ចប្រតិបត្តិការរុករកស្ត្រីរងគ្រោះជាជនជាតិអង់គ្លេសដែលកំពុតែបាត់ខ្លួនហើយ។
ប្រភពដដែលបានឲ្យដឹងបន្តទៀតថា ស្ត្រីជនជាតិអង់គ្លេសដែលបាត់ខ្លួនរូបនេះឈ្មោះBAMBRIDG EAMELIA អាយុ២១ឆ្នាំ កាន់លិខិតឆ្លងដែនលេខ៥៣១១៨៩០៨៣៣ បានបាត់ខ្លួនកាលពីម៉ោង៥និង៣០នាទីល្ងាច ថ្ងៃទី២៤ ខែតុលា ឆ្នាំ២០១៩ កន្លងមក ស្ថិតនៅចំណុចភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។
ប្រភពដដែលបញ្ជាក់ថា មុនពេលបាត់ខ្លួន ស្ត្រីរងគ្រោះបានចូលមកស្នាក់នៅ Nest Bar បន្ទប់លេខ១ ដែលមានទីតាំងស្ថិតនៅភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ក្រោយមិនដឹងថា យ៉ាងម៉េចនោះទេ ស្ត្រីរងគ្រោះស្រាប់តែបាត់ខ្លួនតែម្តង ។
ប្រភពដដែលបញ្ជាក់ទៀតថា បន្ទាប់ពីបាត់ខ្លួនភ្លាមៗ មិត្តភក្តិស្ត្រីរងគ្រោះម្នាក់ឈ្មោះ ELENA JOHANNA MARIA អាយុ២៣ឆ្នាំ ភេទស្រី ជាជនជាតិហូឡង់ បានរាយការណ៍ជូនសមត្ថកិច្ចនគរបាលប៉ុស្តិ៍រដ្ឋបាល សង្កាត់កោះរ៉ុង ដើម្បីជួយអន្តរាគមន៍តាមរកស្ត្រីរងគ្រោះ ប៉ុន្តែរហូតមកដល់ពេលនេះ អាជ្ញាធរមានសមត្ថកិច្ចដឹកនាំដោយលោក គួច ចំរើន អភិបាលនៃគណៈអភិបាលខេត្ត កំពុងមមាញឹកក្នុងការតាមដានរុករកគ្រប់ច្រកល្ហកហើយ ប៉ុន្តែនៅតែមិនទាន់មានពន្លឺនៅឡើយទេ។ (កែសម្រួលដោយ ៖ បុប្ផា)
ចែករំលែកព័តមាននេះ