ប្រទេសស៊ីរី ៖ ប្រធានាធិបតីអាមេរិកលោកដូណាល់ត្រាំ ប្រកាសកាលពីថ្ងៃទី២៣តុលាពីការលុបចោលទណ្ឌកម្ម ប្រឆាំងតួកគីព្រោះតែការវាយលុករបស់ខ្លួន ប្រឆាំងពួកឃើតនៅភាគខាងជើងស៊ីរី ខណៈកងទ័ពរុស្ស៊ីបានលើកមកបំពេញការល្បាតជាលើកដំបូងក្នុងតំបន់ព្រំដែន ដែលអាមេរិកទើបដកកងទ័ពខ្លួនចេញ។ លោកត្រាំអះអាងថាវាជាជោគជ័យមួយដ៏ធំដែលទទួលបាននៅស៊ីរី ជាមួយការបង្កើតតំបន់សន្តិសុខនៅតាមព្រំដែនជាមួយតួកគី។…
ប្រទេសស៊ីរី ៖ ប្រធានាធិបតីអាមេរិកលោកដូណាល់ត្រាំ ប្រកាសកាលពីថ្ងៃទី២៣តុលាពីការលុបចោលទណ្ឌកម្ម ប្រឆាំងតួកគីព្រោះតែការវាយលុករបស់ខ្លួន ប្រឆាំងពួកឃើតនៅភាគខាងជើងស៊ីរី ខណៈកងទ័ពរុស្ស៊ីបានលើកមកបំពេញការល្បាតជាលើកដំបូងក្នុងតំបន់ព្រំដែន ដែលអាមេរិកទើបដកកងទ័ពខ្លួនចេញ។
លោកត្រាំអះអាងថាវាជាជោគជ័យមួយដ៏ធំដែលទទួលបាននៅស៊ីរី ជាមួយការបង្កើតតំបន់សន្តិសុខនៅតាមព្រំដែនជាមួយតួកគី។ លោកថាខ្ញុំបានស្នើដល់រដ្ឋមន្ត្រីរតនាគារ ឲ្យលុបចោលរាល់ទណ្ឌកម្មដែលបានដាក់កាលពីថ្ងៃទី១៤តុលា ជាការឆ្លើយតបចំពោះការវាយលុករបស់តួកគី។ ក្រុងវ៉ាស៊ិនតោនបានផ្អឹបទុកទ្រព្យសម្បត្តិ របស់រដ្ឋមន្ត្រីតួកគី៣រូប ក្រោយការវាយលុករបស់ក្រុងអង់ការ៉ា ប្រឆាំងពួកយុទ្ធជនឃើតដែលជាសម្ព័ន្ធមិត្តតាំងពីយូរមកហើយរបស់ពួកលោកខាងលិច ក្នុងការតស៊ូប្រឆាំងក្រុមរដ្ឋអ៊ិស្លាម។ លោកត្រាំបន្តថាទាហានអាមេរិកក្នុងចំនួនតិចនឹងបន្តស្ថិតនៅស៊ីរីក្នុងតំបន់ដែលមានប្រេងកាត។
ចំណែកកងទ័ពរុស្ស៊ីវិញកាលពីថ្ងៃទី២៣តុលាបានលើកទៅកាន់ភាគឦសានស៊ីរី ដើម្បីធានាដល់ការចាកចេញរបស់កងកម្លាំងឃើតទាំងអស់ពីបណ្ដោយព្រំដែនជាមួយតួកគី ជាការអនុវត្តកិច្ចព្រមព្រៀងមួយដែលចុះហត្ថលេខារវាងក្រុងអង់ការ៉ានិងក្រុងមូស្គូ។
កាលពីថ្ងៃទី២៣តុលាមានបាតុកម្មសម្ដែងកំហឹងនិងក្ដីអស់សង្ឃឹមរបស់ពួកឃើតនៅទីក្រុងQAMICHLI ជាទីក្រុងមួយនៅចុងខាងជើងស៊ីរីចាត់ទុកជារដ្ឋធានីរបស់ពួកឃើត ហើយពុំជាប់ទាក់ទិននឹងកិច្ចព្រមព្រៀងពីតំបន់សន្តិសុខ។
ប្រជាជនច្រើនរយនាក់បានធ្វើបាតុកម្មនៅទីនោះដោយស្រែកពាក្យនានាប្រឆាំងរដ្ឋអំណាចតួកគី។ ពួកបាតុករនិយាយថាកិច្ចព្រមព្រៀងនោះបម្រើតែបណ្ដារដ្ឋអំណាចបរទេស ហើយពុំបម្រើប្រជាជនយើងឡើយ។ ពួកគេអះអាងថាទិសដៅរបស់តួកគី គឺសម្លាប់និងបណ្ដេញប្រជាជនឃើត ហើយដាក់ប្រជាជននោះឲ្យស្ថិតក្រោមការកាន់កាប់របស់ខ្លួន៕ (កែសម្រួលដោយ ៖ បុប្ផា)
ចែករំលែកព័តមាននេះ